Po tung pơla 4 hâi, sap hâi kố troh lơ 31/3 a Tíu ôm hyô Văn Thánh, po tíu xah hên tíu tơhrâ troh mơhno túa lĕm tro pế pơchên kế kâ ki ôh tá păng lôi vâ ăm tơmối tung tơnêi têa pin ƀă kong têa ê ki troh ôm hyô a kố mơnúa kâ rơtế ƀă mơngế Xuăn ki rêh ối a mâu kong têa tung lâp plâi tơnêi.

Hơnăm kố, Mơdĭng tơbleăng ăm kuăn pơlê ngăn lối 400 kơchâi kế kâ, têa ôu lĕm phá xêh dêi 3 kơpong peăng Kơnhŏng, Tơdế, peăng Hdroh tơnêi têa. Akố, mâu kơchâi kâ pế ing mâu mâm peâp pế ƀă têa plâi rơ-âu, goih xi xŏng nhâ krái têa kơxĭ, reăng nhâ krái điên điển, xup chah Hà Nội, chah ká pôh, kloăng plâi hrế cao Cao Bằng,… Troh kâ kơchâi ki pế pơchên tiah ăm pơtáu kâ tâ kơhiâm tiô túa râm dêi kơpong Tơdế tơnêi têa châ mâu ngế rơkê ‘na kế kâ, mâu ngế ki pê rơkê hriăn pế, vâ têk ăm tơmối kâ.

Akố, tơmối ối châ kâ, ngăn tơdroăng po tơbleăng, veăng xah hêi tiô chal krâ nah mê cho kât mâ pâm hdro tơnêi, tơ’noăng pế hmê tê kơtê, hếo kông loăng ƀă ki ê.