VOV4.Sêdang - A kong pơlê Kon Tum, tơdroăng tŏng kum ăm mơngế pêi cheăng, khu cheăng xúa mơngế pêi cheăng tro tơdjâk xua pơreăng COVID-19 tiô hnê mơhno dêi Chin phuh dế pơtối châ pêi pro thâ ƀă tơniăn tro mơngế châ kum. Pêi pro Pơkâ 68 ƀă Pơkâ 23 dêi Chin phuh ‘na mâu troăng hơlâ tŏng kum mơngế pêi cheăng ƀă mơngế xúa mơngế pêi cheăng trâm pá xua pơreăng kân COVID-19, troh nôkố vâ chê 880 khu tê mơdró ƀă lối 16.000 ngế pêi cheăng a kong pơlê Kon Tum hiăng châ tŏng kum ƀă tâi tâng kơxô̆ liăn lối 5,2 rơtal liăn.

Tíu ki xúa mơngế pêi cheăng lăm kĭ inâi

Rơtế ƀă tơdroăng tŏng kum mơngế pêi cheăng tiô pơkâ 68 ƀă Pơkâ 23, pêi pro Pơkâ 116 dêi Chin phuh, kong pơlê Kon Tum ai lối 17.000 ngế pêi cheăng dế veăng rôe Ƀaoh hiêm ôh tá ai cheăng pêi châ tŏng kum kơlo iâ má môi cho 1,8 rơtuh liăn ƀă hên má môi cho 3,3 rơtuh liăn/môi ngế. Troh tung dế khế 10 pơla kố nah, hiăng ai lối 1.800 ngế pêi cheăng dêi kong pơlê châ tơdah tŏng kum vâ chê 4,6 rơtal liăn ing Kơxô̆ liăn ƀaoh hiêm ôh tá ai cheăng pêi.

            A Sa Ly tơplôu ƀă tơbleăng