Ƀă idrâp hơdruê eirei ki hleăng lĕm, mơngối ton, jâ H’Ƀliư̆ Hwing ôh ta xê to bâ eăng tung rêm hneăng xah ôm hêi, mê ối pro phoih ro-rêk tung hiâm mơno kuăn mơngế tung mâu khế ki khéa hơ’nêng. Idrâp eirei jâ ga cho ƀă i hiâm mơno: ing tơdroăng ki mơjo pâ kơ mơngế hiăng hlâ, troh a tơdroăng ki hâk git hiâm mơno mơjo pâ pơla on veăng, klêi mê, troh a hiâm mơno pói rơhêng vâ mơjiâng pơlê cheăm kro mơdrŏng, lĕm krip. Jâ H’Ƀliư̆ Hwing ai tối tiah kố:

“Sap ing chal vâi krâ roh nah, nôu pâ, jâ pôa hiăng rak vế ƀă hnê ‘chôu ‘măn ăm tơdrá eirei, tơdrá kưt- mâu khôi tơlá ki lĕm ro ƀă kơnía git dêi kuăn ngo. Pin kal athế mơnê nhoăm ƀă pơtối rak vế mâu tơmeăm khoăng ki kơnía ‘na i hiâm mơno ki mê, pôi tá lôi piu mâu túa tơlá ki hiăng châ pâ pôa pin chôu ‘măn ăm, hnê tối ăm môi tiah hơdruê eirei, hơdruê tơdrá kưt, hlŭm khiê̆n, đing tut ƀă hên mâu tơmeăm khoăng ki ê. Hơdruê eirei hmâ hơdruê tung mâu roh ki mơdâm kiâ, ‘mé kiâ, vâ koh pơ’lâng ƀă mơngế ki hiăng hlâ. Mâu tơdroăng ki pơto pơtih tung hơdruê tơdrá eirei mê cho hơ’muăn tối tơdroăng rêh ối, pêi cheăng dêi ngế ki hiăng hlâ hdrối nah, mơhno tối i hiâm mơno mơjo sĭng khéa kơ ngế ki hiăng kơtê i hiâm. Idrâp, nâl hơdruê mê vâi hmâ hơdruê ing kơmăng tá troh a kơxo gâ, ôh tá xê to vâ tơbâ tối, mê ối vâ tơpui tối mâu tơdroăng ki lĕm tro ‘na pú hmâ, ‘na tơdroăng mơjo pâ, ‘na pơlê pơla, ƀă hiâm mơno vâ mơjiâng pơlê cheăm rế hiá rế phâi tơtôu, kro mơdrŏng”.

Tơdroăng ki hâk git kơ hơdruê hiăng mot khâp tung hiâm mơno dêi jâ H’Bliư̆ Hwing, ƀă tơkâ luâ hên tơdroăng xahpá, tơdroăng niân, tơdroăng ro, tơdroăng khéa dêi rêh kâ ối, jâ hiăng rah xo, tơ’mot mâu chư, mâu nâl ki lĕm tro tơrêm tơdrá, rêm nâl hơdruê mê.

Tung mâu nâl ki pro tơcho, tơdjếi dêi jâ H’Ƀliư̆ Hwing cho vâ mơhno mâu tơdrá ki lĕm ro, rơmuăn lĕm, xuân ai drêng mơdêi, mơhno tơdroăng pói vâ dêi tơdroăng ki mơjo pâ dêi pó, tŭm têk, hên hĕng drêng eirei ‘na tơdroăng ki mơjo pâ dêi pó.

O H’Lana Hwing, 12 hơnăm, cho cháu kơdrâi dêi jâ H’Ƀliư̆ Hwing rơ-rêk tung i hiâm mơno ai tối: Rêm xoh jâ hơdruê eirei, pôa ối achê mê hlŭm khiê̆n đing năm. Idrâp chuât xơtó lâp hngêi trăng. Tâi tâng rơpŏng ngin ối tâ tá hvât vâ tơmâng tơdroăng hơdruê ƀă tơdrá chuât dêi khiê̆n mê. Rêm xoh tiah mê, á tâ tung i hiâm mơno hơniâp ro pá kâi tối. H’Lana tối ăm ngin ‘nâi, ing rêm roh tiah mê, hiăng păn roăng ăm hiâm mơno ga ai hiâm mơno mơjo pâ kơ tơdroăng hơdruê tiô khôi hmâ vâi krâ nah.

“Á kuăn rơhêng vâ tơmâng ‘nâng tơdroăng hơdruê eirei. Kố cho khôi túa, vêa vong ki tiô tơlá hmâ dêi mơngế Rơđế. La ngiâ ah, á kuăn kô mơhriâm hên tâ kơ mê nếo vâ hlê plĕng ƀă ‘nâi rak vế khôi túa, lĕm tro kố. Á kuăn ối brôk tơ’nôm mâu ngế pú hmâ rơtế hriâm ƀă dêi pó”.

Ngoh Y Rowel Hwing, kăn pơlê ƀuôn Tu, cheăm Ea Tul, kong pơlê Dak Lak tối ăm ngin ‘nâi, jâ H’Bliư̆ Hwing cho môi ngế ki djâ troăng ahdrối tung pơlê pơla ‘na tơdroăng hnê tối, rak vế khôi túa lĕm tro ‘na hơdruê eirei dêi mơngế Rơđế.

“Á Ƀuôn Tu kố, jâ H’Ƀliư̆ Hwing đi đo châ vâi krâ-nhŏng o hâk mơjo pâ xua jâ hơdrue eirei ro tơniâ ƀă mot khâp tung hiâm mơno. Jâ ôh tá xê to bu ai to rơkong, krôk ki ro tơniâ, mê ối cho ngế ki kơhnâ khât tung mâu tơdroăng cheăng túa lĕm tro dêi pơlê pơla ƀă cheăm bêng. Jâ đi đo hơdruê mê vâ mơhnhôk, tơbleăng ƀă tơdjêp pơla vâi krâ-nhŏng o tung rêm roh, rêm tơdroăng”.

Meluâ hơnăm hiăng hên, xâk hiăng pôk khom xua krâ, la tung ngiâ mâ dêi jâ H’Ƀliiư̆ Hwing xuân ối hâk git kơ túa lĕm tro tiô tơlá vâi krâ roh ton nah. Jâ đi đo tôu tuăn môi tơdroăng: pro ti lâi vâ tơdrá eirei ôh tá tro kâi piu tung pơla tơdroăng rêh ối pơhlêh tiô chal nếo nôkố, vâ kuăn cháu la ngiâ xuân ối châ tâng, châ hmâng, châ hơdruê ƀă hâk tơngăm dêi xiâm rêi vâi krâ tơná roh nah. Rêm xoh hơdruê, jâ ôh ta xê to vâ hơ’muăn tối môi tơdroăng, mê ối vâ rak vế tá hiâm mơno, ‘na tơdroăng rêh ối rêm rơxông mơngế Rơđế, tâi tâng mâu tơdroăng rêh ối, cheăng kâ kô châ tơmot ối tung idrâp hơdruê, idrâp khiê̆n đing năm mê.