Ôh ti ‘nhó kal krếo phôn ăm rêm ngế, lơ troh a hngêi mâu đảng viên vâ tơbleăng hâi chôu hôp chi ƀô̆ xuân môi tiah mâu tơdroăng cheăng kal ki ê, nôkố, bu ƀă Zalo, pôa Lò Văn Oai, kăn pơkuâ chi ƀô̆ hlối cho ngế ki pơkuâ pơlê Mạt, cheăm Mường Lèo, tơring Sốp Cộp, kong pơlê Sơn La hiăng tơ’lêi hlâu tung tơdroăng ki tơkŭm krếo đảng viên.

“Tá hâi châ hriâm ‘na kong ngê̆ thong tin, la ngin xuân mơ-eăm roê 1 toăng kơmăi tĭnh, 1 toăng kơmăi in vâ hriâm. Chi ƀô̆ ngin hiăng bro ƀă tơkŭm châ 31 ngế tung Zalo, ôh tá tối mơngế đảng viên hơnăm hiăng krâ kô tơbleăng tiô túa ki ê. Ai Zalo dêi chi ƀô̆ nôkố, tơbleăng hâi hôp ăm đảng viên ƀă mâu tơdroăng ki ê xuân tơ’lêi hlâu tâ”.

Tơdroăng ki pêi cheăng dêi Chi ƀô̆ pơlê Mạt xuân rế hía rế hơ’lêh ing ngế ki pơkuâ râ Đảng rơkê kong ngê̆. Mâu tơdroăng ki kal pơkuâ, hnê mơhno tung mơjiâng thôn pơlê nếo, hơ’lêh mâu hdrê pêt, mơnăn păn hdrối nah ôh tá rơkê ‘na túa ki pêi, mê nôkố ƀă tơdroăng ki hlê plĕng, kih thuât ing Internet gá hiăng ai.

Pơle Mạt cheăm Mường Lèo hdrối nah xơpá khât, nôkố vâi krâ nhŏng o hiăng ‘nâi xúa khoa hok kih thuât tung pêi kế tơmeăm, ƀă pêt lối 50 ha báu, 25 ha pôm, 25 ha loăng plâi kâ; păn mơnăn mơnoâ vâ chê 4 rpơâu to í peâp, kơpôu, ro; mơjiâng 2 khu pêi cheăng tơrŭm pêi chiâk deăng ƀă hên ki ê kơxô̆ rơpŏng kơtiê, vâ chê kơtiê dêi pơlê kơnôm ing mê hiăng kơdroh hên, troh nôkố bu ối 6%. Nâ Lường Thu Hương, đảng viên chi ƀô̆ pơlê Mạt tối:

“Á hiăng xúa khoa hok kih thuât, hriâm ƀối tơ’nôm tung măng túa ki păn kơpôu ro, pêt mâu hdrê loăng vâ ai plâi kơtóu hên, tê châ liăn kơnâ. Cho đảng viên á xuân mơdêk hnoăng cheăng, hnê tối ăm vâi krâ nhŏng o túa ki păn mơnăn mơnoâ tơƀrê".

Mâu tơdroăng ki tro ‘ló, túa pêi ki tơƀrê vâ mơnhông cheăng kâ, mơjiâng thôn pơlê nếo dêi hên kong pơlê, hên hdroâng kuăn ngo châ kăn pơkuâ chi ƀô̆, khu kăn pơkuâ râ Đảng rơtế ƀă mâu đảng viên dêi pơlê kơhnâ hnê tối tung trang krê, tung hô̆i, tung khu. Pôa Giàng A Dệnh, Kăn pơkuâ chi ƀô̆ hlối cho ngế ki pơkuâ pơlê Sam Quảng tối:

“Ngăn tung măng pơlê pơla xuân ai hên ƀai chêh ki ro ‘na đảng viên ki djâ troăng ahdrối, ngế ki pêi mâu tơdroăng cheăng ki lĕm, á tối troh đảng viên tung chi ƀô̆. Tung um tơvi ƀă mâu tơdroăng tối tơbleăng tung um tơvi mê xuân hiăng hriâm ƀối, xúa khoa hok kih thuât tung pêi chiâk pêi deăng;râ đảng, chi ƀô̆ xuân hiăng hriăn ngăn, tăng ‘nâi, hriâm ƀối vâ ‘mot tung tơdroăng tơbleăng ăm kuăn pơlê”.

Pôa Phan Thanh Lăng cho kăn ƀô̆ tơring, châ pơtroh vêh xo pêi dêi hnoăng cheăng pơkuâ ngăn Đảng cheăm tơkăng kong ki malối xơpá Mường Lèo, tơring Sốp Cộp, kong pơlê Sơn La ăm ‘nâi: Đảng ủy cheăm hiăng mơhnhôk mâu chi ƀô̆ roê kơmăi tĭng, kum ăm tơdroăng cheăng tơdjuôm. Troh nôkố, 10/17 chi ƀô̆ a cheăm hiăng ai kơmăi tĭnh; mâu kăn pơkuâ chi ƀô̆ pơrá hbrâ tí tăng ‘nâi, hriâm ƀối vâ xúa kong ngê̆ thong tin tung hnê mơhno pơkuâ.

Pakĭng mê, Đảng ủy cheăm xuân pơkâ kơtăng troh tâi tâng kăn ƀô̆, kong chưk, đảng viên mơdêk mâu tơdroăng ki tro dêi kong ngê̆.

“Á hnê mơhno kăn ƀô̆, kong chưk chêh tối tŭm mâu tài khoản trang măng pơlê pơla, mâu khu Zalo vâ pro tiah lâi ai hnoăng cheăng pôu râng tung tơdroăng ki xúa ƀă tơ’lêi hlâu tung pơkuâ ngăn dêi râ kơpêng. Kơhnâ mơ’no tơbleăng tơdroăng ing mâu trang ki tơbleăng mơ’no ki khât dêi hlá tơbeăng, rơ’jíu Tơnêi têa, kong pơlê; séa ngăn kơtăng pôi tá tơbleăng mâu tơdroăng ki tá hâi châ mơnhên, tơdroăng ki ‘mêi, ôh tá tro ƀă hên ki ê bro ăm kuăn pơlê ai tuăn tơmiât ôh tá tro, ôh tá loi tơngah ƀă pơlê pơla, ƀă Đảng, Tơnêi têa. Pakĭng mê, mơhnhôk mâu chi ƀô̆ xup um, video ‘na mâu tơdroăng ki pêi pro tro dêi tơná, chi ƀô̆, ing mâu tơdroăng ki kŭn má môi tiô pơkâ cho xo tơdroăng ki lĕm, tah lôi tơdroăng ki ‘mêi”.

Kơnôm xua kong ngê̆ thong tin, mơdêk tơdroăng ki tro ‘ló dêi măng pơlê pơla, mâu đảng viên a cheăm tơkăng kong Mường Lèo, tơring Sốp Cộp, kong pơlê Sơn La ‘mâi rơnêu mâu tơdroăng ki xơpá a cheăm tơring tung pơla mơjiâng thôn pơlê nếo môi tiah: tung cheăm, tíu kuăn pơlê rêh ối tá hâi ai kơdrâm, tơdroăng ki hriâm ối iâ, ki hlê tá tơ’mô, tơ’lêi tro vâi pro pơxúa ăm dêi tơná, rĕng loi tiô mâu tơdroăng khôp ki ôh tá châ Tơnêi têa ăm phêp. Ing mê ăm hlo hnoăng cheăng djâ troăng ahdrối dêi đảng viên châ mơhno nhên tung mâu kơvâ cheăng.