Tơdroăng diâp 100.000 xiâm hdrê loăng hngó hdrê châ Khoa Thanh nhak – Hok viê̆n Âm nhak Kuô̆k ya Việt Nam ƀă Vi ƀan tơring Tu Mrông, kong pơlê Kon Tum tơkŭm po a thôn Mô Pah, cheăm Đăk Hà. Kơxô̆ loăng hngó hdrê kố châ diâp 200 rơpŏng kuăn pơlê Rơteăng ối tung rơpŏng kơtiê dêi 4 cheăm: Măng Ri, Tê Xăng, Đăk Hà ƀă Tu Mrông dêi tơring Tu Mrông.

Xua dế cho rơnó khăng khoăng angiâ khu mơdâ hdrê kô tơniăn tơdroăng rak ngăn tâi tâng kơxô̆ loăng hngó kố, troh rơnó mêi kô pơcháu vâ mâu rơpŏng kuăn pơlê pêt tung ƀăng deăng ngo ngối ki ôh tá ai loăng. Roh kố, Khu pơkuâ kong tât khía Tu Mrông ƀă mâu rơpŏng a cheăm Đăk Hà xuân diâp tơring Tu Mrông 21.000 xiâm loăng hngó vâ pêt a Tíu xiâm tơring ƀă drô mâu troăng a cheăm, tung thôn klăng hâi Kong prâi lâp plâi tơnêi hơnăm 2024.