VOV4.Xơ Đăng - Vâ tơdjêp, tŏng kum mâu tíu cheăng mơjiâng tơmeăm tê mơdró tơmeăm ki má môi kơpong kong ngo, kơpong hơngế hơngo ƀă rơlố, kơxo lơ 5/10, a Hà Nội, Khu xiâm pơkuâ Kơmăi kơmok ƀă tê mơdró tơkŭm po hneăng hôp tơpui tơno cheăng kâ tơdjêp pêt mơjiâng tơmeăm, tê tơmeăm tê mơdró kơpong kong ngo, kơpong hơngế hơngo ƀă rơlố hơnăm 2022.

Tơdroăng pêi pro tơdroăng mơnhông mơdêk tê mơdró kơpong kong ngo, kơpong hơngế hơngo ƀă rơlốu hneăng hơnăm 2015 – 2020 hiăng châ tơƀrê hên ‘na tơtêk tâi tâng kơlo tê ‘ngré tơmeăm khoăng ƀă tê mơdró hên hơnăm hiăng hluâ tung mâu pơlê ối hên tơdroăng pá puât.

Tung la ngiâ, Khu xiâm pơkuâ kơmăi kơmok ƀă tê mơdró kô pơtối pơkuâ, tơrŭm ƀă mâu Khu xiâm, kơvâ cheăng, mâu kơ koan ai tơdjâk ƀă mâu kong pơlê kơpong kong ngo, kơpong hơngế hơngo ƀă rơlố pêi pro 6 hnoăng cheăng xiâm, tung mê ai kêi đeăng ‘na luât vâ mơhnhôk mơdêk pêt mơjiâng tơmeăm, tê mơdró tơmeăm ki ai dêi kơpong kong ngo, kơpong hơngế hơngo ƀă rơlố; hriăn plĕng mơnhông mơdêk krá tơniăn, mơdêk ki kơnâ ƀă mâu tơmeăm khoăng châ pêt mơjiâng a kơpong kong ngo, kơpong hơngế hơngo ƀă rơlốu; tơrŭm ƀă mâu kong pơlê ƀă troăng tê vâ tơkŭm mâu tơdroăng xing xoăng tơmeăm khoăng kum ăm pêt mơjiâng ƀă rôe xúa a kơpong kong ngo, kơpong hơngế hơngo ƀă rơlố.

            VOV Tây Nguyên/Tơplôu: A Sa Ly