Ƀă kơdrum kơphế kân rơdâ lối 1,1 ha dế vêh pêt hơnăm má pái, rơnó krí hơnăm kố, rơpŏng pôa Triệu Văn Phúc, ối a thôn 3, cheăm Čư Suê, tơring Čư Mgar, kong pơlê Dak Lak châ dâng 5 tâ̆n kloăng kơphế. Pôa tối ăm ‘nâi: pêi lo hơnăm kố châ péa xôh mâu hơnăm hdrối mê hía nah. Tá hâi tối troh pêi lo liăn kô ối tâk tơ’nôm kơnôm mâu loăng ki pêt tơvât. Ƀă kơlo yă môi tiah nôkố, rêm hơnăm rơpŏng pôa pêi lo kơpêng pá xôp 800 rơtuh liăn. Tiô pôa Phúc, châ pêi lo liăn môi tiah mê kơnôm tơdroăng ki pơhlêh troăng pêt mơjiâng tơmeăm tiô hnê mơhno dêi Khu tơrŭm pêi chiâk deăng tê mơdró Bình Minh.

“Khu tơrŭm cheăng hnê mơhno ăm kuăn pơlê, kuăn pơlê pêi tiô troăng pêi khu tơrŭm cheăng ‘na kih thuât rak ngăn, pơkeăng rak vế hdrê kơchâi plâi pôm, oâ tung tơnêi, ...Pêi tiô tơrŭm cheăng mê ai hên tơdroăng ki pơxúa, pêi lo liăn hên tâ. Xua nah pêi tiô túa ki rơkê tơtro dêi ngế krê mê pêi lo ôh tá châ hên tiô vâ’’.

Xuân veăng tơrŭm cheăng ing mâu hâi apoăng mơjiâng, nâ Triệu Thị Hạnh tối, rêm ngế pơrá châ lăm pơtâp, hriâm tâp mâu ki rơkê khoa hok kih thuât. Mâu ngế tơrŭm cheăng tung Khu tơrŭm cheăng hơnăm ối nếo rơkê ối tŏng kum hnê mơhno kuăn pơlê krâ klŏng tôh têa kơdĭng, mơhnhôk mâu khu pú pêt tiô troăng hưh cơ, lĕm ƀă kong prâi. Tơdrêng amê, tơrŭm cheăng kum hbrâ mâu troăng pêi ing pêt mơjiâng, krí xo tơmeăm troh tê tơmeăm.

“Sap ing pơxiâm cho mâu ngế tơrŭm cheăng dêi Khu tơrŭm cheăng cheăm Bình Minh mê xuân veăng hên lâm hnê pơtâp. Klêi kơ’nâi pơtâp mê á xuân pói vâ pơhlêh troăng tơmiât pêi, ai drêng pêi tê hmâng vâ mê á hlo ôh tá châ tơƀrê. Hlo Tơnêi têa xuân ai hên troăng hơlâ ăm tơrŭm cheăng cheăm vâ ăm mâu ngế tơrŭm cheăng hlê plĕng nếo tâ, pêt mơjiâng tơmeăm pêi lo ing chiâk deăng môi tiah kơphế, tiu pêt tơvât pêi lo châ hên’’.

Mơjiâng sap hơnăm 2016, Khu tơrŭm cheăm pêi chiâk deăng ƀă tê mơdró Bình Minh ai 27 ngế tơrŭm cheăng cho kuăn pơlê mơngế Dao a pơlê Bình Minh, thôn 3, cheăm Čư Suê, tơring Čư Mgar. Nâ Triệu Thị Châu, Kăn pơkuâ Khu tơrŭm cheăng tối ăm ‘nâi, kơnôm ai 17 ngế tơrŭm cheăng hriâm đăi hok, cao đẳng, xua mê khu tơrŭm cheăng pêi pro mâu tơdroăng tơdâng rĕng. Troh nôkố khu tơrŭm cheăng hiăng ai môi kơpong pêt lối 108 ha kơphế pêt tơvât hên loăng plâi môi tiah tiêu, sầu riêng, plâi ƀơr ƀă hía hé, ƀă mâu tơmeăm ai tíu tê tung kơchơ mơdró:

“Chế plâi kâu dêi Khu tơrŭm cheăng drêng tê tung kơchơ mơdró châ mơngế rôe xúa hâk vâ rôe. Nôkố tơ’nôm tơmeăm plâi sầu riêng têng ƀă plâi mit têng klêi kơ’nâi tê tung kơchơ mơdró mê xuân châ tơmối rôe xúa hâk vâ. Ing mê á tơmiât ti lâi pin ôh tá pro hôm tâ mê nếo ƀă mơ-eăm pro lĕm rêm tơmeăm vâ la ngiâ kêi đeăng chôa ‘lâng. Pói tơngah mâu tơmeăm dêi khu tơrŭm cheăng kô châ tê pakong kong pơlê, châ tê lâp tung tơnêi têa Việt Nam pin”.

            Kơnôm pơhlêh tơdroăng tơmiât, tơdjêp pêt mơjiâng tơmeăm tiô troăng krá tơniăn, tơdroăng rêh ối mâu khu tơrŭm cheăng đi đo châ mơdêk. Pêi lo liăn tơdâng ko mơngế dêi rêm rơpŏng châ sap ing 300 – 500 rơtuh liăn/hơnăm. Pôa Nguyễn Công Văn, Kăn phŏ hnê ngăn Vi ƀan tơring Čư Mgar mơnhên:

            ‘’Khu tơrŭm cheăng Bình Minh cho môi tung mâu khu tơrŭm cheăng pêi cheăng châ tơƀrê. Ôh tá xê to kơvâ kơphế mê vâi ối hbrâ tơdjêp vâ tê mâu tơmeăm ki ê ing pêi chiâk deăng, mâu plâi kâ ƀă vâi xuân hiăng pêi pro lĕm tro tơdroăng ai tŭm tơmeăm tung tơdroăng pêt mơjiâng tơmeăm pêi lo ing chiâk deăng ƀă tơdjêp tơdroăng ki kơnâ tê tơmeăm xua mê tơdroăng pêi cheăng tơniăn tâ. Môi tơdroăng ki ngin tơmâng ƀă ngin hlo hmiân tuăn tâ, mê cho hiâm mơno rŭm môi tuăn, tơdroăng ki tơmiât pêi rơkê tung Khu pơkuâ, vâi pơkuâ châ tơƀrê ƀă mơnhông tơdroăng kuăn pơlê pơkuâ dêi hnoăng cheăng tung khu tơrŭm cheăng’’.

            Khên tơnôu ti tăng xúa mâu troăng pêi nếo, tơdjêp pêt mơjiâng, uâ pro lĕm mâu tơmeăm, mâu kuăn pơlê pêi chiâk deăng mơngế Dao a pơlê Bình Minh hiăng kum mơjiâng mâu pơhlêh hên, mơdêk châ tơƀrê tơdroăng cheăng kâ ƀă ki kơnâ pêt mơjiâng tơmeăm pêi lo ing chiâk deăng tung kơpong hdroâng kuăn ngo a cheăm Čư Suê, tơring Čư Mgar.