VOV4.Xơ Đăng - On tơhrik Dak Nông nếo pro klêi ƀă ăm xúa troăng kơxái on tơhrik, kum ăm 360 rơpŏng kuăn pơlê a thôn Dak Lang, cheăm Quảng Khê, tơring Dak Glong. Kố cho thôn ki hngế, kuăn pơlê rêh ối ukố umê rêm kơpong kuăn pơlê rêh ối, tơdroăng rêh ối ối trâm hên xơpá xua tá hâi ai on tơhrik vâ xúa.

Kuăn pơlê thôn Dak Lang phiu ro ai on tơhrik xúa

Pêi pro tơdroăng tơkôm tơbrêi tơbrêh dêi kuăn pơlê, PC Dak Nông hiăng ‘no liăn tâp trăng ‘nhâng kơxái on tơhrik tơnêi têa troh a thôn Dak Lang, mê cho: pro ki nếo 4 to trạm ƀiến áp, vâ chê 2,5 km troăng kơxái trung áp, 5,8 km troăng kơxái hạ áp, tâi tâng kơxô̆ liăn ‘no lối 2,5 rơtal liăn.

Ai on tơhrik, ngiâ méa thôn pơlê nếo a thôn Dak Lang, cheăm Quảng Khê, tơring Dak Glong tơ’nôm pơ’lêh

Tung pơla pro, vâi krâ nhŏng o tung thôn hiăng pro tơ’lêi hlâu ‘na tơnêi tíu, kum kŏng nhân kât, toi kơxái ƀă hên ki ê vâ troăng kơxái on tơhrik kố rĕng klêi. Tơdroăng ki ăm on tơhrik tơnêi têa troh a mâu kơpong kuăn pơlê rêh ối, kơpong hngế xơpá cho ivá mơ-eăm kân dêi PC Dak Nông ƀă tơdroăng ki tơrŭm dêi cheăm tơring.

Tơdroăng ki ‘no on tơhrik ai pơxúa khât tung mơjiâng thôn pơlê nếo, veăng kum kuăn pơlê mơnhông mơdêk cheăng kâ rêh ối, kơdroh kơtiê ƀă mơdêk tơdroăng rêh ối.

Katarina Nga tơplôu ƀă tơbleăng