Kố cho rôh ki hdró kal kí tung tơdroăng ‘mâi hơ’lêh tơdroăng pêi cheăng dêi mâu kăn. Hâi lơ 30/6, lâp tơnêi têa po leh tơbleăng mâu pơkâ, tơdroăng pơkâ dêi Tíu xiâm tơnêi têa ƀă kong pơlê ‘na tơ’mot  tíu pêi cheăng  mâu kăn râ kong pơlê, mơjiâng tơrŭm cheăng Đảng, mơhno râ ủy, Hô̆i đong kuăn pơlê, Vi ƀan kuăn pơlê, Măt trận tơnêi têa kong pơlê, pơlê kong kân, cheăm, bêng, kơpong, vâ hâi kố lơ 1/7 pêi cheăng khât hlối dêi mâu kăn kong pơlê péa râ.

Lăm ngăn  a mâu tíu pêi cheăng cheăm bêng, kong pơlê a Pơlê kong kân Hồ Chí Minh. Pôa Tô Lâm, Kăn xiâm pơkuâ hnê ngăn Đảng tối nhên, tơdroăng ki kân má môi dêi khu pêi cheăng nếo cho mơnhông rơdêi rĕng, krá kâk dêi tơnêi têa dêi pơlê kong kân ƀă tơmâng khât tâ troh tơdroăng rêh ối dêi kuăn pơlê. Mơjiâng khu kăn iâ mơngế  pêi cheăng tơƀrê, pơxúa, pơ’lêh ing tơdroăng rak ngăn pro pơhôi nah chiâng rak ngăn rơkê plĕng pêi cheăng pơxúa ăm kuăn pơlê, mâu kăn xua kuăn pơlê, pơxúa ăm kuăn pơlê, pơxiâm pêi cheăng vâ mơnhông ƀă ai tŭm ivá vâ tơbleăng pêi ai pơxúa mâu troăng hơlâ dêi Đảng xúa pêi tung rêh ối xua vâ mơnhông tơdjuôm dêi tơnêi têa.