VOV4.Sêdang - Tung pơla hdrối kố nah, rơtế ƀă khu kăn pơkuâ ƀă kơvâ cheăng ki ai tơdjâk, mâu khu tơrŭm ‘na tơdroăng tiô khôp a kong pơlê Dak Lak xuân hiăng ai hên tơdroăng cheăng pêi pro ai pơxúa, veăng tơrŭm ƀă vâi krâ nhŏng o kơpong ki tro tâ pơreăng COVID-19. Tung rôh pơreăng tâ tú má 4 kố, Khu ki teăng mâ tơdroăng khôp Tin Lành kong pơlê Dak Lak hiăng diâp vâ chê 5.500 hnoăng tơmeăm ăm vâi krâ nhŏng o kơpong ki tro pơreăng, ƀă tâi tâng kơnâ lối 1 rơtal 500 rơtuh liăn. Rơtế amê, Vi ƀan ngăn pơkeăng pơlât pơlê pơla dêi Hô̆i Thánh Tin Lành Việt Nam Miền Nam xuân kum mâu rơpŏng ki ai ngế tâ pơreăng cho F0 ƀă F1 a kong pơlê Dak Lak mâu kơxuô tơmeăm, ƀă tâi tâng kơnâ 700 rơtuh liăn.

Pơla hdrối kố nah hên mâu rơxế kân chơ mâu tơmeăm tŏng kum dêi mâu khu pêi cheăng tŏng kum pơlê pơla - khu teăng mâ kuăn khôp Tin Lành Dak Lak hiăng troh ƀă kuăn pơlê a kơpong klâ krê, kơpong kring gak ối krê xua pơreăng COVID-19, diâp a kŏng kuăn pơlê a 26 to thôn - pơlê tung kong pơlê Dak Lak. Mê cho mâu  tíu kuăn pơlê ki xơpá khât ki dế ối kơtăn vâ hbrâ mơdât pơreăng COVID-19.

Cheăm Čư Nĕ, tơring Krông Ƀuk, cho môi tung mâu tíu ai pơreăng tâ tú hên a Dak Lak, tung pơla hdrối kố nah. Tung mê, mâu rơpŏng kuăn pơlê a mâu ƀuôn Đrao, ƀuôn Dhiă, ƀuôn Mui, ƀuôn Kdrô xua tro klâ ối kơtăn vâ plâ mơdât pơreăng. Akố, pakĭng veăng kum dêi mâu khu grup a kong pơlê, kuăn pơlê ối ai khu pêi cheăng kum pơlê pơla Khu teăng mâ kuăn khôp Tin Lành kong pơlê Dak Lak hiăng diâp vâ chê 1 rơpâu 465  kơxu tơmeăm.

Tối tơdroăng cheăng ai pơxúa mê, pôa Y Hiệp Êban - Kăn hnê ngăn Đảng  ủy cheăm Čư Né ăm ‘nâi: Tơdroăng rêh ối dêi kuăn pơlê hiăng trâm pá, nôkố pơreăng thăm rế pá tâ, tơdroăng veăng kum dêi mâu khu ai tuăn hơ-ui tơxâng nhoăm păng ‘nâng:

“Cheăm Čư Né ngin phiu ro ‘nâng ai mâu tiô khôp veăng kum. Malối cho khu tơrŭm ngăn kuăn khôp Tin Lành Dak Lak hiăng kum kuăn pơlê ngin mâu kơchâi kâ ki ai pơxúa, vâ kum kuăn pơlê, tơmeăm iâ la hiâm mơno hên, pâ kơ mơngế môi tiah pâ dêi châ. A teăng mâ ăm Đảng bộ mơnê hên kơ mâu khu tơrŭm, malối cho khu tơrŭm ngăn kuăn khôp Tin Lành kong pơlê Dak Lak’’.

Khu pêi cheăng tŏng kum pơlê pơla Khu Teăng mâ Tin Lành kong pơlê Dak Lak  diâp tơmeăm a Viƀan cheăm Čư Né, tơring Krông Ƀuk

Khế 9 kố nah, klêi test rĕng tung cheăm hiăng ai hên ngế yương tĭnh ƀă SARS-CoV2, lâp tung cheăng Čư Bao, pơlê kong krâm Ƀuôn Hồ, kong pơlê Dak Lak thế klâ kơtăn, pêi pro tro tiô pơkâ xô̆ 16 dêi Ngế pro xiâm hnê ngăn Chin phuh. Ôh tá xê to xơpá ‘na kế kâ ăm kuăn mơngế, mê kế kâ ăm mơnăn mơnuâ xuân rế pá ai há.

Hlo ti mê, mâu kăn, mâu khu tơrŭm cheăng, khu grup ƀă mâu ai tuăn hơ-ui hiăng teăm tŏng kum tơdrêng. Pôa Y Ban Ayun, kăn thôn ƀuôn Krum A, cheăm Cư Bao, pơlê kong krâm Ƀuôn Hồ ăm ‘nâi:

“A hâk  ro ‘nâng xua khu ai tuăn hơ-ui hiăng diâp mâu kơxu tơmeăm ăm kuăn pơlê. Tung pơla ai pơreăng kố nah ai tơ’nôm mâu tơmeăm kal vâ xúa tung rêh ối môi tiah xup kơxŏng khăng, phái, xik ƀă hên ki ê. Mơnê kơ Khu teăng mâ hiăng pơtroh mâu tơmeăm mê, á hâk mơnê ƀă vâi krâ nhŏng o tung pơlê xuân ro há”.

Kuăn pơlê Ƀuôn Jung, cheăm Ea Yông, tơring Krông Pač châ kum kơxu tơmeăm

Hlê nhên troăng rơhlâ “plâ mơdât pơreăng môi tiah plâ xâ” dêi Chin phuh, ƀă tơdroăng hơ-ui pâ kum dêi rơpó, khu ngăn kuăn khôp Tin Lành Dak Lak đi đo mơhno hnoăng cheăng dêi tơná  ƀă kuăn pơlê. Laga tơmeăm ƀă hiâm mơno, mơngế veăng tơlo phái, kơchâi plâi pôm, mơngế veăng tơlo liăn vâ kum kuăn pơlê ki tơdjâk troh  pơreăng COVID-19 tơkâ luâ xơpá. Nâ H’Oanh Ayun kuăn ngo Rơđế ối a ƀuôn Jung, cheăm Ea Yông, tơring Krông Păch ai tơmiât tiah kố, rơtế tơchoâm ƀă tơnêi têa tung tơdroăng hbrâ mơdât pơreăng COVID-19  cho “tơdroăng ki ăm hôm luâ tâ xo’’.

“Rơtế ƀă ivá tơnêi têa, tung tơdroăng kum ƀă trâm pá tơdjâk troh COVID-19, Buôn Jung ngin xuân hiăng krếo kuăn pơlê tiô khôp veăng ‘no ivá, tơlo phái, xup kơxŏng khăng, liăn vâ kum kuăn pơlê ki dế trâm pá xua COVID-19. Ngin pro tiô tơdroăng krếo thế dêi mâu kăn rơtế plâ mơdât pơreăng COVID. Drêng diâp mâu tơmeăm mê ngin xuân pêi pro tŭm mâu pơkâ kring vế tơná, rơpŏng hngêi ƀă mâu ngế ki ê’’.

Khu Teăng mâ Tin Lành kong pơlê Dak Lak   diâp tơmeăm a cheăm Čư Êbur, Buôn Ma Thuột

Ƀok Tin Lành Lemous Philemol - Ngế xiâm ngăn Khu Teăng mâ Tin Lành kong pơlê Dak Lak ăm ‘nâi: Sap ing ai pơreăng COVID-19 tâ tú roh má pŭn a Dak Lak, khu pêi tơdroăng cheăng ‘na kum pơlê pơla dêi Khu Teăng mâ Tin Lành kong pơlê Dak Lak hiăng diâp vâ chê 5.500 kơxu tơmeăm, rêm kơxu mê cho phái, môi kơthung xup kơxŏng khăng, têa măm, têa rơmâ, xik ƀă kơxô̆ liăn  ing 200-300 rơpâu liăn. Tâi tâng  tơmeăm mê kơnâ lối 1,5 rơtal liăn.

Pakĭng mâu tơmeăm hbru ăm tâi tâng kuăn pơlê a kơpong tâ pơreăng, Khu  Teăng mâ Tin Lành kong pơlê Dak Lak xuân hiăng diâp mâu tơmeăm dêi Vi ƀan ngăn pơkeăng - pơlê pơla dêi Khu ngăn kuăn khôp Tin Lành Việt Nam peăng Hdroh tơnêi têa ăm mâu rơpŏng kuăn pơlê kuăn khôp ki F0, F1 ối tung kong pơlê Dak Lak. Tâi tâng kơxô̆ liăn rôe mâu tơmeăm hbru ăm mâu F0 ƀă F1 a Dak Lak tung pơla hdrối kố nah ai 700 rơtuh liăn, mê cho mâ liăn.

Pakĭng mê, Khu Teăng mâ Tin Lành kong pơlê Dak Lak xuân tơkŭm mâu khu ƀok thái pơkeăng hnê tối ‘na ivá online ăm mâu ngế ki kal vâ ‘nâi tơ’nôm ‘na COVID-19, hnê túa rak ngăn tơná drêng ôh tá mơhúa tro F0 lơ F1, F2. Ƀok Tin Lành ăm ‘nâi:

“Tung pơla ai pơreăng kân COVID-19, malối tung rôh pơreăng tâ tú má 4 kô hiăng tâ tú rĕng troh lâp lu tung lâp tơnêi têa. Tơdjâk hên troh tơdroăng rêh ối dêi kuăn pơlê. Mâu kuăn pơlê ki tiô khôp a rêm tíu hiăng tăng tơdroăng kơ êng mơhnhôk, hơlêm, veăng kum tơmeăm. Ai hên tơdroăng tŏng kum ki pơxúa rơtế veăng ƀă dêi rơpó plâ mơdât pơreăng. A hlo mâu ngế cheăng tung khu tŏng kum mê cho mâu ƀok thái pơkeăng, kăn ƀô̆, mâu lêng lơ mâu vâi nâ o vâi kơdrâi veăng tơkŭm dêi tơmeăm vâ tŏng kum kuăn pơlê kơpong tâ pơreăng. Tơdroăng hơ-ui pâ hiăng pro hên ngế hlo chiâng rơrêk tung rơno pơreăng tâ tú kố. Ngin xuân veăng tơlo iâ vâ veăng hơlêm vâi krâ nhŏng o mơ-eăm tơkâ luâ xơpá”. 

Tơdrêng ƀă tơdroăng tŏng kum, kum kuăn pơlê a kơpong tâ pơreăng ki dế trâm xơpá, tung pơla hdrối kô nah,  Khu Teăng mâ Tin Lành kong pơlê Dak Lak  đi đo tối pơchân ăm mâu Chi hô̆i Tin Lành a kong pơlê đi đo thế rak vế tro tiô pơkâ hnê mơhno 5K dêi Khu xiâm ngăn pơkeăng pơlât ƀă mâu  tơdroăng hbrâ mơdât pơreăng COVID-19. Mâu tơdroăng tiô khôp tơkŭm po hôp tơdrêng. Mâu Ƀok Tin Lành, ngế pơkuâ hnê pơchân  kuăn pơlê pôi tá ối tơkŭm pú hên, malối pôi tơkŭm ôu kâ, ôu pơkŏng.

Mâu tơdroăng pro pơxúa khât dêi Khu Teăng mâ Tin Lành kong pơlê Dak Lak  hiăng veăng ‘no ivá tơbleăng tơdroăng hơ-ui pâ, rơtế tơhoâm ivá plâ mơdât pơreăng COVID-19.

H’Zawut  chêh

Gương tơplôu ƀă tơbleăng