Hâi lơ 30/8, cheăm Vân Hòa, kong pơlê Dak Lak, tơkŭm po tơdah xo inâi loăng Kơnía Việt Nam ƀă 1 to loăng Cộng (ối khê̆n cho loăng Sui) ƀă 3 to loăng Đỏ (ối khĕn cho loăng Plâi Hjê khêi), nếo châ Khu Rak vế Kong kế ƀă Hyôh kong prâi Việt Nam mơnhên. 3 to loăng kơnía kố ai nôkố hiăng lối 200 hơnăm ƀă loăng Cộng hiăng lối 350 hơnăm. Loăng kơnía hiăng gum ăm kuăn pơlê lối hrĭng tơdroăng ki ro, ƀă loăng Cộng hiăng gum ăm kuăn pơlê xo chhá vâ pik a rang mơnĕng sap ing mâu hâi ki apoăng mâu rơxông ton nah po pông tơnêi, lăm lúa kuăn kiâ kong, plâ xâ vâ hdi xo tơnêi têa.

Sap ing ton nah, mâu loăng ki Kơnía kố hiăng cho mâu ngế ki châ hlo, cho túa lĕm tro dêi kơpong tơnêi ƀă cho tơdroăng hâk tơngăm dêi kuăn pơlê akố. Ngoh Lê Quốc Nam, cheăm Vân Hòa, kong pơlê Dak Lak hâk tơngăm:

"Loăng Cộng kố mê gá hiăng tơkâ luâ to lâi chât hơnăm trâm hên tơdroăng ki pá puât, mâu tơdroăng ki kong tôu mơdrăng, kong mê khía têa lân lu la xuân ối krá kâk, khên tơnôu ối a mê. Xua mê loăng Cộng kố ƀă vâi krâ nhŏng o xuân cho tơdroăng ki loi tơngah kân. Ƀă gá xuân mơhno môi tiah tơdroăng ki lĕm tro dêi kuăn mơngế a kố”.

Rơtế ƀă tơdroăng ki tơdah xo inâi loăng Kơnía, cheăm Vân Hòa tơkŭm po hên rôh po kơchơ Đồn a xiâm loăng Cộng. Kố cho kơchơ ki hiăng ai sap ing lối hrĭng hơnăm hdrối a troăng prôk kơnía tơdjêp sap ing têa kơxĭ troh a ngo. Tơdrêng amê hlối pơkâ mơdêk mâu tơdroăng mơđah tơbleăng, tơdjêp khu mơdró kâ ‘no liăn cheăng ƀă khu pêi cheăng tơrŭm a kơpong tơnêi Vân Hòa; pơkâ mơdêk mâu tơdroăng ôm hyô kong kế nhâ loăng tro ƀă lăm tăng ngăn mâu kơdrum Đỏ - túa loăng ki xiâm dêi kơpong tơnêi kố.

Pôa Phạm Quốc Hoàng, Kăn phŏ hnê ngăn Vi ƀan cheăm Vân Hòa ăm 'nâi, hlê plĕng nhên ki kơnâ, hnoăng cheăng dêi loăng kơnía, khu kăn pơkuâ rơtế ƀă kuăn pơlê xuân tơmâng khât troh tơdroăng rak vế ƀă mơnhông ki kơnâ mâu loăng ton hơnăm:

"Ngin dế ai túa pơkâ cho kô séa ngăn nếo mâu loăng ki kố ƀă kô krếo mâu khu ki rơkê plĕng tung kơvâ ngăn 'na loăng pơlái kong kế troh vâ tơkŭm po hnê mơhno, tŏng kum kih thuât rak ngăn, rak vế loăng Đỏ ƀă loăng Cộng kố vâ gá xông kân lĕm tâ ƀă kuăn pơlê chiâng vâ xúa ôm hyô châ tơ-ƀrê tâ nếo”.

Nôkố a peăng mâ hâi Lo kong pơlê Dak Lak ai 25 to loăng ki kơnía châ mơnhên. Pakĭng loăng Cộng ƀă 3 loăng Đỏ ki tối a kơpêng mê âi, ối ai khu 20 to loăng plâi nong ton hơnăm a Tíu tơbâ ton nah mơhno túa lĕm tro Tơnêi têa hngêi chuô Từ Quang, cheăm Tuy An Bắc ƀă 1 to loăng Bồ Đề lối 200 hơnăm a tíu tơbâ Tơnêi têa Tíu xối pleăng Inâi Lương Văn Chánh.

Pôa Nguyễn Thành Sơn, Phŏ pơkuâ Ƀơrô cheăng Mơhno túa lĕm tro - Pơlê pơla, cheăm Phú Hòa 2, kong pơlê Dak Lak ăm ‘nâi, mâu rơpŏng hngêi, mâu pơlê pơla ai loăng kơnía pơrá pôu râng dêi hnoăng, tơdjuôm ivá rak vế ki kơnía “ăm gá krúa lĕm” kố.

"Rêm hơnăm mê ngin veăng rơtế mơhnhôk rơpŏng hngêi, hdrông hdrê mê nếo hlối mơhnhôk tá kuăn pơlê, malối cho hdrối vâ mot tung rơnó mê hngê mê ngin athế poê tah mâu tơkâng loăng, mơgrúa lĕm vâ pôi tá ai loăng tro tơđôu kơtong tung rơnó mê hngê”.

Hrĭng hơnăm hiăng hluâ, mâu loăng ki kân - loăng ki kơnía xuân ối krá tơniăn tăng môi tíu, pơtối xông kân, ối tâng môi tiah ngế ki châ hlo dêi môi kơpong tơnêi, mot tung tuăn ngôa dêi hên rơxông. Tơdroăng rak vế loăng ki kơnía Việt Nam ôh tá xê to ai pơxúa 'na kong prâi, nhâ loăng, mê ối cho tơdroăng ki hâk tơngăm ƀă tơdroăng ton nah, tơdroăng pâ mơnê ƀă mơngế ton nah hiăng ai hnoăng po văng, pêt mơjiâng tơmeăm khoăng, chôu 'măn ăm hâi kố ƀă la xo ah hmôi.