Tơdrêng ƀă khu tŏn cheăng dêi mâu hiăng kân, pơlê Groi Wet, cheăm Glar, tơring Đăk Đoa, hiăng châ mơnhông tơƀrê kơnôm khu tŏn chêng ối kŭn ƀă lối 20 ngế vâi o rơxông nếo veăng tŏn. Ai mâu rơxông nếo pơtối rak khôi túa ton chêng dêi pơlê ai hnoăng kân veăng ‘no dêi ngê̆ nhân - đảng viên A Lip. O Uyết, 13 hơnăm, ngế tung khu tŏn chêng hơnăm ối nếo pơlê Groi Wet, ăm ‘nâi:

“Dế hriâm lâm 4 nah a hiăng hriâm tŏn chêng. Rôh apoăng á tŏn ôh tá chiâng, klêi mê hriâm tŏn hiăng rế chiâng. Pôa A Lip hnê tŏn chêng djâ lăm mơđah tŏn chêng a hên tíu, a mơnê hên kơ pôa Alip’’.

Tung plâ vâ chê 20 hơnăm kố, ngê̆ nhân A Lip ôh tá chôu pâ xếo tơná hiăng hnê tŏn chêng ăm to lâi lâm hriâm tŏn dêi mâu ki hiăng kân, mâu vâi o rơxông nếo a mâu pơlê dêi mâu cheăm tung kơpong. Pôa Sôk ro tối: tâng mâu rơxông nếo vâ hmâng, vâ hriâm tŏn chêng a kô ối pơtối hnê.

“Xâu lơ hía lôi, mê á mơ-eăm hnê ăm mâu rơxông nếo. Hdrối nah, mâu vâi hdrêng ôh vâ hmâng, nôkố vâi o rơxông nếo vâ tơkŭm dêi pú, lăm tơ’noăng tung cheăm, tơring kong pơlê. Á cho ngế đảng viên mê á thế mơ-eăm hnê, púi vâ xo ah hmôi rak dêi tơdroăng ki lĕm tro dêi kuăn ngo tơná’’.

A cheăm Glar, tíu ki hên kuăn pơlê cho mơngế Bơhnéa, rêm ngế đảng viên cho dêi mâu ngế ki djâ troăng a hdrối kum kuăn pơlê rak túa lĕm tro ton nah ƀă mơnhông cheăng kâ rêh ối. Ngoh Sin – Kăn hnê ngăn Chi bô̆, thôn trưởng pơlê Dôr 1, đi đo kơhno hnê ăm mâu droh vâi o rơxông nếo thế rak tơniăn prôk drô troăng, rak tơniăn pơlê pơla. Rơpŏng hngêi ngoh xuân djâ troăng ahdrối tung ‘mâi pêt kơphế, pêt tiô pơkâ 4C ƀă mơhnhôk kuăn pơlê pêi ƀối vâ tơƀrê tung pêi cheăng kâ:

“Djâ troăng a hdrối mê á ôh tá tối hên, mê klêi tối thế  pêi, pêi tâi ivá hlối kum kuăn pơlê. Xut tah hrâ mơnguâ kơdroh kơtiê thế kơhnâ pêi, klêi mê tối khĕn kuăn pơlê nếo pêi ƀối. Pơtih 2-3 hơnăm hdrối, pin pơtối ‘mâi pêt kơphế, kuăn pơlê ngăn pin pêi hôm rơkê pêi hôm lĕm  há, klêi mê vâi nếo pêi ƀối. A tối kơphế cho hdrối nah pêt ton, pêi ôh tá châ xo hên, nôkố ‘mâi pêt châ xo hên tâ’’.

 Nôkố, Đảng ƀô̆ cheăm Glar, tơring Đăk Đoa ai 15 Chi ƀô̆ ƀă 160 ngế đảng viên tung mê ai 100 ngế đảng viên cho kuăn ngo. Mâu đảng viên đi đo djâ troăng ahdrối pêi tro mâu tơdroăng mơhnhôk tơ’noăng pâ nhoăm tơnêi têa xuân môi tiah mơjiâng thôn pơlê nếo, pleăng tơnêi pro troăng, kơdroh kơklêa - xăm kơtiê, rak tơniăn pơlê cheăm. Rơtế ƀă Tơnêi têa tơdroăng ‘no liăn mơjiâng tơmeăm khoăng, môi tuăn dêi tâi tâng khu cheăng kal kí, kuăn pơlê tung cheăm, Glar hiăng klêi pêi pro tơdroăng mơjiâng thôn pơlê nếo hơnăm 2017 ƀă dế pơtối mơjiâng thôn pơlê nếo tiô pơkâ mơnhông mơdêk.

Pôa Y Suôn – Kăn phŏ hnê ngăn Đảng dêi Vi ƀan cheăm Glar, ăm ‘nâi:

‘’Đảng ủy cheăm tơmâng khât tơdroăng tơ’mot Đảng ƀă đảng viên tung kơpong hdroâng kuăn ngo. Ƀă đảng viên a pơlê cho mơngế ki pêi hnoăng cheăng hnê tối tơdroăng kal kí, ‘na tuăn mơno ăm kuăn pơlê  tung pơlê. Ing mê rak tơniăn kal kí, tơniăn pơlê pơla tung pơlê cheăm, vâ mơdêk ivá cheăng, pơtối pê klêi hnoăng cheăng dêi mơngế đảng viên, mơnhông tuăn loi pơla đảng ƀă kuăn pơlê tung cheăm’’.

Nôkố lâp tung cheăm Glar bú ối 4% rơpŏng kơtiê, mâu pơkâ dêi cheăm thôn pơlê nếo châ rak vế, tơmeăm khoăng mơjiâng a thôn pơlê rế lĕm tơƀrê tâ. Kring gak tơniăn, cheăng kâ rế xông tơƀrê, túa lĕm tro châ rak vế, tung tơdroăng pêi tơƀrê mê ai hnoăng veăng ‘no ôh tá la lâi pơtê dêi mâu đảng viên kuăn ngo a Glar, ăm pơlê rế ton rế xông kro mơdrŏng.