1.Tơdroăng pêi cheăng kâ Việt Nam hiăng vêh mơnhông, ối tung khu tơnêi têa ki pêi lo liăn ngân GDP hên ó má môi

Tơkâ luâ hên tơdroăng xahpá xua pơreăng kân COVID-19 ƀă mâu tơdroăng ki ai tơdjâk dêi lâp plâi tơnêi, Việt Nam hiăng châ ƀlêi chiâng, chía hôm tung rêm hnoăng cheăng, tơdroăng pêi pro rế tơkŭm hbrâ, mơdât, khăm pơlât tamo châi xua pơreăng pro, rế thăm mơdêk ‘mâi mơnhông tơdroăng pêi cheăng kâ - pơlê pơla, mơjiâng tơdroăng pêi cheăng krâ krê, tơná pơkuâ dêi xêh hnối rơtế pêi pro ƀă hnoăng cheăng hbrâ rơnáu hdrối, kơhnâ khât tung tơrŭm lâp plâi tơnêi trâu rơdâ ƀă tơƀrê.

Tơdroăng pêi cheăng kâ ki kân kĕng hiăng châ tơniăn, hiăng châ mơdât tơdroăng ki  liăn ôh tá kơnâ yă, mâu tơdroăng cheăng kâ ki xiâm hiăng châ rak vế tơniăn tung pơla dế ối trâm hên xahpá. Tơdroăng pêi lo liăn GDP tung hơnăm 2022 tiô tối hdrối kô pêi lo châ 8,02%, cho kơlo ki tâk hên má môi tung pơla hơnăm 2011-2022. GDP tâng vâ riân rêm ko mơngế a hơnăm 2022 tiô yă ki kơnâ nôkố mơni châ 95,6 rơtuh liăn/ngế, tơdâng 4.110 USD, tâk châ 393 USD tâng pơchông ngăn ƀă hơnăm 2021. Kơlo yă ki rôe tơmeăm CPI tâk châ 3,15% tâng pơchông ngăn ƀă hơnăm 2021, châ tro tiô tơdroăng ki Kuô̆k hô̆i hiăng pơcháu. Tơdroăng ki yă liăn ôh tá kơnâ tâng vâ riân tơdjuôm hơnăm 2022 tâk châ 2,59% pơchông ngăn ƀă hơnăm 2021, iâ tâ kơlo CPI vâ riân tơdjuôm (tâk châ 3,15%).

2.Hên tơdroăng ki kal châ pơkâ pêi pro ai pơxúa kân khât ƀă tơdroăng mơnhông dêi tơnêi têa

Hneăng hôp Khu xiâm Đảng má 5, ƀă má 6, hneăng 13 hiăng pơkâ pêi pro hên tơdroăng cheăng ki kal, môi tiah: Pơkâ troăng vâ hdró tâi tâng tơdroăng pêi cheăng tơnêi têa hneăng hơnăm 2021 – 2030 ƀă hnoăng cheăng vâ pêi pro troh a hơnăm 2050; Pơtối mơnhông ‘na tơdroăng cheăng kơmăi kơmok; túa pêi cheăng tiô chal nếo. Hơ’lêh nếo hnoăng pơkuâ ngăn dêi Đảng; Mơjiâng ƀă pêi pro tơniăn hnoăng cheăng Tơnêi têa tiô luât xah hô̆i chuh ngiah Việt Nam; Troăng tơdjâ, luât xiâm ‘na tơnêi tíu; ‘Na pêi chiâk pêi deăng, kuăn pơlê pêi chiâk deăng, thôn pơlê, tơdroăng pêi cheăng kâ khu pú hên; Thăm mơdêk ki rơkê dâi khât dêi khu đảng viên tung hnoăng cheăng chal nếo ƀă hên hĕng mâu tơdroăng ki ê.

Khu xiâm ngăn ‘na cheăng kal kí hiăng mơ’no 6 tơdroăng pơkâ kơpong mơnhông pêi cheăng kâ - rêh ối pơlê pơla, kring vế cheăng gak ngăn - rak vế troh hơnăm 2030, hnoăng cheăng vâ pêi pro troh a hơnăm 2045 ah nếo, mơjiâng chiâng tơdroăng ki vâ môi tuăn ó má môi ‘na ki hlê plĕng ƀă hnoăng cheăng tung tâi tâng Đảng, tâi tâng kuăn pơlê, tâi tâng khu lêng.

Ing mê, Kuô̆k hô̆i, Chin phuh hiăng ‘mâi rơnêu, mơnhên tơrêm tơdroăng cheăng, tơdroăng tơkêa bro, pơkâ ki nhên ƀă tơkŭm pêi pro mâu tơdroăng cheăng ki ai păng ‘nâng, po roh ki tơ’lêi hlâu vâ mơnhông krá tơniăn, tŭm têk dêi tơnêi têa tá dế nôkố ƀă tá mâu khế hơnăm la ngiâ.

3.Hnoăng cheăng mơjiâng, ‘mâi rơnêu pât cheăng Đảng, hbrâ mơdât kâ kơluâ, mâu tơdroăng xôi thăm rế ó

Hơnăm 2022, tơdroăng cheăng tơplâ, hbrâ mơdât kâ kơluâ hiăng châ pêi pro trâu rơdâ, tơrŭm cheăng krá tơniăn ƀă tơdroăng mơjiâng, ‘mâi rơnêu pât cheăng Đảng, tơplâ mơdât ‘na hiâm mơno hơ’lêh phá hlêk u ê, malối ‘na tuăn mơno, tơdroăng kal kí, tơdroăng rêh ối, túa pêi pro. Tơdroăng ki mơjiâng Khu xiâm hnê mơhno hbrâ, tơplâ mơdât kâ kơluâ a 63 kong pơlê, pơlê kong kân roh apoăng hiăng châ tơƀrê.

Tơdroăng ki tơleăng mâu kăn ƀô̆, đảng viên ki pro xôi châ pêi pro krâu, tơtro tiô luât, tơdrăng, tro tiô pơkâ dêi Đảng ƀă luât xiâm tơnêi têa. Mâu kơ koan ki săm tối, săm tơkêng hiăng mơnhên ngăn, rup tơleăng vâ chê 2 rơpâu 500 hdroh ‘na tơdroăng ai xôi xua kâ kơluâ, tơdroăng pêi cheăng kâ, tơdroăng ki to pro kăn, tung mê, ai hên mâu tơdroăng kâ kơluâ, kâ kơhveăm ki kân, pá vâ tí tăng ‘nâi, môi tiah: Tơdroăng pro xôi kân dêi Khu xiâm ngăn ‘na tơpui kâ; mâu tơdroăng pro xôi dêi Kŏng ti Việt Á, Grup FLC, Tân Hoàng Minh, Kŏng ti AIC, Grup Vạn Thịnh Phát ƀă hên hĕng mâu khu ki ê. Hneăng ki tơplâ mơdât kâ kơluâ, pro mơhrê hên hĕng liăn ngân, tơdroăng pro xôi pơtối kum ăm hiâm mơno kuăn pơlê, kăn ƀô̆, đảng viên loi tơngah tơdroăng pơkuâ ngăn dêi Đảng ƀă khu pơkuâ.

4.Pơkâ pêi pro hên mâu tơrŭm tơpui kâ, thăm mơdêk ivá cheăng tơnêi têa

Hneăng lăm pôu păng ‘nâng tơnêi têa Sinuâ sap ing hâi lơ 30/10 troh lơ 1/11 dêi pôa Nguyễn Phú Trọng, Kăn xiâm pơkuâ hnê ngăn tơnêi têa cho tơdroăng ki kal kân khât, tơtro tiô tơdroăng ki tŭm têk hnoăng cheăng, veăng kum ‘mâi rơnêu, mơnhông tơrŭm cheăng pơla Việt Nam ƀă Sinuâ. Tơdrêng amê, cho hneăng lăm pôu râ Tơnêi têa troh a Hàn Quốc, Indonesia dêi pôa Nguyễn Xuân Phúc, Kăn xiâm hnê ngăn tơnêi têa, hneăng lăm pôu kong têa Mih, Hà Lan, Ƀih, Luxembourg dêi pôa Phạm Minh Chính, Ngế pro xiâm hnê ngăn tơnêi têa, hneăng lăm pôu kong têa Hungary, Ăng-glê, Australia, New Zealand, Philippines dêi pôa Vương Đình Huệ, Kăn xiâm hnê ngăn Kuô̆k hô̆i. Việt Nam xuân hiăng veăng pêi pro kơhnâ khât, pôu râng hnoăng cheăng tung mâu hneăng hôp tung kơpong ƀă tung lâp plâi tơnêi, môi tiah: ASEAN, AIPA, APEC, Khu lâp kong têa ƀă hên hĕng mâu tơdroăng ki ê.

Hơnăm 2022 xuân hiăng mơnhên tối tơdroăng ki pêi pro ƀlêi chiâng Hơnăm tơrŭm nhŏng o pơla Việt Nam ƀă Lếo, Việt Nam ƀă Kul. Việt Nam pơtối vêh mơnhên troăng hơlâ ki tơrŭm tơpui kâ châ po rơdâ, mơjiâng pro ƀă rak vế krá tơniăn tơdroăng ro hơniâp lĕm, krá tơniăn vâ mơnhông tơnêi têa, thăm mơdêk hnoăng cheăng ƀă ki ó rơdêi dêi tơnêi têa.

5.Việt Nam châ mot tung Hô̆i đong Hnoăng rêh ối kuăn mơngế dêi Khu lâp kong têa

Hâi lơ 11/10/2022, Việt Nam hiăng châ roh má 2 mot tung Hô̆i đong Hnoăng rêh ối kuăn mơngế dêi Khu lâp kong têa hneăng 2023-2025, a roh hôp dêi Khu xiâm Hô̆i đong Khu lâp kong têa hneăng 77, po a New York, kong têa Mih ai kơxô̆ phĭu hên má môi. Klêi kơ’nâi tâ phĭu mê cho tơdroăng ki vêh mơnhên dêi mâu kong têa tung lâp plâi tơnêi ai tá mâu tơdroăng ki tơkêa ƀă ki kơdo mơ-eăm ó rơdêi dêi Việt Nam ‘na thăm mơdêk ƀă kring vế hnoăng rêh ối kuăn mơngế.

Ƀă hnoăng cheăng ki kal a Hô̆i đong Hnoăng rêh ối kuăn mơngế dêi Khu lâp kong têa, Việt Nam kô châ tơ’lêi hlâu tung hnoăng veăng kum mơdêk tâi tâng hnoăng cheăng dêi hnoăng rêh ối kuăn mơngế tiô kơ tơdroăng ki kal xiâm, tơrŭm cheăng ƀă tơpui kâ, rak vế tơniăn rế hía rế lĕm tro ‘na hnoăng rêh ối dêi kuăn mơngế tung tâi tâng mâu kơvâ cheăng.

6.Tơkŭm po ƀlêi chiâng Hneăng Tơ’noăng ivá kân Đông Nam Á roh má 31 (SEA Games 31)

Ƀă rơkong tơpui tối, ‘’Xua môi Đông Nam Á ki ó rơdêi tâ’’, Việt Nam hiăng tơkŭm po ƀlêi chiâng Hneăng tơ’noăng ivá ki kân Đông Nam Á roh má 31 (SEA Games 31) sap ing hâi lơ 12 troh lơ 23/5/2022. Klêi kơ’nâi 14 hâi tơ’noăng, khu tơ’noăng ivá Việt Nam châ 205 to mê dai mêa, 125 mê dái hâu ƀă 116 mê dái hlái.

Việt Nam hiăng châ ối má môi tung tâi tâng khu ƀă hiăng châ hên mâu hnoăng ki ‘ló hâk mơnê, hiăng rak vế ăm môi hneăng SEA Games tơdâng, tơ’mô, tơbleăng, mơhno tối hnoăng ki hâk git kơ tơ’noăng ivá ki ó rơdêi ‘na môi to kong têa tung ASEAN ki têm rơpiât, hlế kơ tơmối, krâu krĕng, hiăng châ ‘mâi mơnhông ƀă dế mơdêk ó rơdêi khât.

7.Tíu hơ’lêh liăn, tơnêi tíu ai hên tơdroăng ki ôh tá tơniăn, kal athế lêi tah ki tơvâ

Hơnăm 2022 hiăng châ hlo nhên tơdroăng ki hơ’lêh rơdêi ó dêi mâu tơnêi tíu, liăn phĭu khu mơdró kâ, liăn hlá, têa châu têa kơxăng ƀă hên hĕng mâu tơdroăng ki ê. Tíu hơ’lêh liăn hiăng tâk chu ôh tá tro tơdroăng, thăm nếo, tơdroăng kố xuân u ối tung mâu khế apoăng hơnăm ƀă dế chu ó ‘nâng ki pơtối tung mâu khế mơ’nui hơnăm.

Xua ai tơdjâk ing tơdroăng hngêi kơchơ dêi lâp plâi tơnêi, yă têa châu têa kơxăng tung tơnêi têa pơtối to kơnâ, tơdrêng amê, cho tơdroăng ki ôh tá bê kế tơmeăm ki vâ tê mơdró pro hên mâu hngêi mơdró têa châu têa kơxăng athế klĭng péa lơ tê iâ êt. Tơdroăng kố môi pâ cho xua khŏm vâ lêi tah lôi mâu tơdroăng ki ối tơvâ tơvân, tơdroăng ki tá hâi tơtro ton xŏn dêi hnoăng cheăng tê mơdró a mâu hngêi mơdró ki kân, rế athế mơ’no hnoăng kơjo kum pơtối tŏng kum rơdêi ó khât, tơtro tơdrêng tung hơnăm 2023.

8.Tơdroăng ki ôh tá bê pơkeăng, tơmeăm khăm pơlât pro pá ăm tơdroăng khăm pơlât châi tamo

Hên hĕng mâu hngêi pơkeăng tung lâp tơnêi têa dế trâm tơdroăng ki ôh tá bê pơkeăng, trếo pơkeăng, tơmeăm khăm pơlât, xua ai hên tơdroăng, la tung mê, ai mâu tơdroăng ki tơdjâk troh mâu hlá mơ-éa ki ai tơdjâk troh tê rôe, khu ki rôe hên pơkeăng, tơmeăm khăm pơlât ing mê khoh chiâng tơdjâk troh tơdroăng ki hlê plĕng, túa pêi pro pơrá phá dêi pó.

Tơdroăng kố hiăng pro tơdjâk hên troh ki dâi lĕm dêi khăm pơlât, tơdjâk troh tơdroăng ki tê pơkeăng, xing xoăng pơkeăng, tơmeăm khăm pơlât ôh tá tơdâng tơ’mô, tơdroăng ki kum kuăn pơlê châi tamo ôh tá châ môi tiah, bố bối dêi pó. Kố cho môi tơdroăng ki kơjo, pơkuâ ngăn, pêi pro dêi Chin phuh, Khu xiâm ngăn ‘na pơkeăng ƀă mâu khu râ, kơvâ cheăng râ xiâm tơnêi têa ki ai pro, tro tơdjâk.

9.Mơjiâng mâu tơdroăng ki kơnía dêi tơnêi têa, ki kal dêi mơhno túa lĕm tro, kơnía dêi rơpŏng hngêi, ki tơtro dêi kuăn mơngế Việt Nam tung chal nếo

Vêh ngăn ki hiăng châ chiâng pêi pro 1 hơnăm pêi pro tiô tơpui mơgêi dêi pôa Nguyễn Phú Trọng, Kăn xiâm pơkuâ hnê ngăn a roh hôp Mơhno túa lĕm tro lâp tơnêi têa ki pơkâ thế, rak vế Tơdroăng pơkâ dêi Hneăng hôp kân 13 dêi Đảng, hâi lơ 29/11, a Hà Nội hiăng po Hneăng hôp Khoa hok tơnêi têa ‘na ‘’Ki kơnía dêi tơnêi têa, kơnía ‘na túa lĕm tro, ki kơnía dêi rơpŏng hngêi ƀă ki tơ’ló dêi kuăn mơngế Việt Nam tung chal nếo nôkố’’, hâi lơ 17/12 a Bắc Ninh hiăng po hneăng Hôp, tơpui tơno ‘na túa lĕm tro hơnăm 2022 ƀă tơdroăng ‘’Túa cheăng, troăng tơdjâ ƀă ivá cheăng ăm tơdroăng mơnhông túa lĕm tro’’.

Mâu roh hôp kố hiăng po klêi kơ’nâi 1 hơnăm Roh hôp túa lĕm tro lâp tơnêi têa ăm hlo ki kơjo kum dêi Đảng, Tơnêi têa ƀă tâi tâng pơlê pơla tung tơdroăng khŏm mơ-eăm mơjiâng môi tơdroăng túa lĕm tro Việt Nam ki djâ troăng hdrối, rak vế tro dêi khôi túa, vêa vong hdroâng kuăn mơngế, vâ túa lĕm tro cho ivá ki păng ‘nâng, ki xiâm dêi hiâm mơno ƀă xuân cho ivá ki rơdêi vâ mơnhông dêi tâi tâng tơnêi têa tiô tơdroăng pơkâ dêi Hneăng hôp kân Đảng lâp tơnêi têa roh má 13.

10.Thăm mơdêk ki ó rơdêi hơ’lêh kơxô̆ tơnêi têa

Hâi lơ 22/4/2022, Ngế pro xiâm hnê ngăn Chin phuh hiăng pơkâ mơ’no Tơdroăng kơxô̆ 505/QĐ-TTg xo hâi lơ 10/10 rêm hơnăm cho Hâi hơ’lêh kơxô̆ tơnêi têa. Hơnăm 2022 cho hơnăm ki vâ mơnhên mâu tơdroăng ki xiâm tung mơjiâng Chin phuh kơxô̆, cheăng kâ kơxô̆, pơlê pơla kơxô̆ ƀă tê mơdró kâ ƀă điê̆n tưh. Tơdroăng ki hơ’lêh kơxô̆ hiăng chiâng tơdroăng pêi pro dêi tâi tâng kuăn pơlê, tŭm têk, ai tá tơdroăng veăng kum kơhnâ khât dêi Khu xiâm, kơvâ cheăng, kong pơlê, pơlê kong kân.

Tơdroăng pơkâ dêi hneăng hôp Đảng má 6 hiăng ngăn tơdroăng ki hơ’lêh kơxô̆ kố cho môi tung túa ki vâ mơnhông nếo ki tơtro khât, kum thăm mơdêk hnoăng cheăng pêi tiô túa kơmăi kơmok, pêi cheăng tiô chal nếo nôkố.