VOV4.Sêdang - Tối nhên a rôh hôp kơxo lơ 25/10 ‘na hbrâ ví kong rơdâm hbrâ rơdêi chiâng khía mơhot, pôa Trần Quang Hoài, kăn phŏ Khu hnê mơhno cheăng Tơnêi têa ‘na hbrâ ví khía mơhot têa kân lân lu pơkâ thế mâu kong pơlê rĕng ‘mâi rơnêu mâu kế tơmeăm klêi kơ’nâi kong mê khía mơhot têa kân lân lu tung pơla hdrối kố nah ƀă pôi tá ăm plong tuk a têa kơxĭ tơnăng ká xi xŏng tung kơpong ki rơ-iêo dêi khía. Pơtối tối tơbleăng ‘na kong mê kân sap ing Thừa Thiên Huế troh Khánh Hòa xuân môi tiah kong mê kân ó, ai khía jâ kơdo, tơro têa, kong mê príu khía hdrot têi a Ninh Thuận, Bình Thuận, Tây Nguyên ƀă Nam bộ, mâu kăn pơkâ thế mâu kong pơlê pơtối rĕng ‘mâi rơnêu mâu kế tơmeăm klêi kơ’nâi kong mê têa kân tung pơla hdrối kố nah malối cho tơdroăng ki tơhnah tơhnâp tơnêi a mâu troăng prôk ƀă troăng kân vâ rĕng ăm rơxế châ prôk a troăng rơxế lơ treng sap ing peăng kơnhŏng troh peăng hdroh. Ƀă kong rơdâm hbrâ vâ ai khía têi chiâng khía mơhot, kal hbrâ rơnáu mâu tơdroăng rĕng tơbleăng ăm rêm kăn pơkuâ ƀă kuăn pơlê hbrâ rơnáu ví, malối cho mâu plong tuk ki dế tơnăng a kơpong ki rơ-iêo. Mâu kong pơlê kal malối tơmâng ngăn rak tơniăn ăm kuăn pơlê a mâu kơpong ki tro têa lân lu, ví tơdroăng ki kong mê têa kân ton hâi pro kuăn pơlê tôu tuăn.

Katarina Nga tơplôu ƀă tơbleăng