VOV4.Sêdang - Klêi kơ’nâi Chin phuh ai pơkâ kơxô̆ 128 ‘na tơdroăng vâ hmâ ƀă tơniăn, rơkê, séa ngăn tơƀrê pơreăng COVID-19, hên khu mơdró kâ a mâu kong pơlê peăng hdroh hiăng vêh pêi cheăng nếo mê mâu ngế pêi cheăng a mâu kong pơlê Tây Nguyên xuân pơxiâm vêh lăm pêi cheăng nếo. A troăng kân 14, mâu hâi achê kố ai hên khu rơxế hon đa tơdjêp dêi rơpó lăm a mâu kong pơlê peăng Hdroh, mâu ngế pêi cheăng hiăng vêh pêi cheăng nếo ƀă tơdroăng loi tơngah drêng mâu tơdroăng ki ối tô tuăn, hiăng châ khu mơdró kâ tơhrâ pơkâ tơleăng.

Mơngế pêi cheăng a Tây Nguyên vêh a mâu kong pơlê peăng Hdroh lăm pêi cheăng

Drêng pơreăng tâ tú rơ-iô, khu mơdró kâ klĭng péa, mâu ngế pêi cheăng a Tây Nguyên hiăng djâ vêh sap ing mâu kong pơlê peăng Hdroh vâ ví pơreăng. La drêng Chin phuh ai tơdroăng pơkâ vâ hmâ ƀă tơniăn, rơkê, kâi hbrâ mơdât pơreăng COVID-19, hên khu mơdró kâ hiăng vêh lôu péa nếo mê mâu ngế pêi cheăng a mâu kong pơlê Tây Nguyên xuân hbrâ rơnáu vâ vêh pêi cheăng. Ki khât gá, rêm hâi hiăng ai vâ chê 1 rơpâu ngế pêi cheăng vâ lăm troh a mâu kong pơlê peăng Hdroh. Kố cho tơdroăng ki phiu ro vâ ‘mâi mơnhông cheăng kâ a kơpong cheăng kâ peăng hdroh klêi kơ’nâi ai pơreăng.

Katarina Nga tơplôu ƀă tơbleăng