Roh hôp cho vâ mơgêi séa mơnhên ngăn mâu hnoăng ki rơkê tung hriăn plĕng, xúa tơdroăng cheăng khoa hok ƀă kŏng ngê̆ tung kơvâ pêi chiâk pêi deăng tiô kŏng ngê̆ ki rơkê; kŏng ngê̆ sinh hok kum ăm tơdroăng thăm mơdâ hdrê loăng, mơnăn păn ƀă rak vế ngăn, mơjiâng pro mâu hdrê loăng (loăng pơkeăng, loăng plâi kâ, báu, ailâi, plâi pôm); kơxêt pơkeăng ƀă kơxêt kâ dêi mâu kong pơlê kơpong Tây Nguyên; Ƀai mơhhriâm ‘na mơnhông pêi chiâk deăng, kŏng ngê̆ xiâm, kŏng ngê̆ sinh hok dêi Pơlê kong kân Hồ Chí Minh.

Ai 14 ƀai pơchuât ki rơkê dêi mâu ngế ki hriăn plĕng, khu pơkuâ ngăn rơtế ai tơpui tối a Roh hôp mê ăm hlo, kơpong Tây Nguyên ai tơnêi tíu kân rơdâ má 3 tung lâp tơnêi têa ƀă ó rơdêi vâ mơnhông pêi chiâk deăng. Ki nhên ga, ƀă tơdroăng ki tơ’lêi dêi ing hyôh kong prâi, tơnêi tíu, mê mâu kong pơlê kơpong Tây Nguyên hiăng mơnhông ó rơdêi mâu hdrê loăng ki pêt kơchâi, plâi, reăng, loăng ton hơnăm, loăng ki vâ xo pro tâl ƀă mâu loăng nhâ pro pơkeăng. Ing mê, thăm mơdêk ki kơnía tung pêi cheăng kâ a tơnêi tíu ki pêi pêt, ƀă po rơdâ kơchơ ki tê mơ’no dêi kế tơmeăm tung tơnêi têa ƀă châ tê mơ’no dêi tơmeăm, môi tiah kơphế, kơxái tiu, plâi krui, loăng hôt, mắc-ca, kơxu. Maluâ ti mê, ki kơnía dêi tơdroăng mơ’no tê kế tơmeăm ing chiâk deăng dêi Tây Nguyên ối iâ, tá hâi teăm tơxxâng ƀă mâu ivá cheăng, ki tơ’lêi hlâu mê.

Pôa Nguyễn Hữu Tháp, Kăn phŏ hnê ngăn Vi ƀan kong pơlê Kon Tum tối ăm ‘nâi, tơdroăng tơrŭm cheăng ƀă Pơlê kong kân Hồ Chí Minh tung hriăn plĕng khoa hok, mơnhông ‘na kŏng ngê̆, thăm mơdêk tơdroăng ki tơdjêp vâ po hnoăng cheăng ki kân xiâm, kum mơjiâng mâu troăng hơlâ ki tơrŭm cheăng tơxâng ƀă tơmeăm khoăng ki ai xêh a Tây Nguyên:

“Pơlê kong kân Hồ Chí Minh cho môi tung tíu xiâm pêi cheăng kâ-rêh ối pơlê pơla ƀă xuân cho môi tung tíu xiâm khoa hok kong ngê̆ ƀă xuân cho môi tíu ki mơdró kâ kân. Mâu kong pơlê kơpong Tây Nguyên ai tơmeăm cho kơnía git. Pin mơjiâng tơdroăng tơrŭm cheăng, tơdjêp vâ mơnhông tơdroăng tơtêk”.

‘Na tơdroăng ki tơrŭm cheăng ‘na chiâk deăng xúa kŏng ngê̆ ki rơkê ó pơla mâu kong pơlê kơpong Tây Nguyên ƀă Pơlê kong kân Hồ Chí Minh, mâu kăn ai tối tiah kố, kal ai troăng hơlâ ki nhên, tơtro ƀă troăng hơlâ ki tŏng kum vâ tơ’mot mâu khu ki tê mơdró kâ, mâu ki cheăng ‘na khoa hok veăng mơ’no liăn, pơhlêh nếo tung kŏng ngê̆. Mâu kơvâ cheăng ki mê xuân chiâng tơrŭm hriăn plĕng, pêi pro klêi, hnê mơjiâng troăng hơlâ, tung mê ai: chêh xo tối, pơtối rak vế xiâm rêi gen mâu hdrê kơchâi, plâi, pơkeăng, kơxêt ƀă hên hdrê ki ê vâ ing mê, kum ăm tơdroăng mơjiâng hdrê. Tơrŭm cheăng ƀă Pơlê kong kân Hồ Chí Minh kô kum ăm Tây Nguyên hơ’lêh nếo ‘na cheăng kŏng ngê̆ kring vế, rak ngăn ƀă  mơjiâng pro kế tơmeăm vâ krí xo, kêi xo hnê mơhno tung kơvâ cheăng chiâk deăng xúa kŏng ngê̆ ki rơkê ó ƀă hên mâu tơdroăng ki ê.

Tiê̆n sih Hoàng Anh Tuấn, Kăn phŏ ngăn Ƀơrô Khoa hok ƀă Hnê mơjiâng tuăn ngôa rơkê, Khu pơkuâ ngăn ‘na tơdroăng chiâk deăng kŏng ngê̆ ki ó rơdêi Pơlê kong kân Hồ Chí Minh tối ăm ‘nâi, ai hên túa ki khu kố vâ tơrŭm hriăn plĕng, xúa kŏng ngê̆ ing kơvâ chiâk deăng ăm mâu kong pơlê kơpong Tây Nguyên.

“Tâi tâng mâu tơdroăng ki Khu hnê mơhno pơkuâ ngăn ‘na chiâk deăng hiăng ai, mâu tơdroăng ki hiăng châ chiâng pêi pro ăm i tơtro ƀă mâu kong pơlê kơpong Tây Nguyên mê Khu hnê mơhno hbrâ vâ tŏng kum. Xuân cho mâu túa pêi pro ki tơtro rơtế pêi pro mâu hnoăng cheăng khoa hok a kong pơlê tiô kơxô̆ liăn ki ai dêi kong pơlê. Tơrŭm cheăng ƀă Pơlê kong kân Hồ Chí Minh lơ Pơlê kong kân Hồ Chí Minh kô pơkâ pêi pro mâu tơdroăng cheăng ki tơtro vâ tŏng kum ‘na tơdroăng ki ai păng ‘nâng dêi kơpong Tây Nguyên. Veăng kum tối tơbleăng mâu tơdroăng ki hnê mơjiâng vâ thăm mơdêk tơdroăng ki xúa tơmeăm khoăng tung kơbong ki hriăn plĕng, tơmeăm khoăng tung hnoăng cheăng hriăn plĕng”.

Hơnăm 2024, Pơlê kong kân Hồ Chí Minh ƀă mâu kong pơlê kơpong Tây Nguyên kô tơrŭm cheăng tơkŭm 3 tơdroăng ki kal râ kơpong, tung mê, ai: Leh tơbleăng sâm ƀă tơmeăm khoăng ki pro ing pơkeăng lâp plâi tơnêi a khế 5, Hneăng po kơchơ mơhno tơbleăng hdrê ƀă chiâk deăng xua kŏng ngê̆ ki rơkê, po a khế 6 ƀă Măng tĭng kế tơmeăm OCOP, kế tơmeăm ki pêi lo dâi lĕm khât dêi rêm kơpong ƀă kŏng ngê̆ ki pêi pêt - rak ngăn, uâ modiê kế tơmeăm a khế 11. Pơla hdrối kố nah, a roh hôp, tơpui tơno, vâ môi tuăn tơdroăng pơkâ pêi pro tơrŭm cheăng tung kơvâ pêi chiâk deăng hơnăm 2024 pơla Pơlê kong kân Hồ Chí Minh ƀă mâu kong pơlê a Tây Nguyên, pôa Đỗ Xuân Dũng, Kăn phŏ hnê ngăn ‘na chiâk  deăng ƀă Mơnhông mơdêk thôn pơlê kong pơlê Dak Lak xuân pói rơhêng vâ châ tơdjêp ƀă mâu tơmeăm khoăng ki dâi lĕm, ing mê, pro pơxúa ăm rêm ngế kuăn pơlê ƀă khu mơdró kâ.