Rôh hôp kơ-êng ƀă mâu rơkong kơ-êng dêi khu kăn Kuô̆k hô̆i mot tơdrăng tung mâu tơdroăng ki tá hâi teăm pêi pro klêi, mâu tơdroăng pêi pro ki ôh tá tơniăn tung pêi pro 3 tơdroăng pơkâ tơnêi têa ‘na mơjiâng thôn pơlê nếo; mơnhông mơdêk cheăng kâ reh ối pơlê pơla kơpong hdroâng kuăn ngo ƀă peăng kong ngo; xut tah hrâ mơnguâ kơtiê xơpá krá ton.

Pôa Mai Văn Hải, ngế lo ing Thánh Hóa êng:

“Klêi kơ’nâi lối 2 hơnăm tơbleăng pêi pro Tơdroăng pơkâ tơnêi têa mơnhông mơdêk cheăng kâ rêh ối pơlê pơla kơpong hdroâng kuăn ngo ƀă peăng kong ngo pơla hơnăm 2021 – 2025 hiăng pêi klêi mâu tơdroăng ki chía hlo tơƀrê. La pakĭng mê tơdroăng ki pêi pro mâu tơdroăng tơkêa ki kŭn, mâu tơdroăng ki kal dêi tơdroăng ‘no liăn ối hrá ƀă hlo tơvâ tơvân hên ‘na troăng hơlâ pơkuâ ngăn. Pâ ngế xiâm pơkuâ ăm ‘nâi tíu lâi ki xơpá, tơvâ tơvân kân má môi xiâm kối ƀă troăng hơlâ ‘mâi rơnêu. Mơnê ngế xiâm pơkuâ”.

Pôa Hầu A Lềnh, Ngế xiâm pơkuâ Vi ƀan hdroâng kuăn ngo ăm ‘nâi, tơdroăng pơkâ dêi tơnêi têa ‘na mơnhông mơdêk cheăng kâ rêh ối pơlê pơla kơpong hdroâng kuăn ngo ƀă peăng kong ngo cho xơpá má môi. Xua tơdroăng pơkâ pro kân ƀă ối a mâu kong pơlê tơring, cheăm ki xơpá, ôh tá tơniăn. Mâu tơdroăng tơkêa, mâu troăng hơlâ châ tơkŭm tung tơdroăng kố cho tá troăng hơlâ tŏng kum dêi pơla hơnăm hdrối ki ối xêt khât:

“Tơmiât hên má môi nôkố cho tung pơla tơbleăng a ƀăng tơnêi xua ai mâu tơdroăng tơkêa tơbleăng nhên troh a thôn, pơlê, troh rêm rơpŏng hngêi. ‘Na mâu troăng hơlâ tŏng kum mê mâu hlá mơ-éa hnê mơhno hiăng pơkâ tŭm, laga ôh tá kâi ví mâu tơdroăng ki trâm tung tơdroăng ki ai khât ai mâu tơdroăng ki trâm klêi mê. Tơnêi têa kô mơdêk hnoăng cheăng séa ngăn, séa ngăn kơtăng ƀă hnê mơhno tŏng kum teăm tơdrêng mâu tơdroăng ki xơpá, tơvâ tơvân ăm kong pơlê.

Ƀă mâu kong pơlê, tung mâu hlá mơ-éa hnê mơhno rôh kố kô mơdêk klâ xoăng tâi tâng mâu kơxô̆ liăn vâ ăm kong pơlê pơkâ xêh, tơkŭm khu ngế vâ tơbleăng”.

Pơtối kơ-êng ‘na tơdroăng kố, jâ Ma Thị Thúy, ngế lo ing Tuyên Quang êng tiah kố: “Hâi lơ 23/2/2023, Ngế pro xiâm hnê ngăn Chin phuh hiăng ai hlá mơ-éa 71 pơtroh ăm mâu khu xiâm, kơvâ cheăng tŏng kum mâu tơdroăng xơpá, tơvâ tơvân ‘na pêi pro 3 tơdroăng pơkâ dêi tơnêi têa, tung mê ai Tơdroăng pơkâ tơnêi têa mơnhông mơdêk cheăng kâ rêh ối pơlê pơla kơpong hdroâng kuăn ngo a peăng kong ngo.

Ƀă hnoăng cheăng cho kơ koan teăng mâ dêi Tơdroăng kố, Ngế xiâm pơkuâ ăm ‘nâi drêng lâi Khu xiâm pêi pro klêi tiô pơkâ dêi Hlá mơ-éa 71 vâ ăm mâu kong pơlê tơbleăng pêi pro”.

Pôa Hầu A Lềnh, Ngế xiâm pơkuâ Vi ƀan hdroâng kuăn ngo ăm ‘nâi hlá mơ-éa hiăng châ mâu khu xiâm, kong pơlê tơbleăng hên troăng hơlâ, troăng tŏng kum ki ê ai tơdjâk troh kơpong hdroâng kuăn ngo kal athế châ tơbleăng ƀă ‘mot tơ’nôm ‘mâi rơnêu tơtro ƀă tơdroăng ki ai khât:

“Troh hâi lơ 30/3 cho 15/15 khu xiâm, kơvâ cheăng châ pơcháu hnoăng cheăng hiăng tơleăng klêi ƀă ai hlá mơ-éa tiâ mơnhên, hnê mơhno ăm mâu kong pơlê tơleăng châ 121 mâu tơdroăng xơpá, tơvâ tơvân. Tiah mê, khu ki má môi kô klêi hdrối hâi lơ 30/3. Khu ki má péa cho khu mâu hlá mơ-éa tá hâi châ pơkâ mê bu ối 2 hlá mơ-éa. Môi cho hnê mơhno pêi pro mâu tơdroăng tơkêa ki kŭn tơdroăng tơkêa 1, tơdroăng tơkêa 9 xua Vi ƀan hdroâng kuăn ngo pơkuâ po ƀă hnê mơhno pêi pro tơdroăng tơkêa 2 dêi Khu xiâm tối tơbleăng tơdroăng kal ing troăng hyôh um, mê cho khu ki tá hâi châ pơkâ.

Khu ki má pái cho khu mâu hlá mơ-éa, hnê mơhno dêi mâu khu xiâm, kơvâ cheăng la ối hlo ôh tá tơniăn, ôh tá tơdâng ƀă dêi rơpó ki kal athế ‘mâi rơnêu, tung mê, ai Pơkâ 27. Chiâng vâ tối troh nôkố mê tâi tâng mâu tơdroăng ki kal tiô hlá mơéa 71 dêi Ngế pro xiâm hnê ngăn Chin phuh hiăng hnê mơhno klêi”.

Xuân a rôh kơ-êng, pôa Hầu A Lềnh, Ngế xiâm pơkuâ Vi ƀan Hdroâng kuăn ngo tiâ ‘na mâu tơdroăng ki xơpá, tơvâ tơvân tung troăng hơlâ tŏng kum hdroâng kuăn ngo tơdjâk troh klâ xoăng cheăm, thôn kơpong hdroâng kuăn ngo, peăng kong ngo:

“Mâu cheăm, thôn ai 15% cho kuăn pơlê hdroâng kuăn ngo tơngi klêng, mê châ mơnhên cho cheăm lơ thôn pơlê, kơpong hdroâng kuăn ngo. Má péa, cheăm kơtiê, thôn kơtiê cho mâu cheăm ai 15% kơxô̆ kuăn pơlê hdroâng kuăn ngo rêh ối a mê ƀă rơpŏng kơtiê tơngi klêng me cho cheăm kơtiê.

Tơdroăng ki klâ xoăng kố trâm tơdroăng mê cho, drêng mơnhên châ cheăm kơtiê, thôn kơtiê, mê ƀă mâu cheăm, thôn ai kơxô̆ rơpŏng kơtiê pá xôp15% mê ôh ti xê cheăm kơtiê xếo, cheăm malối xơpá xếo, ƀă kố cho môi tơdroăng ki xơpá”.