Hơnăm kố cho hơnăm ki apoăng, troăng ki mơ’no têa sap ing Long têa Ia Mơr hiăng bro klêi, ăm têa troh a mâu ƀăng klâng dêi kuăn pơlê thôn Klah, cheăm Ia Mơr. Kố xuân cho hơnăm ki apoăng, vâi krâ nhŏng o mơngế Jarai a Ia Mơr pêt báu klâng a ƀăng klâng ki kân rơdâ ki hdrối nah bu chiâng chối báu chiâk. Pôa Siu Thọ, ngế ki pơkuâ thôn ăm ‘nâi, tung rơnó pêi ki apoăng, vâi krâ nhŏng o ối trâm hên tơdroăng ki tá hâi hmâ, la ki dâi lĕm xuân châ 4 tâ̆n/1ha, tâk 4 hdroh tâng pơchông ƀă pêt chói báu chiâk.

Tơdroăng kố kum mâu rơpŏng kuăn pơlê tung pơlê loi tơngah pơxiâm mot tung rơnó khía hngíu:

“Hdrối nah mơdâ pêt báu môi rơnó drêng poê rêm hơnăm bu châ sap ing 1 – 2 tă báu xo, nôkố pêi châ péa rơnó rêm hơnăm poê châ sap ing 7 – 8 tâ̆n tung môi ha. Vâi krâ nhŏng o nôkố xúa hdrê báu ki nếo dâi lĕm kơpâu, vâi krâ nhŏng o phiu ro khât. Mơnê Đảng, Tơnêi têa hiăng kum vâi krâ nhŏng o”.

Rơtế ƀă long têa kân mơ’no têa tơƀrê, mê kơchơ tê mơdró hiăng hlo ‘mâi mơnhông tâ, kum mâu khu mơdró kâ pêi lo kế tơmeăm, pro tơ’nôm ivá ƀă pro tơniăn pêi lo liăn ăm mâu ngế pêi cheăng a cheăm tơring. Ngoh Rơ Lan Bên, kot mâ hơnăm 1995, ối a pơlê Khôi, cheăm Ia Mơr phiu ro ăm ‘nâi, hơnăm kố kơlo liăn dêi 2 péa veăng ngoh tơniăn a kơlo sap ing 13 troh 15 rơtuh tung môi khế. Pakĭng mê, rơpŏng ối ai 2 sào kơphế, 6 sào klâng pêt báu ƀă to lâi to ro, mê xuân ai kế kâ kế ‘măn:

“Sap ing hâi ki mot pro kŏng nhân ăm Kŏng ti kơxu vâi khoăn ăm á kúa chhá kơxu tung 3 hơnăm, klêi 3 hơnăm á xo liăn mê bro hngêi tâi 200 rơtuh liăn. Hơnăm kơ’nâi nếo mê á roê rơxế nếo 57 rơtuh rơxế Sonic, mê kơxô̆ liăn hrê ăm kuăn hriâm nếo. Tung hngêi roê tŭm kế tơmeăm, nôkố rơpŏng hiăng chía tơniăn. Hdrối nah rơpŏng á xơpá khât, nôkố ôh tá tơmiât klâi xếo ‘na tơdroăng kơklêa”.

Ia Mơr cho cheăm tơkăng kong ai hên khôi túa kăch măng, dế châ mơjiâng bro hngêi trăng, troăng klông ƀă ai hên rôh ki tơ’lêi hlâu tung mơnhông nếo. Pôa Nguyễn Tuấn Anh, Kăn phŏ hnê ngăn Vi ƀan cheăm ăm ‘nâi, on tơhrik hiăng cho bro troh lâp lu thôn, pơlê; mâu hngêi trăng ki hôp tơdjuôm dêi pơlê, hngêi trung hriâm, hngêi pơkeăng cheăm xuân châ ‘mâi rơnêu, pro nếo tơdâng. Malối, troăng prôk tung thôn, prôk ngi klâng tá troh troăng prôk ngi kong pơlê pơrá hiăng ƀă dế châ bro hiăng vâ klêi, kum Ia Mơr tơdjêp tê mơdró tơ’lêi hlâu.

Pôa Nguyễn Tuấn Anh tối nhên:

“Troăng prôk nôkố xuân hiăng tơniăn, hbrâ vâ bro klêi troăng prôk ngi kong pơlê 665 ƀă hno têa tung klâng. Kố cho mâu tơdroăng ki kal vâ vâi krâ nhŏng o kuăn pơlê prôk, chơ mâu kế tơmeăm, mơdêk cheăng kâ a cheăm Ia Mơr mơnhông”.

Maluâ tơdroăng rêh ối dêi kuăn pơlê cheăm tơkăng kong Ia Mơr, tơring Čư̆ Prông ối hên xơpá, la rơtế ƀă tơdroăng ki tơmâng ngăn ‘no liăn cheăng dêi khu kăn pơkuâ, hdroâng kuăn ngo akố dế rế hía ai hên tơdroăng ki tơ’lêi hlâu tâ, pro ivá vâ kum vâi krâ nhŏng o mơ-eăm mơjiâng tơdroăng rêh ối phâi tơtôu, mơnhông; kum rak vế tơdroăng ki tơniăn a kơpong tơkăng kong peăng hâi lu dêi Tơnêi têa.