VOV4.Sêdang - Kơxo lơ 20/10, hiăng po roh hôp má 2 Kuô̆k hô̆i hneăng 15. Roh hôp tơkŭm po tiô tơdroăng mơ’no tiô troăng hyôh Internet ƀă hôp tơchoâm a Hngêi hôp kân hlối klâ pro 2 rôh, rôh má 1 hôp mơ’no tơdrêng tiô troăng hyôh Internet sap hâi lơ 20-30/10, rôh má 2 tơkŭm sap hâi lơ 8-13/11. Tiah mê, Kuô̆k hô̆i kô pêi cheăng tung pơla 17 hâi, tung mê, hbrâ tá tơdroăng hôp ‘no tiô troăng hyôh Internet tâi hneăng tâng pơreăng COVID-19 pơtối tâ tú rơ-iô. Tiô tơdroăng, Chin phuh  hbrâ lối 50 hlá mơ-éa chêh tơbleăng, hlá mơ-éa chêh pơtroh, tơdroăng tơkêa bro pơtroh ăm Kuô̆k hô̆i.

A rôh hôp drêng kố, Kuô̆k hô̆i xuân séa ngăn hên tối leăng ki kal, môi tiah tối ‘na pêi tơdroăng pơkâ mơnhông cheăng kâ - rêh ối pơlê pơla ƀă hbrâ liăn ngân tơnêi têa  hơnăm 2021, tơdroăng hbrâ mơdât pơreăng COVID-19; pơkâ mơnhông cheăng kâ rêh ối hơnăm 2022, liăn ngân tơnêi têa ƀă troăng rơhlâ xing xoăng liăn ngân xiâm tơnêi têa hơnăm 2022 (tung mê, ai tơdroăng pro mơdon hâi ‘mâi pơ’lêh liăn khế).

Mâu tơdroăng tối tơbleăng dêi hngêi tơleăng xiâm Khu xiâm séa ngăn arak luât; tối tơbleăng ‘na: tơdroăng cheăng hbrâ mơdât kâ kơluâ, hbrâ mơdât mâu ki ai xôi mâu ki pro xôi luât, tơdroăng pêi pro tiô luât pơkâ hơnăm 2021; tơkŭm tâi tâng hnê tối pâ thế ƀă tơdroăng séa ngăn tơleăng mơnhên pơkâ... xuân châ pơtroh ăm Kuô̆k hô̆i, malối Kuô̆k hô̆i kô séa ngăn, pơkâ hdró xúa tơnêi dêi tơnêi têa tung pơla hơnăm 2021-2030, mâu tơdroăng vâ pêi troh hơnăm 2045 ƀă pơkâ xúa tơnêi 5 hơnăm (2021-2025); pơkâ ‘mâi mơnhông cheăng kâ pơla hơnăm 2021-2025.

Kuô̆k hô̆i tối kô pêi cheăng tá hâi tơdrốu ƀă hâi tĭng, tơdroăng pơkâ pêi ‘nâi  mơdoh vâ hâi chôu, hbrâ vâ pêi a chôu ki pơtê, pêi tơ’nôm a kơxêi măng vâ rĕng klêi hâi hôp la xuân tơniăn tơdroăng ki hôp. Kố cho tơdroăng púi vâ ki  dêi kuăn pơlê tung lâp tơnêi têa tung pei pro tơpéa tơdroăng, hlối plâ mơdât pơreăng, hlối tơkŭm ‘mâi mơnhông cheăng kâ.

Gương tơplôu ƀă tơbleăng