Mâu kăn vâ môi tuăn ƀă luât pơkâ mơnúa xoăng râ ăm tơring tung pêi hnoăng cheăng rak ngăn, tơkŭm pêi mâu tơdroăng pơkâ dêi tơnêi têa tiô troăng rơhlâ: “Hô̆i đong hnê ngăn kuăn pơlê rêm râ châ pơkâ ‘mâi hơ’lêh tơdroăng pêi pro xing xoăng kơxô̆ liăn ‘no mơjiâng tơmeăm khoăng tơnêi têa, kơxô̆ liăn xúa đi đo pơla mâu tơdroăng pơkâ tơnêi têa tung pơkâ ‘no liăn mơjiâng tơmeăm khoăng ton hơnăm, pơkâ ‘no liăn cheăng rêm hơnăm, hbrâ hdrối liăn ngân tơnêi têa rêm hơnăm hiăng châ rêm râ kơpêng pơcháu’’. Mai Văn Hải, tung khu kăn Thanh Hóa tối tiah kố:

“Tơdroăng pêi kố kô xúa pêi tơdrêng luât pơkâ ki krê ăm tơdroăng tah xơpá, tơvâ tơvân tung hơnăm 2024 hơnăm 2025. Thăm nếo, Pơkâ dêi Kuô̆k hô̆i dế tơpui vâ tăng troăng tah ki xơpá, tơvâ tơvân, mơdêk rĕng pêi pro 3 Tơdroăng pơkâ dêi tơnêi têa pơla hơnăm 2021-2025 vâ mâu kong pơlê hbrâ liăn pơla mâu tơdroăng pơkâ dêi tơnêi têa ‘mâi hơ’lêh ing liăn kâ pêi cheăng dêi tơnêi têa chiâng liăn ‘no mơjiâng tơmeăm khoăng. Tâng châ ai tiah mê tơdroăng xo liăn ngân dêi mâu tơdroăng pơkâ tơnêi têa nếo châ tơniăn tiô tơdroăng hiăng pơkâ pêi”.

Tơdrêng ƀă xing xoăng râ cho xoăng liăn ngân. Mơhế ối ai mâu tơdroăng ki tô tuăn ‘na ivá cheăng tung xúa kơxô̆ liăn pê cheăng dêi râ tơring, la ki hên gá mâu kăn khĕn kơdeăn khât luât pơkâ xing xoăng, pơcháu liăn hrê đi đo dêi tơdroăng chêh tung hlá mơ-ea Pơkâ mê cho: Kuô̆k hô̆i pơkâ xing xoăng Ngế pro xiâm hnê ngăn Chin phuh pơcháu liăn ngân Xiâm tơnêi têa ăm kong pơlê tiô tâi tâng kơxô̆ liăn pơcháu ăm; Hô̆i đong hnê ngăn kuăn pơlê râ kong pơlê xing xoăng hrê đi đo troh tơdroăng tơkêa bro. Tâng kal, Hô̆i đong hnê ngăn râ kong pơlê pơkâ xing xoăng râ ăm Hô̆i đong râ tơring pơkâ.

Tơdjâk troh tơdroăng rak ngăn tơmeăm khoăng pơxiâm ai ing tơdroăng tơkêa bro tŏng kum mơjiâng pro mâu tơmeăm, mâu kăn pâ thế tí tăng ngăn nhên hdrối vâ pơcháu ăm kuăn pơlê, ngế xiâm tơrŭm cheăng ƀă thế mơdêk lăm ngăn rêi râ kơpêng, pơcháu hnoăng cheăng pêi kơ koan ki tơdjâk troh.

Nguyễn Thị Sửu, Khu kăn Thừa Thiên Huế púi vâ, tơdroăng tơbleăng Pơkâ ‘na mâu luât pơkâ pêi, luat tŏng kum ki krê xêh tung pêi pro mâu tơdroăng pơkâ dêi tơnêi têa kô cho xiâm ki tro vâ kum mâu kong pơlê tah xơpá , tơvâ tơvân, po troăng  ăm “mâu tíu ki pá hâ hó’’ vâ pê klêi tơdroăng pơkâ, tơdroăng mơnhông cheăng kâ - rêh ối dêi hơnăm 2024 tối krê ƀă plâ hneăng tối tơdjuôm:

“Tâi tâng mâu tơdroăng pơkâ dêi tơnêi têa xuân pơcháu ăm râ cheăm pro xiâm ‘no liăn mơjiâng pro, mâu tơdroăng tơkêa bro ki kân kô xing xoăng râ ăm kong pơlê lơ râ tơring. Tơdroăng ki kal xing xoăng thế chêh tối nhên, hleăng, ăm ‘nâi hnoăng cheăng pêi dêi tơná drêng mê Hô̆i đong hnê ngăn râ kong pơlê, Hô̆i đong hnê ngăn  râ tơring, Hô̆i đong hnê ngăn râ cheăm nếo pêi tro hnoăng cheăng tơná. Ing mê, mâu kăn Vi ƀan râ cheăm cho kơ koan ki mơjiâng luât nếo tơbleăng tŭm hnoăng cheăng pêi ƀă ôh tá ăm tơvâ tơvân mâu tơdroăng cheăng pêi mê vâ mơdêk pê klêi hnoăng cheăng ki hiăng pơcháu ăm tơrêm râ pêi”.

Ƀă 3 tơdroăng pơkâ tơnêi têa, hên mâu kăn tơngah Pơkâ mê châ tơbleăng kô ai hên ki pơ’lêh, pro tơ’lêi hlâu tung pêi cheăng vâ mâu kơpong kong ngo pơtối rak vế pêi lo tơmeăm khoăng ki ai hlâu, pêi tơƀrê mơ-eăm tâ nếo. Tạ Văn Hạ, Khu kăn Quảng Nam tối tiah kố:

“Ƀă 8 luât pơkâ mơnúa pêi mê a hlo tiah kố kô pêi tơƀrê tung tơdroăng mơdêk rĕng tơdroăng pêi pro dêi 3 Tơdroăng pơkâ tơnêi têa. Kố cho ki á tối kal thế séa ngăn pro ti lâi drêng rah xo, hiăng tối mơnúa thế ai teăng mâ, pơtih cho thôn pơlê, kơphô̆, kong ngo..., tâi tâng mâu ki mê drêng pin tối mơgêi tơdroăng hiăng pêi pro luât pơkâ ki mê, luât pơkâ mê thế ai tŭm tâi tâng tá mâu tơdroăng cheăng ki kố ki mê ƀă tung cheăm tơring’’.

Mâu kăn xuân tơngah, tơdroăng Pơkâ ‘na mâu luât, luât tŏng kum krê xêh tung pêi mâu tơdroăng pơkâ tơnêi têa châ Kuô̆k hô̆i tơbleăng, Chin phuh ƀă khu râ kơvâ cheăng kô rĕng pơkâ mâu tơdroăng pơkâ pêi, ‘na luât, hlá mơ-éa hnê vâ luât pơkâ mê rĕng châ pơtối pêi tơƀrê, châ xúa pêi tung rêh ối.