VOV4.Sêdang - Kơxê lơ 18/10, pôa Phạm Minh Chính, Ngế pro xiâm hnê ngăn Chin phuh trâm kăn teăng mâ ki kơhnâ rơkê dêi khu ki hbrâ mơdât pơreăng COVID-19. Rôh trâm mâ kố châ tơkŭm po trâm mâ tơdrêng ƀă ‘no ing troăng hyôh Internet. Veăng a rôh trâm mâ ai lối 19 rơpâu ngế ƀok thái pơkeăng ki rơkê kơhnâ tung hnoăng cheăng hbrâ mơdât pơreăng COVID-19 dêi kơvâ ngăn pơkeăng ƀă khăm pơlât, Khu lêng, Kŏng an tung lâp tơnêi têa. A rôh trâm mâ, mâu ƀok thái pơkeăng, kăn ƀô̆ ngăn pơkeăng hiăng tối mâu tơdroăng ki ôh tá kâi piu, ƀriê klêi kơ’nâi mâu hâi khế ki veăng hbrâ mơdât pơreăng pơla hdrối kố nah.

Hên tơdroăng ăm hlo ki xơpá ôh tá kâi tối dêi mâu ngế ki veăng hbrâ mơdât pơreăng COVID-19. Tơpui a rôh trâm mâ, pôa Phạm Minh Chính tối nhên Đảng, Tơnêi têa ƀă Kuăn pơlê mơnê ƀă mơnhên tối khât khu ki pleăng dêi hnoăng cheăng hbrâ mơdât pơreăng ƀă kăn ƀô̆, mâu ngế cheăng ‘na khăm pơlât, rơhêng vâ  khu ngăn pơkeăng ƀă khăm pơlât pơtối mơdêk khôi túa lĕm tro ƀă mâu tơdroăng ki kơhnâ rơkê, mâu tơdroăng ki rơkê plĕng ki kơnía tung pơla hdrối kố nah, pơtối pleăng, kơhnâ ăm hnoăng cheăng hbrâ mơdât pơreăng xuân môi tiah hnoăng cheăng rak ngăn ivá châ chăn kuăn pơlê.

Katarin Nga tơplôu ƀă tơbleăng