Hneăng hôp thiăng tơ’mot hên krâm mâu ngế ki hmâ cheăng rơkê, mâu ki rơkê, mâu ngế Việt Nam  hriâm rơkê mâ môi dêi Rusi ƀă mâu vâi pú sinh viên Rusi ki vâ ‘na túa lěm tro Việt Nam. Hneăng hôp klâ pro 3 rôh, ƀă ai 14 tơdroăng tơpui tơbleăng, Tá tơdroăng pro mơhno tơdrêng ƀă tá tơdroăng ‘no tung hyôh rơ’jíu. Mâu ki cheăng rơkê, mâu ngế rơkê tơpui tơno ‘na văn hok, tơdroăng ton tĭn nah, tơdroăng nâl tơpui, tơdroăng chiâ xo tơmeăm ton nah tung kơdâm tơnêi, tơdroăng loi tĭng, tiô khôp Việt Nam.

Rơtâ tá hneăng hôp tơpui ‘na mơhno túa lěm tro ton nah Việt Nam a Rusi

A hneăng hôp tơpui tơno, Yăo sư , Tiê̆n sih khoa hok Vladimir Mazyrin, Ngế pơkuâ Tíu xiâm tí tăng ‘nâi plĕng dêi Việt Nam ƀă ASEAN ăm ‘nâi, hneăng hôp tơpui tơno hiăng tơ’mot krâm mâu ngế rơkê ƀă mâu ngế xiâm ki rơhêng vâ ‘nâi plĕng ‘na túa lěm tro Việt Nam veăng hôp. Yăo sư Mazyrin tối, hôp tơpui tơno hiăng kum hên ngế Rusi hlê tâ ‘na khôi túa, vêa vong  ki lěm ton nah , ‘na tơnêi têa ƀă kuăn mơngế Việt Nam.