VOV4.Sêdang - Kơxo lơ 22/10, teăng mâ khu râ kăn pơkuâ Đảng, Tơnêi têa, Măt trâ̆n Tơnêi têa Việt Nam, pôa Nguyễn Xuân Phúc, Kăn xiâm hnê ngăn tơnêi têa troh Tổ đình Viên Minh (hngêi chuô Ráng), cheăm Quang Lãng, tơring Phú Xuyên, pơlê kong kân Hà Nội lăm pôu ngăn Ƀok Phop Thích Phổ Tuệ, Ƀok phop kăn pơkuâ Hô̆i đong mơnhên Khu khop Phop Việt Nam. A Leh lăm pôu, pôa Nguyễn Xuân Phúc hiăng ‘măn hơvĭng reăng, chôu nhâng ƀă tơbâ Ƀok phop Thích Phổ Tuệ.

Ƀok Phop Thích Phổ Tuệ cho Ƀok Phop kăn pơkuâ Hô̆i đong mơnhên Khu khôp Phop Việt Nam, Kăn cheăng tung Tíu xiâm Măt trâ̆n Tơnêi têa Việt Nam. Ƀok phop Thích Phổ Tuệ cho ƀok phop ki ô eăng rơkê păng ‘nâng, rêh ối lĕm, ai hiâm mơno lĕm, ối to khôp, chêh kơxop mơ-éa, Ƀok Phop hiăng veăng rah chêh, tơplôu, rơnêu hên ƀai chêh ‘na tơdroăng hriâm Phop a Việt Nam.

Tơdroăng rêh ối dêi Ƀok Phop cho vâ mơnhên tơdroăng ki kơnâ khôi túa lĕm, hiâm mơno lĕm dêi Tơdroăng khôp Phop tung tơdroăng rêh ối pơlê pơla. Ƀă mâu tơdroăng pleăng ki kân ăm tơnêi têa, Ƀok Phop Thích Phổ Tuệ hiăng châ Tơnêi têa mơnhên ƀă diâp Me dái Hồ Chí Minh rơtế hên pri kơnía ki ê.

A Sa Ly tơplôu ƀă tơbleăng