VOV4.Sêdang - Pôa Vũ Đức Đam, Ngế pro xiâm phŏ hnê ngăn tơnêi têa hiăng kĭ tơdroăng pơtâng tối ‘na tơdâng tơ’mô pơla kơdrâi ƀă kơnốu troh hơnăm 2030. Kố cho roh apoăng Việt Nam ai môi tơdroăng pơtâng tối krê ‘na tơdâng tơ’mô pơla kơdrâi ƀă kơnốu ƀă troăng tơmiêt pêi troh hơnăm 2030. Tơdroăng pơkâ pêi troh hơnăm 2025, tâi tâng mâu khu xiâm, kơvâ cheăng, kong pơlê mơjiâng pơkâ pêi, pêi pro tơdroăng khế pêi xua tơdâng tơ’mô pơla kơdrâi ƀă kơnốu ƀă hbrâ mơdât pâm xiê̆n rêm hơnăm. Mơ-eăm troh hơnăm 2030 hlê plĕng ‘na tơdâng tơ’mô pơla kơdrâi ƀă kơnốu dêi mâu khu mâu ngế tung pơlê pơla tâk sap ing 10 – 15% tâng pơchông ƀă hơnăm 2025. Mơ-eăm troh hơnăm 2025 châ ki vâ iâ 70% kơ koan pơtâng tối mơnúa pêi ƀă troh hơnăm 2030 châ 90% kơ koan pơtâng tối ki păng ‘nâng pêi pro Khu kơxô̆ kơdrâi ƀă kơnốu tung pơtâng tối. Troh hơnăm 2025 châ 95% ƀă troh hơnăm 2030 châ 100% mâu tơkêa dêi pơlê pơla hiăng châ tơbleăng ăm pêi pro ôh tá ai tơdroăng ki pơrah pơla kơdrâi ƀă kơnốu. Rêm hơnăm, mâu kơ koan, khu pú hên, khu tê mơdró ƀă kuăn pơlê châ pơtâng tối, tơbleăng tơdroăng ‘na luât, troăng hơlâ ‘na tơdâng tơ’mô pơla kơdrâi ƀă kơnốu ki vâ iâ 2 xôh.

A Sa Ly tơplôu ƀă tơbleăng