Kơdroh 10% kơxô̆ rơpŏng dế kơtiê nôkố - mâu hơnăm hdrối, kố cho kơxô̆ ki ro, thăm nếo cho ôh tá tơmiât troh tung pêi pro tơdroăng kơdroh kơtiê a mâu kong pơlê Tây Bắc rêm hơnăm, xua ki khât gá, kơxô̆ ki châ hmâ bu ing 3 – 4%. Laga a tơring tơkăng kong Sông Mã, kong pơlê Sơn La, tung 3 hơnăm vêh ngi kố, kơxô̆ rơpŏng kơtiê kơdroh châ rêm hơnăm hiăng ối a kơxô̆ ki lố 10%. Ai mâu cheăm môi tiah Chiềng Khoong, Mường Hung ƀă hên ki ê kơxô̆ ki kố châ ối hên tâ mê. Pôa Đặng Văn Cương, Kăn phŏ hnê ngăn Vi ƀan cheăm Chiềng Khoong, tơring Sông Mã, kong pơlê Sơn La ăm ‘nâi:

“Tung mâu hơnăm hdrối nah cheăm Chiềng Khoong hiăng kơdroh ing 10 troh 14% rơpŏng kơtiê, môi tiah hơnăm 2023 cho 14%; túa pơkâ pêi hơnăm 2024 cho 12%”.

Tiô pôa Cương, châ tơdroăng kố cho kơnôm ing khu râ Đảng, kăn pơkuâ rêm râ ing kong pơlê troh tơring, cheăm hiăng kơtăng tung tơdroăng pơkâ hơ’lêh pêt mâu hdrê loăng, mơnăn păn tiô troăng pêt mơjiâng mâu hdrê, păn mơnăn ki tê kơnâ, tro ƀă ki ai hlâu, pơxúa dêi cheăm pơlê. Môi tiah cheăm Chiềng Khoong, xúa ki pơxúa tơnêi kơdrum kân, pêi pro tiô troăng hơlâ pơkâ dêi kong pơlê, tơring ‘na hơ’lêh ƀăng tơnêi pêt alâi, pôm loăng ki ôh tá lĕm chiâng pêt mâu hdrê loăng plâi kâ, troh nôkố, ƀăng tơnêi pêt loăng plâi kâ dêi cheăm hiăng châ vâ chê 1.400 ha; tung mê krê plâi rơkuâ chí lối 1.100 ha.

A kong pơlê Yên Bái, mơnhên tơdroăng pơkâ tơnêi têa mơnhông cheăng kâ rêh ối pơlê pơla kơpong hdroâng kuăn ngo ƀă peăng kong ngo pơla hơnăm 2021 – 2030 cho pơkâ troăng hơlâ ki kal tung pêi pro pơkâ mơnhông krá tơniăn kơpong hdroâng kuăn ngo ƀă peăng kong ngo, xua mê kong pơlê hiăng thăm mơdêk hên troăng hơlâ vâ pêi tơdroăng kố. Tung mê, pakĭng mâu rôh hôp hnê hriâm, Yên Bái xuân tơtrŏng troh tơdroăng ki tơkŭm mâu khu lăm hrâm tâp, hnê tối ăm dêi rơpó mâu tơdroăng ki rơkê plĕng a mâu kong pơlê tung tơnêi têa ai mâu túa pơkâ cheăng ki tơƀrê, vâ hơ’lêh mâu túa tơmiât, mơdêk ki hlê plĕng, túa ki rơkê ăm kuăn pơlê hdroâng kuăn ngo tung mơnhông cheăng kâ ƀă mơdêk rơdêi hnoăng cheăng kơdroh kơtiê. Ngoh Giàng A Tuấn, ối a cheăm La Pán Tẩn, tơring Mù Cang Chải, Yên Bái tối:

“Klêi kơ’nâi á châ hriâm mê á hiăng rơkê hlê dêi tơdroăng cheăng, ai cheăng pêi, pêi môi hâi châ 400 – 500 rơpâu liăn”.

Pakĭng kơxô̆ liăn Tơdroăng pơkâ tơnêi têa mơnhông cheăng kâ rêh ối pơlê pơla kơpong hdroâng kuăn ngo ƀă peăng kong ngo pơla hơnăm 2021 – 2030, ing apoăng hneăng troh nôkố, kong pơlê Yên Bái xuân mơhnhôk veăng tơlo ing hên tíu vâ châ lối 12 rơpâu rơtal liăn mơnhông cheăng kâ rêh ối pơlê pơla kơpong hdroâng kuăn ngo ƀă peăng kong ngo, tơkŭm tung tơdroăng tŏng kum cheăng kâ, ‘no liăn bro hngêi trăng troăng klông, hnê hriâm, khăm pơlât, kơdroh kơtiê, mơjiâng thôn pơlê nếo ƀă hên ki ê. Xua mê, kơxô̆ rơpŏng kơtiê tung lâp kong pơlê a hơnăm 2023 hiăng kơdroh 3,7%, tơkâ luâ ƀă túa pơcháu mơ’no cho 3,5%.

70 hơnăm tơleăng, Điện Biên hâi kố hiăng chiâng môi tung mâu kong pơlê ki rơdêi tung mơnhông rĕng tung kơxô̆ 14 to kong pơlê tung kơpong thông ƀă peăng kong ngo peăng kơnhŏng. Hơnăm 2023, ki têi mơdêk GRDP dêi kong pơlê tiô riân châ 7,1%, hên tâ tâng pơchông ƀă pơkâ hneăng hôp Đảng ƀô̆ kong pơlê, châ chía hên tâng vâ pơchông ƀă pơkâ tơdjuôm lâp tơnêi têa, ối tung top apoăng dêi 14 to kong pơlê tung kơpong a thông ƀă peăng kong ngo peăng Kơnhŏng.

Kơxô̆ liăn châ xo ing ôm hyô tiô riân châ 1.750 rơtal ƀă xuân cho hơnăm ki apoăng ôm hyô dêi kong pơlê châ 1 rơtuh ngế tơmối. Kơxô̆ rơpŏng kơtiê nôkố bu ối dâng 26%.

Pôa Lê Thành Đô, Kăn hnê ngăn Vi ƀan kong pơlê Điện Bên ăm ‘nâi: Châ tơdroăng kố cho kơnôm kong pơlê hiăng mơdêk rơdêi mâu tơdroăng ki ai hlâu, ki rơdêi ai hlâu, malối cho ki kơnía ton nah tơnêi têa tung rôh tơplâ Điện Biên Phủ; mơdêk tơƀrê tơ’mot ƀă xúa kơxô̆ liăn ‘no pêi cheăng. Rơtế amê, cho pêi pro tơdâng tơ’mô, tơƀrê mâu hnoăng cheăng, troăng hơlâ hnê mâu ngế cheăng, malối cho mâu ngế cheăng ki rơkê ăm mâu kơvâ cheăng kâ ki xiâm, ki rơdêi môi tah kơmăi kơmok, pêi chiâk deăng xúa kơmăi kmok chal nếo, ôm hyô ƀă hên ki ê. Pôa Lê Thành Đô, Kăn hnê ngăn Vi ƀan kong pơlê Điện Biên tối nhên:

“Tung la ngiâ ah, kăn pơkuâ kong pơlê tơhrâ kô mơeăm, kơhnâ hơ’lêh nếo tơmiât rơkê, khŏm kơtăng tâ nếo tung pơkuâ, hnê mơhno, pơkuâ tiô tơdroăng ki hbrâ, ƀĕng ƀeăn, ‘nâi nhên rôh tơ’lêi, mơeăm tơkâ luâ xơpá, pơloăng mơnúa, khŏm mơ-eăm mơjiâng ƀă mơnhông kong pơlê Điện Biên chiâng kong pơlê chía mơnhông tung kơpong”.

Tơdroăng pêi pro kơdroh kơtiê rĕng, krá ton a mâu kong pơlê kơpong Tây Bắc hiăng châ tơdroăng ki tơƀrê ing tơdroăng khu râ Đảng, khu kăn pơkuâ mâu cheăm, tơring mơjiâng tơdroăng pêi pro tro ƀă tơdroăng ki ai khât; mơhnhôk tá khu pơkuâ tơdroăng kal kí rơtế veăng ƀă kơhnâ tí tăng, mơdêk mâu tơdroăng ki ai hlâu, ki rơdêi dêi rêm kong pơlê. Malối, Pơkâ kơxô̆ 11 hâ lơ 10/2/2022 dêi Khu xiâm pơkuâ tơdroăng kal kí ‘na kơpong a thông ƀă peăng kong ngo peăng Bắc Bộ troh hơnăm 2030, troăng ngăn troh hnăm 2045 hiăng, dế châ tơbleăng kô môi tah ivá mơdêk kum kơpong kố mơnhông tơƀrê.