Rơpŏng hngêi jâ Liêng Hot Ka Hiên (kuăn ngo K’Ho kơvâ Cil) ối a thôn Srê Đăng, cheăm Tân Hội, kong pơlê Lâm Đồng hmâ pro kơƀăn tiô chal krâ nah, tung mê kơ ƀăn alâi hiăng châ ai “inâi” vâi ô eăng tung kơpong. Drêng jâ Liêng Hot Ka Hiên hiăng krâ, hiăng hnê ăm dêi mâu nâ o, kuăn cháu tung rơpŏng hngêi, mê kô tối cho kế kâ “kơƀăn alâi  ki pơtối dêi hdrông hdrê”.

Jâ Liêng Hot Zi Jăk krếo jâ Liêng Hot Ka Hiên cho xăng. Drêng  hiăng klêi hriâm trung cấp Dược, nâ dâi tơdroăng tơná hlê drêng dế hriâm nah vâ pro “ kơƀăn alâi ki pơtối dêi hdrông hdrê” dêi rơpŏng hngêi ai tơ’nôm trếo kơ hiâm, Nâ Liêng Hót Zi Jăk, ăm ‘nâi:

“Kơƀăn alâi kâ hơ-iâ, krúa, ngeăm, lĕm lơ ôh gá ngăn to a hdrê alâi. Kơƀăn kâ ngeăm cho kơƀăn ki pro ing hdrê alâi tơxông dêi kuăn ngo tơná pin pêt dêi. Ƀă alâi ki vâi xo pro kơƀăn ôh tá chiâng xo alâi ki hiăng krâ luâ râ lơ kơbâng luâ râ. Alâi ki krâ lơ ôh, rơpâ tơmuăn lĕm ngeăm krâ kơ vâ mê drêng pro kơƀăn kô ôh ta peâk  tâng kâ ôh tá rơmuăn”.

Mơngế K’Ho nôkố hmâ xo hdrê alâi tơxông ki bông vâ pro kơƀăn. Hdrê alâi ki rơpâ, ngeăm, pêt ai châ, hlối châ xo hên há ƀă hâi khế pêt ôh tá ton rĕng châ đôu hdrối tâ hdrê alâi trĭng. Tiô hmâ pêi dêi kuăn pơlê, mâu alâi ki hiăng rĕng krâ mê thế rĕng đôu a kơxo má vâ alâi ối ngeăm lĕm kâ. Alâi klêi đôu thế âp tơdrêng, lơ pro kơbăn hlối vâ rak ki ngeăm, xú lĕm dêi alâi. Kơtôu alâi xuân chiâng vâ kơxu kơƀăn. Nâ Liêng Hót Zi Jăk tối tơ’nôm:

“Klêi đôu alâi djâ troh a hngêi, thế lêa tah kơtôu, klêi mê chiê tơrêm hnông, klêi mê tâ tung kơmăi uâ, râm iâ xik ƀă têa tôu ro. Tâng râm hên xik lơ râm hên têa tôu kô hía ki kơhiâm lĕm dêi alâi. Klêi mê kô xo kơtôu alâi vâ kơxuô kơƀăn klêi mê hơ-oh dâng 2 chôu alâi hiăng chên”.

Kơƀăn alâi tơ’lêi pro, vâ tối a pơlê, vâi kơdrâi, vâi droh K’Ho ngế ki lâi xuân chiâng pro kơƀăn alâi ki hơ-oh. Xua tơvâ hên tơdroăng cheăng, tâng vâ pro iâ kơƀăn alâi rêm hâi, mê hên ngế ôh tá vâ pro xêh vâi lăm rôe. Ing mê, kơ ƀăn alâi chiâng tơmeăm ki hên ngế vâ rôe, kơƀăn kâ mê ôh tá xê tê ăm to mâu kuăn pơlê amê rôe, mê ối châ tê tung măng pơlê pơla. Nâ Liêng Hot Rebeca cho kuăn kơdrâi rơmúa dêi jâ Liêng Hót K’Hiên tối, pakĭng chôu hnê hriâm a hngêi trung, nâ xuân ối pơtối pêi cheăng pro “kơƀăn alâi ki pơtối dêi hdrông hdrê” rơpŏng hngêi.

“Á cho môi ngế cô, iâ toh chôu, la á xuân mơdoh chôu vâ pro kơƀăn. Ki hdrối cho vâ pơ’lêh tơdroăng kâ ăm rơpŏng hngêi, klêi mê pro kơƀăn tê ăm mâu vâi krâ nhŏng o tung pơlê hlối châ xo tơ’mot liăn ăm dêi rơpŏng hngêi. Tơdroăng ki kal má môi,  ngin cho rơxông kuăn cháu thế ‘nâi rak vế ƀă pơtối rak tơdroăng kơƀăn alâi ki pơtối dêi hdrông hdrê, dêi hdroâng kuăn ngo tơná ‘’.

Nâ Lơ Mu Liviơ cho môi ngế ki hmâ rôe kơƀăn dêi rơpŏng hngêi jâ Liêng Hót Ka Hiên tối:

“Kơƀăn alâi cho kế kâ ki hmâ dêi kuăn ngo ngin, ngế ki lâi xuân ‘nâi pro. La pro kơƀăn alâi hơ-oh ƀă tê a pơlê  kố bú ai to rơpŏng nâ Rebeca tê pro. Rơpŏng hngêi nâ pro kơƀăn kâ kơhiâm lĕm, pêi krúa, á hlo phiu ro xua tung pơlê ai rơpŏng ki pơtối pro kơƀăn pơtối dêi hdrông hdrê vâ tơdroăng pro kơƀăn mê ôh tá piu mê xuân ối pro pơxúa châ tơ’mot liăn mơnhông tơdroăng rêh ối ăm rơpŏng hngêi. Á mơnê ai mơngế K’Ho ki rơkê ƀă ‘nâi hriăn pro kơƀăn xuân ‘nâi pơtối rak túa pêi cheăng lĕm tro dêi kuăn ngo tơná, tung  mâu tơdroăng cheăng pro kơƀăn”. 

Kơƀăn alâi hơ-oh dêi rơpŏng hngêi jâ Liêng Hót K’Hiên pro hiăng tê ăm tơmối a lâp kơpong dêi kong pơlê Lâm Đồng. Pakĭng mê, kơƀăn alâi xuân ối tê ăm mâu ngế vâ rôe a kong pơlê ki ê. Rêm rôh rơpŏng hngêi pro lối 200 kơxu kơƀăn, môi kơxu kơnâ 20 rơpâu liăn... Kố cho kơxô̆ liăn pêi lo hâi teăm hên la xuân kum ăm rơpŏng hngêi jâ ai tơ’nôm kơxô̆ liăn vâ pơtối pro “kơƀăn alâi ki pơtối dêi hdrông hdrê” dêi rơpŏng hngêi tơná.