VOV4.Sêdang - Tung hâi lơ 25/10, pơtối hneăng hôp kuô̆k hô̆i, mâu kăn tơpui a tôh ‘na tơdroăng tơkêa Luât Tê mơdró baoh hiâm (ki’mâi hơ’lêh). Kố cho tơdroăng tơkêa ai hnoăng cheăng kal tung kơvâ liăn ngân, kố xuân cho kơvâ cheăng tê mơdró ki kal. Rế tê mơdró tiô tơdroăng ki mơhnŏng vâ xêh, laga,  pơkâ roê baoh hiâm pơklât thế. Tá hâi nhên ‘na tơdroăng ki hbrâ mơdât hnoăng pơkuâ, mâu rơkong veăng tơpui tối pơkâ thế tối nhên ví tơdroăng ki khu ki tê mơdró baoh hiâm rơtế veăng tơrŭm ƀă dêi rơpó, mơdêk liăn nâp, kơdroh liăn ‘no mơhá ƀă mâu túa pơkâ. Veăng tơpui tối a rôh hôp tơpui a tôh, pôa Vương Đình Huệ, kăn xiâm hnê ngăn Kuô̆k hô̆i mơnhên tối khât ki rơkê plĕng dêi tơdroăng tơkêa ƀă hnoăng cheăng séa ngăn. Tơdrêng a mê hnối tối tiah kố, luât baoh hiâm ki ‘mâi hơ’lêh kô tơleăng mơnhên mâu tơdroăng ki ối tơvâ tơvân, mơdêk tơdroăng ki roê baoh hiâm mơnhông krá tơniăn ton tâ. Laga, kăn xiâm hnê ngăn Kuô̆k hô̆i xuân pơchân mâu tơdroăng ki xiâm kal pơtối séa ngăn vâ mơdêk tâ nếo ki rơkê plĕng dêi tơdroăng tơkêa luât. Tung mê tơkêa baoh hiâm athế tơtro ƀă tơdroăng pơkâ la ngiâ kố ah cho tê mơdró tung tơdroăng xúa kơxô̆, điê̆n tưh, kơxô̆ hơ’lêh.

Katarina Nga tơplôu ƀă tơbleăng