VOV4.Sêdang - Kơxo lơ 20/10, a pơlê kong kơdrâm Đà Lạt, Khu râ kăn teăng mâ Kuô̆k hô̆i kong pơlê Lâm Đồng hiăng veăng pơxiâm po hneăng hôp má 2, Kuô̆k hô̆i hneăng má XV ƀă troăng mơ’no tơdrêng tung um tiô troăng măng. Rơtế ƀă mâu tơdroăng tơdjuôm dêi lâp tơnêi têa, mâu kăn teăng mâ kong pơlê Lâm Đồng hiăng hbrâ vâ pơtroh mâu tơdroăng tơpui tối, pâ thế dêi kuăn pơlê tung kong pơlê ‘na mâu tơdroăng ki nếo chiâng, pá puât kal châ Kuô̆k hô̆i, Chin phuh tơmâng tŏng kum, tơpui tơno troăng vâ teăm ‘mâi rơnêu tơdrêng ƀă tơleăng tung la ngiâ.

Lâm Đồng: Kal ai troăng hơlâ tŏng kum vâ mơnhông ôm hyô tung tơdroăng tiah hmâ nếo

Pôa Nguyễn Tạo, Kăn phŏ pơkuâ Khu râ kăn Kuô̆k hô̆i kong pơlê Lâm Đồng tối ăm ‘nâi, pơreăng COVID-19 hiăng tơdjâk kân troh 2 kơvâ cheăng kâ ki xiâm dêi kong pơlê cho pêi chiâk deăng ƀă ôm hyô. Tung mê, tơdroăng pro tơniăn pêi kâ, tơniăn tíu tê ăm mâu tơmeăm pêi lo ing chiâk deăng, ki má lối cho mâu tơmeăm kơchâi drêh – reăng dế châ kơvâ pêi chiâk deăng kong pơlê chôa ‘lâng pêi, tơkŭm po mơjiâng pro kế tơmeăm khoăng, pêi pêt tơmeăm khoăng môi tiah lâi ăm tơtro, tơxâng tiô tơdroăng kal vâ dêi kơchơ tê mơdró tung tơdroăng rêh ối tiah hmâ nếo.

A Sa Ly tơplôu ƀă tơbleăng