A rôh pêi cheăng, pôa Đà Mỹ, Phŏ kăn hnê ngăn Vi ƀan kuăn pơlê kong pơlê Dak Lak tối nhên, klêi tơniăn tơkŭm po, kơvâ cheăng kal tơmâng hnê mơhno vâ pê klêi tơdroăng mơhnhôk Ôm hyô dêi kong pơlê. Thế riân tơmiêt nhên hdrối ăm tơtro, tơdâng kơxô̆ liăn, tơdroăng pêi pro rĕng xo pêi rôh ki tơ’lêi vâ tăng tơmeăm khoăng ai hlâu, ki rơdêi pơla 2 kơpong Peăng mâ hâi lo - peăng mâ Hâi Lu Dak Lak. Pakĭng tơkŭm po mâu hâi leh mê thế pro nếo tơdroăng mơjiâng  tơmeăm ôm hyô ki nếo vâ tơ’mot tơmối.

Kơxê lơ 10/7, Vi ƀan hnê ngăn kong pơlê Lâm Đồng hiăng ai rôh pêi cheăng ƀă Khu ngăn Túa lĕm tro, Tơ’noăng ivá ƀă Ôm hyô ‘na tơdroăng cheăng, tơbleăng pêi hnoăng cheăng klêi kơ’nâi ‘mot tơkŭm. Tơdroăng tơkŭm 3 tíu pêi cheăng Đà Lạt – Phan Thiết – Gia Nghĩa vâ mơnhông ôm hyô châ tơbleăng.

A rôh pêi cheăng, pôa Hồ Văn Mười, Kăn hnê ngăn Vi ƀan kong pơlê Lâm Đồng tối, Lâm Đồng ai tơnêi tơníu kân vâ mơnhông ‘na túa lĕm tro, tơ’noăng ivá ƀă ôm hyô. Tung mê Đà Lạt khĕn cho Lâm Đồng rơpâu hdrê reăng, Bình Thuận khĕn cho Lâm Đồng têa kơxĭ ngiât, Dak Nông khĕn cho Lâm Đồng tơnêi tơníu kong ngo. Tâi tâng mâu ki rơdêi, ki ai hlâu kân kố kal athế ai tơdroăng tơkŭm tơdâng, tro ƀă tơ’mô mê kơvâ ôm hyô dêi kong pơlê nếo mơnhông rơdêi ƀă krá tơniăn.