VOV4.Xơ Đăng - Tuy Đức cho tơring tơkăng kong dêi kong pơlê Dak Nông. Hdrối nah, tơdroăng rêh ối dêi vâi krâ nhŏng o mâu hdroâng kuăn ngo akố trâm hên xơpá, ôh tá ai liăn vâ pêi kâ. Mâu hơnăm hdrối nah, vâi krâ nhŏng o mơngế M’nông a Tuy Đức hiăng pơtối châ mung liăn ing hngêi rak liăn vâ ‘no liăn mơnhông pêt hdrê loăng ton hơnăm môi tiah kơphế tiu, mắc-ca tiô túa ki tơƀrê.

Kơnôm tiah mê pêi lo liăn tâk hên, rế hía rế kơdroh tah hrâ mơnguâ, kơtiê xơpá tiô túa ki tơniăn ton.

On veăng Điểu Minh ối a Ƀon Bu Đưng, cheăm Dak Rtih, tơring Tuy Đức, kong pơlê Dak Nông ai lối 6 ha tơnêi pêi chiâk deăng. Hdrối nah bu chối báu ƀă pêt prá alâi, pêi lo liăn cheăng kâ rêm hơnăm ôh tá bê châ hên to lâi. Nôkố kơpong tơnêi lối 6 ha kố hiăng chiâng kơdrum kơphế, pêt tơvât tiu ngiât lĕm. Điểu Minh tối ăm ‘nâi: Kơdrum loăng plâi ôh tá tro oâ hdrong kâ ‘nhê cho xua ngoh pêi pro kơtăng ing rah hdrê troh kih thuât rak ngăn.

Ki rơhêng vâ tối kơdroh tơdroăng xúa phon hŏa hok, bu xúa phon hưh cơ xo ing khu ro dêi rơpŏng. Rơnó kố nah, mơhé yă tiêu ƀă kơphế xuân dế a kơlo iâ laga klêi kơ’nâi riên kơxô̆ liăn mơ’no cheăng, rơpŏng hiăng châ liăn rơkâ lối 1 rơtal liăn. On veăng Điểu Minh nôkố hiăng ai hngêi meăn pro ing kât xơmong kân lĕm rơdâ ai tŭm tơmeăm tung hngêi vâ xúa tung rêh ối ôh tá thu mâu rơpŏng ki kro mơdrŏng rêh ối a kơphô̆. Châ ai tơdroăng rêh ối môi tiah hâi kố cho ing tơdroăng mơ-eăm dêi prế on veăng, môi iâ nếo cho ing kơxô̆ liăn mung a hngêi arak liăn.

Điểu Minh tối:

‘’Á châ mung liăn dêi Agribank kơtăn kố hiăng 5 hơnăm. Hdrối nah, rơpŏng á xuân pêi chiâk deăng laga ôh tá ai liăn mơ’no pêt mơjiâng tơmeăm mê xuân pá. Sap ing châ mung kơxô̆ liăn mê on veăng má rôe phon rơvât, rôe hdrê, mơhá hnoăng mung mơngế pêi cheăng rak ngăn. Troh nôkố má hiăng pêi lo liăn, rơpŏng pêi lo liăn tơniăn’’.

Rơpŏng nâ Thị Hoa, ối a ƀon N’Drung, cheăm Dak Buso xuân cho môi tung mâu rơpŏng mơ-eăm xông tơtêk ing kơxô̆ liăn mung dêi hngêi arak liăn. Nâ Hoa hơ’muăn, kơnốu châi tamo ôh tá kâi pêi cheăng hngăm, môi ngế nâ pêi tâi tâng tơdroăng cheăng dêi rơpŏng. Hdrối nah nâ bu khên mung a hngêi arak liăn 50 rơtuh liăn rôe hdrê plâi kâ, phon rơvât vâ pêt, rak ngăn kơdrum kơphế, tiêu.

Mơ’no liăn châ tơƀrê, mơdrếo kơxô̆ liăn mung ki ton, nâ Thị  Hoa mung tơ’nôm kơxô̆ liăn nếo vâ tơkŭm rak ngăn kơdrum loăng plâi.

‘’Á mung hngêi arak liăn 150 rơtuh liăn vâ mơ’no pêt tiu, kơphế. Kơnôm mê ai pêi lo liăn păn roăng kuăn ‘nĕng lăm hriâm. Kơnôm mung hngêi arak liăn mê rơpŏng á ai liăn vâ mơnhông cheăng kâ, ai liăn rak ngăn tiu, kơphế xua mê tơdroăng rêh ối xuân hiăng chía niân hên’’.

Pôa Ngô Văn Thương pôu râng hnoăng Kăn hnê ngăn Vi ƀan cheăm Dak Buk So tối ăm ‘nâi: Hdrối nah, tung cheăm hiăng ai tơdroăng ăm mung liăn xo liăn rơkâ hên ó, ki má lối cho a rơnó kuăn pơlê pêi chiâk deăng kal thâ kơxô̆ liăn vâ rôe phon, tơmeăm vâ teăm tơdrêng rơnó pêt mơjiâng tơmeăm.

Tung pơla achê kố, kơnôm mâu hngêi arak liăn ai liăn ăm mung teăm tơdrêng, teăm tơdrêng mâu kơxô̆ liăn ăm mung mê tơdroăng ăm mung liăn xo liăn rơkâ hên ó hiăng châ mơdât, troh tah:

‘’Ƀă vâi krâ kuăn pơlê mê tơdroăng châ mung liăn dêi hngêi arak liăn Agribank Tuy Đức vâ pêt mơjiâng tơmeăm châ tơƀrê. Ki rơhêng vâ tối tung tơdroăng hbrâ mơdât pơreăng COVID-19 mê hngêi arak liăn hiăng tŏng kum ‘na liăn rơkâ ăm mâu ngế krê ƀă mâu khu tơrŭm cheăng tung pơlê cheăm cho hên. Á pơkâ thế cho hngêi arak liăn pơtối mơdêk kơlo liăn ăm mung ăm kuăn pơlê’’.

Pôa Nguyễn Ngọc Thanh, Kăn pơkuâ tíu pêi cheăng hngêi arak liăn Agribank Tuy Đức, kong pơlê Dak Nông tối ăm ‘nâi: Tung pơla kố nah tíu pêi cheăng dêi hngêi arak liăn hiăng pêi pro tro tơdroăng kơjo liăn rơkâ ăm mung ƀă kuăn pơlê ki tro tơdjâk xua pơreăng COVID-19. Ai 2.052 kuăn pơlê, ƀă kơxô̆ liăn chê̆n 450 rơtal liăn hiăng châ kơdroh lối 1 rơtal tơdế liăn rơkâ. Tíu pêi cheăng dêi hngêi arak liăn đi đo hbrâ tơxâng kơxô̆ liăn ăm mung ăm kuăn pơlê, ki má lối cho mơ’no liăn ăm mung rĕng, teăm tơdrêng.

Pôa Nguyễn Ngọc Thanh mơnhên tối:

‘’Ahdrối Agribank đi đo mơnhên hnoăng ki xiâm ƀă kơvâ pêi chiâk deăng – kuăn pơlê pêi chiâk deăng – rêh ối kuăn pơlê. Ƀă troăng pêi rơkê, pơ’lêh nếo Agribank đi đo rơtế ƀă kuăn pơlê, kum kuăn pơlê châ mung liăn tơ’lêi hlâu vâ pêt mơjiâng tơmeăm tê mơdró, mơdêk tơdroăng rêh ối, kum mơnhông mơdêk cheăng kâ, kum troh tah tơdroăng ăm mung liăn xo liăn rơkâ hên a kong pơlê’’.

VOV Tây Nguyên chêh

A Sa Ly tơplôu ƀă tơbleăng