Khu xiâm ngăn hnê hriâm ƀă hnê mơjiâng tuăn ngôa rơkê ăm ‘nâi, tŭm 6 ngế hok tro Việt Nam veăng tơ’noăng Olympic Tin học Châu Á Thái Bình Dương hơnăm 2023 xuân châ kâ Mê dai, tung mê kâ 4 Mê dai Hâu ƀă 2 Mê dai Hlái. Olympic Tin học châu Á Thái Bình Dương hơnăm 2023 châ tơkŭm po tiô tơdroăng tơ’noăng tiô troăng hyôh Internet ƀă 1471 ngế hok tro dêi 36 to kong têa ƀă tung kơpong veăng pêi (tung mê, ai 3 to kong têa cho Canada, Mexico, Brazil châ krếo veăng tơ’noăng la ôh tá séa ngăn ăm kâ pri); Sinuâ cho kong têa ki chêh inâi po tơ’noăng.

Khu tơ’noăng dêi Việt Nam ai 15 ngế, tơ’noăng tiô troăng hyôh Internet a hngêi trung Đại học Công nghệ, Đại học Quốc gia Hà Nội hâi lơ 20/5/2023. Tiô pơkâ dêi Khu tơkŭm po tơ’noăng Olympic Tin học Châu Á - Thái Bình Dương, Việt Nam châ rah xo 06 ngế hok tro châ điêm hên má môi veăng séa ngăn điêm ăm kâ pri.

Tiô tơdroăng ăm ‘nâi ing Khu tơkŭm po, tŭm 6 ngế veăng tơ’noăng châ séa ngăn vâ mơhá pri dêi Việt Nam xuân châ kâ Mê dai, mê cho 4 Mê dai Hâu ƀă 2 Mê dai Hlái. Tiô pơxá ối ‘na kâ Mê dai, Việt Nam ối má 9. Ƀă tơdroăng ki mê hiăng mơhno ki tơƀrê tung hnê hriâm phôh thong ƀă troăng prôk tro tung tơdroăng châ ‘nâi, rah xo, ăm hriâm tơ’nôm ƀă hok tro rơkê dêi khu xiâm ngăn ‘na hnê hriâm ƀă hnê mơjiâng tuăn ngôa rơkê. Pakĭng mê, mơhno ki mơ-eăm dêi hok tro, thái cô , hngei trung dêi kơvâ hnê hriâm hnê rơkê, hriâm rơkê.