Kuăn pơlê Tây Nguyên tối tơdjuôm, mơngế M’nông tối krê, sap ing chal vâi krâ nah hiăng hlê plĕng tung tơdroăng “rơkê plĕng ing chiâk deăng”. Rêh ối  kơnôm to ing kong kế, xua mê, mơngế M’nông khoh ‘nâi veăng rak vế ngăn kong kế, malối, kong ilâng ki chiâng xêh tung kong. Rêm hdroh drêng muih treăm chiâk, vâi krâ-nhŏng o pơrá ‘nâi rak vế kong tâ tá, kuăn pơlê bu pêi kâ to drăng kơdró tơnêi ki tơná hiăng muih treăm mê tê.

A kơpong kong ki tâ tá chiâk deăng, vâi krâ đi đo rak vế, ôh tá ăm on châ chếo kâ tâ tá, mê vâi athế kơvê dêi chiâk deăng.

Mơngế M’nông hmâ loi dêi tiah kố, tâng pin mot ko ‘nhê hmâng to lo vâ tung kong, kô tro khu chêm, mâu kơnái kâ ‘nhê báu prá. Mơngế M’nông hmâ pơto pơtih dêi: “Kong cho hngêi ki kring vế, rak ngăn, kong xuân cho tíu ki rêh ối dêi khu xeăng ki mơngế M’nông vâ rơkâu xối pâ, kơnôm châ tơdroăng tŏng kum drêng trâm xahpá tung rêh ối”.

Jâ Nôu NJran, ối a cheăm Ea Huar, tơring Ƀuôn Đôn, kong pơlê Dak Lak tối ăm ‘nâi: mơngế M’nông đi đo rak vế tiô luât ki hiăng ai sap ing vâi krâ roh nah, rế muih treăm poh xá ki tơná hiăng hmâ pêi kâ mâu hơnăm hdrối mê hiá nah xuân rế vâ rak vế ngăn kơnhŏng têa. Mê cho hnoăng cheăng hmâ pêi pro sap ing chal vâi krâ roh ton nah, rêm poh xá chiâk deăng tơná ki hmâ pêi kâ mê ton ga ai 4 hơnăm, mê tơnêi kô ôh tá hơpok lĕm xếo. Drêng mê, tâng vâ hơ’lêh troh a poh ki ê nếo, mê mâu ngế tung rơpŏng hngêi kô athế tơno tơnêng nhên ƀă dêi pó.

“Dâng 4 hơnăm mê kô vêh muih treăm nếo a tơnêi poh ki ton vâ pêi kâ, ôh tá xê lo lăm ko muih a ƀăng kong ki ê. Kố cho khôi túa ki hiăng hmâ ai sap ing chal vâi krâ roh ton nah, xua mê, troh nôkố, vâi krâ xuân hmâ hnê tối, pêi pro tiah mê, troh a rơxông chal ngin nôkố, ngin xuân ối pêi pro môi tiah mê ƀă hnối hnê ăm dêi kuăn cháu, kal athế pơtối rak vế tơdroăng ki tro mê”.

Tiô tơdroăng ki rơkê plĕng dêi vâi krâ M’nông, tơdroăng ki tí tăng rah tơnêi vâ pêi kâ cho athế achê têa krông. Tơdroăng mê ti xê to vâ kum ăm mâu hdrê loăng ki pêt mê dâi lĕm, mê xuân ối cho tơ’lêi vâ ai têa pơchên kế kâ, hum rôh. Ing mê râ, mơngế M’nông khoh chiâng ai kơno têa. Kơno têa dêi mơngế M’nông xuân hmâ ai loăng kah kân, môi tiah tơdroăng ki ôh tá păng lôi dêi tơdroăng rêh kâ ối dêi mơngế M’nông.

Pôa Đen, krâ pơlê cheăm Ea Huar, tơring Ƀuôn Đôn, kong pơlê Dak Lak tối ăm ‘nâi: Kơno têa cho tíu ối dêi khu xeăng, xua mê, kal athế kring vế, rak ngăn, athế pêi pro tiô khôi hmâ dêi vâi krâ hiăng hnê djâ.

“Kơno têa cho xiâm kối dêi tơdroăng rêh kâ ối, tơdroăng pêi chiâk deăng, mâu drê, vok, mâu ‘nêk tâng vâ hĕn xuân kal athế ai têa vâ chuih ‘nôi. Sap ing nah troh nôkố, rak vế kơnhŏng têa, mê rơxông prôk hdrối đi đo hnê tơbâ dêi kuăn cháu tơná athế ’nâi rak vế ngăn kơnhŏng têa, athế ‘nâi rak vế ngăn kong, xua ai têa ƀă kong mê ga nếo ai tơdroăng rêh ối kuăn mơngế”.

Rơtế ƀă tơdroăng ki mơnhông mơdêk dêi rêh ối, pêi cheăng kâ, khôi túa, vêa vong dêi hdroâng M’nông hiăng rế hiá rế hơ’lêh hên. Mâu tơdroăng ki hlê plĕng tung tơdroăng kring vế khôi túa dêi hdroâng M’nông, mâu khôi túa mê xuân athế đi đo châ rak vế nhên khât, ai mâu tơdroăng ki ai tơdjâk troh tơdroăng kring vế, rak ngăn kong kế, ngo ngối, klêi kơ’nâi 1 rơnó chiâk deăng dêi pơlê pơla kô tơkŭm po mâu hâi mơdĭng xah hêi, môi tiah Tĭng xối kơno têa, Tĭng rơkâu rơnó chối báu, Tĭng kâ báu nếo ƀă hên hĕng mâu tơdroăng ki ê.

Ing mê, chal vâi krâ roh nah hiăng hmâ hnê tối ‘na khôi túa, vêa vong vâ uăn pât ƀă hnê mơhno ăm chal nếo pơtối rak vế hnoăng kring vế, rak ngăn kong lĕm tro tâ.