Tung tuăn tơmiêt dêi hên ngế hdrối hiăng veăng tơplâ xâ, mâu hâi khế tơplâ hơnăm 1975 nah xuân môi tiah ối hlo tiah mê. Ƀă vâi, rêm tíu inâi, rêm troăng prôk a tơnêi Tây Nguyên xuân ối rơtế ƀă mâu rôh tơplâ ó ƀă tơdroăng tơplâ hiăng hlâ hên hĭn mâu vâi pú. Trung tươ̆ng Đoàn Sinh Hưởng, ngế lêng tơplâ  khên tơnôu dêi kuăn pơlê, cho kăn lêng Quân khu 4 - drêng mê nah cho đăi đô̆i trương rơxế comƀa dêi Trung đoàn 273, Quân đoàn 3 ki veăng lăm tơplâ  Buôn Ma Thuột- xuân ối chôu pâ môi tiah ối hlo hleăng a chôu phut ki mê nah.

“A tơnêi  kố hiăng ai hên to lâi ngế hlâ mê nếo châ ƀlêi trâng tơniăn troh hâi kố. Pơkâ xiâm dêi Buôn Ma Thuột ki pin hiăng châ pro tơleăng lĕm cho pơkâ ki xiâm dêi rôh lăm plâ ƀă hlối  cho rôh plâ blêi trâng Buôn Ma Thuột  mê nếo pro hlâu ăm mâu roh plâ ki ê.  Troh nôkố Buôn Ma Thuột, Dak Lak lĕm krúa, a tâ lĕm ro tuñg hiâm mơno, hâk  ki ê nếo xuân ối chôu pâ vâi pú, pâ troh kơ mâu ngế hiăng hlâ xua tơnêi têa kố, xuá tơnêi ki kố”.

Sap plâ ƀlêi trâng pro pơxúa tơƀrê mê nah,  tơdroăng tơplâ peăng Hdroh hiăng rĕng hơ’lêh, pro xiâm ăm mâu rôh lăm plâ pơtối troh ƀlêi trâng rơnó Hơngui hơnăm 1975. Tiô mâu ngế tăng ‘nâi plĕng ‘na lêng, Rôh lăm plâ Tây Nguyên ôh ti xê cho ƀlêi trâng kân ‘na lêng mê ối pro ai hên ƀai hriâm ki pơxúa ‘na nghê̆ thuât hnê mơhno tơplâ ƀă tơkŭm lăm plâ. Phŏ yăo sư, Tiê̆n sih Hoàng Xuân Nhiên, Học viện Quốc phòng, ngế rơkê tăng ‘nâi plĕng ‘na nghê̆ thuâ̆t lêng Việt Nam tối tiah kố, môi tung mâu túa lĕm tro dêi rôh lăm Pơplâ Tây Nguyên cho nghê̆ thuâ̆t pơloăng lêng, pro ki xiâm dêi rôh lăm plâ.

“ Tung rôh lăm plâ Tây Nguyên mê cho rơkê pơloăng lêng vâ kâi plâ ƀlêi cho môi tung mâu  tơdroăng kĕm krê ƀă kố xuân cho môi ƀai hriâm kơnâ git ăm tơdroăng rak vế tơnêi têa dêi hdroâng mơngế pin a rơxông ki nếo. Tung pơla mơnhông tơƀrê túa pêi cheăng dêi lêng Việt Nam a tơdroăng ki nếo ối thế pơtối ‘nâi plĕng, thế pơtối rak vế tâ nếo ki kơnâ ki mâu pâ pôa pin hiăng châ pêi pro vâ klêi mê pin kô ai mâu hnoăng ƀlêi trâng ki nếo tơƀrê tâ. Ƀă rak ăm tơnêi têa krá kak, kring vế tơnêi têa ing apoăng ing hơngế”.

Lối tơdé chal klêi kơ’nâi plâ ƀlêi trâng mê nah, Tây Nguyên hiăng ai hên ki hơ’lêh. Mâu kơpong tơnêi  hdrối nah cho tíu tơplâ ó nôkố hiăng chiâng kơpong pêi chiâk  kân rơdâ, hên troăng prôk châ p ro lĕm, mâu kơphô̆ dế chông mơjiâng, tơdroăng rêh ối dêi kuăn pơlê mâu hdroâng  kuăn ngo rế châ mơnhông tơƀrê. Ƀă mâu ngế lêng hdrối nah  hiăng veăng lăm pơplâ hơnăm ki mê nah, ki hơ’lêh dêi tơrêm kơpong tơnêi kơvâ cheăng cho vâ mơhno nhên ăm hlo ki pơxúa dêi  mâu ngế ki hlâ tung rôh tơplâ.

Đăi tă Nguyễn Đức Tính, ngế pơkuâ tăng ‘nâi plĕng mâu tơdroăng Tiểu đoan 401 Dak Lak - Tíu ki hdrối nah xo pêi hnoăng cheăng plâ tât xâ kơtâu sap Dak Lak kĕn Lâm Đồng tung rôh lăm pơplâ Tây Nguyên, tối:

“Klêi châ tơleăng lĕm tâ sôk ro, troh nôkố tâng vâ pơchông ƀă hdrối nah cho tơ ê khât. Púi vâ tơnêi têa mơnhông tơƀrê tro tiô Pơkâ hneăng hôp Kân Đảng rôh má 14  mê hlo Đảng ƀă Tơnêi têa mơ-eăm pêi cheăng khŏm tâk 2 kơxô̆ sap hơnăm 2026 ƀă hbrâ tâ phĭu rah xo Kăn Kuô̆k hô̆i rôh má 16 ƀă Hô̆i đong kuăn pơlê rêm râ mê a loi khât tơnêi têa pin kô xông tơƀrê, tơdroăng rêh ối dêi kuăn ‘nĕng pin kô châ hơniap ro tâ”.

Ôh ti xê to hâk tơngăm dêi mâu ngế lêng hơnăm ki mê nah, Plâ ƀlêi trâng Tây Nguyên ối chiâng xiâm ki rơrêk tung hiâm mơhno ăm mâu rơxông ối nếo hâi kố. Nâ Vũ Mau Hương, học viên cao học Luật a Hngêi trung Đại học Luật Hà Nội - Phân hiệu a Dak Lak ăm ‘nâi, mâu tơdroăng hơ’muăn  ing  tíu tơplâ hơnăm ki mê nah kum ăm rơxông ối nếo nôkố hlê nhên tâ ki kơnía dêi tơdroăng hơniâp lĕm ƀă hnoăng cheăng pêi dêi tơná ƀă pơlê xiâm, tơnêi têa.

“Ing mâu ƀai hriâm ƀă mâu tơdroăng hơ’muăn ‘na tơdroăng lâp plâ Tây Nguyên hơnăm 1975, ngin rơxông nếo hiăng hlê plĕng nhên tâ ‘na mâu tơdroăng tơplâ troh hlâ dêi rơxông hdrối. Tơdroăng mê kum ăm ngin ngoăm pâ tâ mâu tơdroăng ki kơnía dêi hơniâp lĕm hâi kố xuân hlê nhên tâ hnoăng pêi pro dêi tơná tung tơdroăng  veăng ‘no hnoăng mơjiâng, mơnhông pơlê xiâm”.

51 hơnăm hiăng luâ, la tuăn hiâm dêi Plâ ƀlêi trâng Tây Nguyên xuân pơtối tơbleăng troh lâp lu. Sap ing tíu tơplâ hơnăm nah troh mơnhông tơƀrê hâi kố, kơpong tơnêi kong ngo dế pơtối chêh mâu tơdroăng  ki nếo ƀă tơdroăng púi vâ mơ eăm mơnhông tơná ƀă tuăn vâ mơ-eăm ƀă tuăn loi a tung la ngiâ mơnhông krá rơdêi tơnêi têa.