VOV4.Sêdang -  Pơtối roh hôp má 3, kơxo lơ 18/8, Vi [an pơkuâ Kuo#k ho#i tơpui ‘na kơxop mơ-éa Luât chêh pro hlá mơ-éa tơnêi têa. Kố cho kơxop mơ-éa luât ki apoăng sap ing nah troh nôkố, xua môi khu ngế kăn tơbleăng Kuo#k ho#i tơpui mơ’no.

Mâu tơdroăng tơpui tơno kheăn kơdeăn ki kal [a\ tơdroăng mơ-eăm dêi Trần Trị Quốc Khánh, kăn teăng mâ Kuo#k ho#i pơlê kong kân Hà Nội – Ngế pơkuâ rah chêh tối, kố cho kơxop mơ-éa luât ki pá, tơdjâk kân rơdâ, tơdjâk tâi tâng tơdroăng pro hlá mơ-éa dêi tơnêi têa.

Laga, hên mâu kăn tối, xiâm kối ki kal tơbleăng pêi pro luât tá hâi châ mơhnhôk khât. Xua mê, kal tơmiât nhên vâ ví môi tiah ‘na tơdroăng xiâm [a\ tơdroăng ki pơkuâ [a\ mâu hlá mơ-éa luât nôkố.

A Sa Ly tơplôu [ă tơbleăng