VOV4.Sêdang - Hâi lơ 22/10, Kăn teăng mâ Việt Nam a Khon Kaen tơrŭm ƀă khu râ kăn pơkuâ ƀă Khu mơngế Siam xiâm rêi Việt Nam a kong pơlê Nakhon Phanom tơkŭm po kân krip leh tơbâ 45 hơnăm mơjiâng tơrŭm cheăng tơpui kâ Việt Nam – Siam a Pơlê tơrŭm cheăng Siam – Việt Nam a pơlê Mạy, tiú Pôa Hồ Chí Minh, Kăn xiâm hnê ngăn tơnêi têa pơtê chêng a khế 7/1928. Xông tơpui a leh tơbâ, pôa Chu Đức Dũng, Kăn teăng mâ Việt Nam a Khon Kaen mơnhên: 45 hơnăm hiăng hluâ, Việt Nam ƀă kong têa Siam hiăng mơ-eăm rơtế dêi pó djâ tơrŭm cheăng pơla péa tơnêi têa mơnhông mơdêk ó rơdêi, mơjiâng tơrŭm cheăng, loi tơngah, nhuô̆m dêi pó, tơdâng tơ’mô, péa pâ rơtế ai pơxúa. Kong têa Siam nôkố hiăng chiâng khu tơrŭm ki kal apoăng dêi Việt Nam tung ASEAN.

Tiô pôa Chu Đức Dũng, a roh tơpui phôn pơla péa Ngế pro xiâm hnê ngăn Chin phuh Việt Nam ƀă Siam khế 5 kố nah, péa kăn xiâm pơkuâ môi tuăn tung pơla ai pơreăng COVID-19 nôkố, péa tơnêi têa kal thăm tơrŭm krá tơniăn, pơxúa păng ‘nâng, châ tơƀrê, prôk trâu hơngế, djâ tơdroăng rêh ối phâi tơtôu, hơniâp lĕm ăm kuăn pơlê péa tơnêi têa, mơ-eăm châ kơxô̆ liăn tê mơdró pơla péa tơnêi têa châ 25 rơtal dollars a hơnăm 2025.

Klăng roh kố, môi tiú mơđah tơbleăng um ‘na tơdroăng rêh ối, pêi cheăng pôa Hồ Chí Minh, Kăn xiâm hnê ngăn tơnêi têa hneăng apoăng ƀă 45 hơnăm tơrŭm cheăng tơpui kâ Việt Nam – Siam rơtế môi roh kơchơ mơđah tơbleăng tơmeăm khoăng Việt Nam – Siam xuân hiăng châ tơkŭm po, mơhnhôk tơdroăng rơhêng vâ ‘nâi plĕng mâu kăn teăng mâ ƀă kuăn pơlê ki rêh ối pêi cheăng a kong têa ê veăng.

A Sa Ly tơplôu ƀă tơbleăng