VOV4.Sêdang – Ô vâi krâ nhŏng o ƀă pú hmâ! Tung 9 khế hiăng luâ Kon Tum cho kong pơlê ai tơdroăng mơhnhôk mơ’no liăn cheăng pa kong liăn ngân tơnêi têa iâ má môi tâng pơchông ƀă mâu kong pơlê tung kơpong Tây Nguyên. Drêng ai tơdroăng kố, a Hneăng hôp rôh má 5 Khu pơkuâ Đảng ƀô̆ kong pơlê hneăng má 16 po rơdâ nếo tơkŭm po tung măng tĭng hdrối,Khu pơkuâ ngăn Đảng ủy Kon Tum hiăng mơdoh chôu tơkŭm tơpui tơno vâ ‘nâi tíu ki kreăng, ti tăng troăng vâ mơhnhôk mơ’no liăn cheăng.

Tung khế 9 kố nah, kong pơlê Kon Tum tơ’mot hên khu ‘no liăn mơjiâng tơmeăm khoăng lối 8 rơpâu rơtal liăn la tâi tâng xuân bú chêh tung hlá mơ-éa tê. Ăm hlo, nôkố nếo ai 2 tơdroăng tơkêa bro hiăng pêi klêi hlá mơ-éa pơxiâm vâ pêi cheăng tê mơdró tâi tâng kơxô̆ liăn chêh ‘no mơjâng tơmeăm khoăng lối 10 rơtal liăn, 5 tơdroăng tơkêa bro dế tơbleăng ‘no liăn mơjiâng pro ƀă tâi tâng kơxô̆ liăn 24 rơtal liăn ƀă kơxô̆ hên 21 tơdroăng tơkêa bro xuân dế tung pơla pro hlá mơ-éa.

Tiô pôa Ngô Việt Thành, Ngế pơkuâ Khu xiâm ngăn tơdroăng Pơkâ ƀă ‘no liăn cheăng kong pơlê Kon Tum ăm ‘nâi, môi tíu ki pá tung tung tơdroăng vâ tơ’mot khu ‘no liăn mơjiâng tơmeăm khoăng dêi kong pơlê cho tơdroăng tơdjâk troh tơnêi:

‘’Vâ chê 90% tơdroăng tơkêa bro ai tơdjâk troh tơnêi mê xuân ai tơdroăng xôi ki ê pơla pơkâ hdró 3 túa kong ƀă ki khât ăm hlo tơnêi nôkố vâ tối tơvâ tơvân tung tơdroăng vâ môi tuăn tiô troăng rơhlâ ‘no liăn mơjiâng tơmeăm khoăng. Pakĭng mê, hên mâu tơdroăng tơkêa bro pâ thế hdró mơnhông cheăng kâ rêh ối ôh tá tơtro ƀă tơdroăng pơkâ ‘no liăn cheăng. Klêi mê, mâu Vi ƀan tơring, pơlê kong kơdrâm tơbleăng tơnêi xuân ôh tá séa ngăn nhên drêng khu ‘no liăn pro hlá mơ-éa mê chiâng tơvâ tơvân hên tơdroăng, tơvâ tơvân ƀă mâu tơdroăng tơkêa bro kiăng pơkâ troăng rơhlâ ƀă tơvâ tơvân ƀă mâu tơdroăng tơkêa bro ki hiăng ăm phêp lơ ôh tá tơtro ƀă pơkâ tơchoâm’’.

Têa ki tô a Đăk Tô hiăng hên hơnăm tro chúa lôi dế tơkôm ‘khu ‘no liăn vâ mơjiâng

Tơdrêng ƀă hên tơdroăng ki tối kơpêng, mâu tíu ki pá tơvâ tơvân tung tơ’mot khu ‘no liăn cheăng mơjiâng tơmeăm khoăng a kong pơlê Kon Tum xuân châ hnê mơhno ăm hlo ki ôh tá tơ-ƀrê tung rak ngăn dêi mâu tíu pêi cheăng, kơvâ cheăng, khu râ pơkuâ. Môi tiah ôh tá môi tuăn, ôh tá vâ hmâng dêi rơpó tung tơdroăng veăng hnê tối ‘na séa mơnhên ngăn chiâng pro tơdjâk troh ki tơ-ƀrê, hâi khế mơjiâng pro dêi mâu tơdroăng tơkêa ‘no liăn cheăng; Mâu kong pơlê hâi pơtối rak vế dêi hnoăng cheăng pêi tơná tung séa ngăn, tối ăm ‘nâ ‘na tơdroăng mơjiâng pro vâ teăm ‘nâi hlê, teăng tah ki lâi xơpá tơvâ tơvân ki lâi oh tá tro mơhno tối ăm khu mơjiâng pro; Ôh tá vâ tơrŭm séa ngăn nhên tung tơdroăng lăm ngăn khu ki mơjiâng tơdroăng tơkêa pro. Tối tơdroăng ki pá dêi kong pơlê tung tơ’mot khu ‘no liăn cheăng mơjiâng tơmeăm khoăng, pôa Dương Văn Trang, Ngế cheăng tung Tíu xiâm Đảng, Kăn hnê ngăn Đảng kong pơlê, Kăn hnê ngăn Hô̆i đong kong pơlê Kon Tum tơmâng khât troh tơdroăng hnoăng cheăng dêi mơngế ki pơkuâ hnê mơhno ƀă tơdroăng ki thế pơ’lêh tơdrêng:  

“Pin tối tơchoâm tung mê ai môi, péa pái ngế cho pêi cheăng hâi pêi tâi ivá, hâi rơkê ƀeăn, hâi mơ-eăm xua tơdroăng cheăng tơchoâm dêi kong pơlê, xua ki tơchoâm dêi kuăn pơlê. Tung pơkâ tối ‘na kơlo ivá tơbriât cheăng ai môi tơdroăng pơkâ ki rơkê ƀeăn dêi kăn pơkuâ. Mê kong pơlê xuân cho kăn hnê mơhno la Khu xiâm dêi kong pơlê xuân pơkuâ hnê mơhno. ‘Na pin vâi lăm pôu trâm pin, ôh tá ai tơdroăng ti loi tơngah, ôh tá kal. Khu mơdró vâi tối ôh tá kal ôh lôi, mê xuân ối kơtiê troh ta  ah ‘na cheăng kâ rêh ối ki ôh tá kâi mơnhông tơ-brê’’.

Pêt ƀă pro pơkeăng môi tung mâu hnoăng cheăng pêi dêi kong pơlê Kon Tum krếo tăng khu ‘no liăn cheăng

Tơdrêng ƀă tơdroăng ‘nâi nhên tíu ki pá ối tơvâ tơvân, khŏm mơ-eăm mơjiâng môi tơdroăng ‘no liăn cheăng pêi lĕm tơdrăng, tơ’lêi hlâu ƀă rơkê ƀeăn vâ tơ’mot khu ‘no liăn cheăng mơjiâng tơmeăm khoăng, môi tơdroăng nếo xuân dế châ kong pơlê Kon Tum pơkâ kơtăng pêi pro, mê cho séa ngăn, khŏm tah lôi mâu khu ‘no liăn cheăng pêi ôh tá rơkê, ki ‘no liăn cheăng tiô túa vâ tăng pro pơxúa ăm to krê tơná tê.

Khoa Điềm chêh

Gương tơplôu ƀă tơbleăng