VOV4.Sêdang - Kơxo hâi lơ 18/10, a Hà Nội, pôa Vũ Đức Đam, Ngế pro xiâm phŏ hnê ngăn tơnêi têa, Kăn xiâm phŏ Hnê mơhno Tơnêi têa hbrâ mơdât COVID-19 pêi cheăng ƀă Khu xiâm pơkuâ khoa hok ƀă Kŏng ngê̆ ‘na mơnhên troăng prôk ƀă troăng pêi khoa hok kŏng ngê̆ kum hbrâ mơdât pơreăng. A roh hôp, mâu kăn teăng mâ mơnhên tơdroăng tŏng kum păng ‘nâng dêi Khoa hok kŏng ngê̆ tung tơdroăng hbrâ, mơdât pơreăng COVID-19.

Tung la ngiâ, kơvâ khoa hok kŏng ngê̆ kal pơtối hriăn plĕng vaccine ƀă pơkeăng pơlât, mâu troăng khăm ngăn ki nếo; hriăn plĕng mơjiâng pro kit khăm ngăn pơreăng pêi pro mâu hnoăng cheăng hriăn plĕng mơnhên tơdjâk troh cheăng kâ – rêh ối pơlê pơla ƀă mâu tơdroăng pâ thế ƀă pêi pro mâu troăng pêi ‘na tơdroăng hnê hriâm, khăm pơlât, khôi túa lĕm tro tung hneăng nếo.

Mâu kăn tối, kal ai hên troăng pêi ton xŏn drêng mơ’no liăn hriăn plĕng mơjiâng kŏng ngê̆ hbrâ mơdât pơreăng ƀă xúa kŏng ngê̆; troăng hơlâ mơhnhôk khu râ hriăn plĕng kŏng ngê̆, troăng hbrâ, mơdât pơreăng.

A Sa Ly tơplôu ƀă tơbleăng