VOV4.Sêdang - Kơxo lơ 18/10, Hô̆i đong kuăn pơlê Pơlê kong kân Hồ Chí Minh hneăng má X pơxiâm po Hneăng hôp má 3. Pôa Nguyễn Văn Nên, Kăn cheăng tung Khu xiâm kal kí, Kăn pơkuâ hnê ngăn cheăng Đảng Pơlê kong kân Hồ Chí Minh veăng hneăng hôp. Ahdrối pơxiâm hneăng hôp, mâu kăn hiăng mơdoh môi iâ phut tu ko koh nhuô̆m mâu kăn pơlê hiăng hlâ ƀă mâu kăn ƀô̆, mâu lêng, khu hbrâ mơdât pơreăng hiăng hlâ drêng pơreăng kân COVID-19 xông tâ tú.

Kố xuân cho hneăng hôp ki kal vâ mơnhên tâi tâng tơdroăng hbrâ mơdât pơreăng COVID-19 ƀă mâu troăng mơnhông cheăng kâ. Xêo troh hâi lơ 17/10, tơdroăng pơreăng xông tâ tú a Pơlê kong kân Hồ Chí Minh hiăng ai pơ’lêh tơƀrê hôm, kơxô̆ mơngế tro tâ kơdroh a kơlo pái kơxô̆, kơxô̆ ngế hlâ chu kơdroh kơlo péa kơxô̆; kơxô̆ ngế pâk vaccine trum má môi  ăm mơngế sap ing 18 hơnăm tơngi klêng châ vâ chê 99%, trum má 2 lối 76%.

Pakĭng mâu tơkêa châ tơƀrê, pơlê kong kân xuân mơnhên tơdroăng ki tơdjâk râ xua pơreăng pro. Hneăng hôp kô mơdoh chôu mơnhên tâi tâng tơdroăng cheăng kâ – rêh ối pơlê pơla 9 khế ƀă hnoăng cheăng tơleăng mâu khế pơtối nếo; mơnhên xiâm kối, ki má lối cho xiâm kối ing mâu khu râ kăn pơkuâ mâu pơlê kân, pơlê kong kân, tíu cheăng ƀă pơkâ mâu troăng pêi ki tơtro.

A Sa Ly tơplôu ƀă tơbleăng