VOV4.Sêdang - Pôa Phạm Minh Chính, Ngế pro xiâm hnê ngăn tơnêi têa, Ngế pơkuâ hnê mơhno Tơnêi têa ‘na tơdroăng hbrâ mơdât pơreăng COVID-19 hiăng pêi cheăng hôp mơno tơdrêng tung um tiô troăng hyôh internet ƀă Khu hnê mơhno pái to kong pơlê Phú Thọ, Sóc Trăng, Cà Mau. Rôh pêi cheăng mê vâ séa ngăn, hnê tối tơdroăng hbrâ mơdât pơreăng, hlối tơmâng mâu tơdroăng veăng hnê tối,  tiâ tối ing mâu kong pơlê ‘na tơdroăng pơkâ pơtân ki hmâ tơniăn, pêi ƀĕng ƀeăn, séa  ngăn mơdât tơ-ƀrê pơreăng.

Tơpui a hâi pêi cheăng, pôa Phạm Minh Chính, Ngế pro xiâm hnê ngăn tơnêi têa pơkâ thế mâu kong pơlê Phú Thọ, Sóc Trăng, Cà Mau rĕng séa ngăn mâu tôh hbrâ mơdât tâ tú pơreăng, mơ-eăm tăng ngăn châ ‘nâi mâu tơdroăng pêi pro hiăng hnê mơhno môi tuăn ing tíu xiâm ƀă 2 tơdroăng ki kal. Ngế pro xiâm hnê ngăn tơnêi têa tối nhên, drêng pêi pro, hmâ tơniăn, ƀeăn rơkê, séa ngăn mơdât pơreăng xuân thế pêi pro tro tiô pơkâ “5k+ vaccine+pơlât+ kơmăi kơmok ƀă mơdêk hlê plĕng dêi kuăn pơlê”.

Ngế pro xiâm hnê ngăn tơnêi têa xuân thế mâu kong pơlê kal pơtối tơrŭm krá tơ-ƀrê tâ nếo tung chơ tơdah mâu ngế ing kong pơlê kố troh kong pơlê ki ê vâ tơniăn mâu pơkâ khăm pơlât tơniăn ƀă rêh ối ăm kuăn pơlê.

Gương tơplôu ƀă tơbleăng