Kơmăng lơ 23/10, pôa Nguyễn Xuân Thắng, Kăn cheăng tung Khu xiâm kal kí, Kăn pơkuâ Hok viê̆n kal kí tơnêi têa Hồ Chí Minh veăng Leh diâp ri Roh tơ’noăng chêh tơdroăng kal kí pơlê pơla ‘na gâk kring troăng tơmiât dêi Đảng, tơplâ mơdât mâu troăng tơmiât ôh tá tro, hêng hôu ôh tá lĕm ƀă dêi pó roh má 2, hơnăm 2022. Roh tơ’noăng hiăng châ tơdah 116 rơpâu ƀai tơ’noăng.

Khu tơkŭm po hiăng rah xo diâp 12 pri A; 20 pri B; 30 pri C; 40 pri mơhnhôk; 20 ngế chêh/khu chêh cho đoân viên, droh rơtăm ai ƀai chêh ki hôm châ diâp pri ki tơngah ƀă 15 pri khu pú hên ki rơkê má môi ăm mâu kơ koan, tíu cheăng, kong pơlê mơhnhôk roh tơ’noăng trâu hơngế ƀă hên ƀai chêh ki hôm.

Leh diâp pri khu pú hên ki rơkê

Xông tơpui a Leh diâp ri, pôa Nguyễn Xuân Thắng tối rơdêi, mơgêi tơdroăng gâk kring xiâm kối troăng tơmiât dêi Đảng, tơplâ mơdât mâu tơdroăng tơmiât pêi ôh tá tro hêng hôu ôh tá lĕm ƀă dêi pó tung pơla kố nah, pơkâ troăng prôk la ngiâ, troăng pêi tro tơdroăng vâ mơdêk châ tơƀrê pêi pro hnoăng cheăng kal kí ki kal kố tung la ngiâ’’.