Pơchuât tơbleăng tơdroăng kal kí hneăng hôp, hơnăm 2020 – 2025, Đảng ƀô̆ Ƀinh đoàn 15 hiăng mơeăm tơkŭm hbrâ rơnáu, tơmiât pêi rơkê, tơkâ luâ mâu tơdroăng xơpá, pơloăng mơnúa vâ pêi klêi tŭm têk hnoăng cheăng kal kí châ pơcháu.

Cheăng hnê hriâm, hriâm tâp, mơjiâng túa pơkâ hbrâ rơnáu tơplâ châ tơbleăng pêi tơniăn, tro ƀă tơdroăng hbrâ mơdât krá rơdêi a kong pơlê tung la ngiâ Tây Nguyên. Tơpui hnê mơhno a Hneăng hôp, Thươ̆ng tươ̆ng Huỳnh Chiến Thắng, phŏ ngế tí tăng ‘nâi plĕng ăm Khu lêng kuăn pơlê Việt Nam mơnhên tối khât mâu tơdroăng pêi pro tơƀrê dêi Ƀinh đoàn tung hneăng cheăng hdrối kố nah ƀă pơkâ thế Đảng ƀô̆ pơtối rak krá cheăng cho khu lêng ki xiâm tung pêi pro tơdroăng cheăng lêng, cheăng kâ a kong pơlê tung la ngiâ Tây Nguyên.

Hneăng cheăng 2025 – 2030, Ƀinh đoàn 15 tối pơtối mơdêk ki tơƀrê mơjiâng pro, tê mơdró; pơhlêh tơdroăng rêh ối mâu ngế pêi cheăng; rak vế kơtăng túa cheăng chính quy, pơxâu phâk; tơdrêng amê hlối pơhlêh nếo, mơdêk ivá pêi cheăng pơkuâ, ivá tơplâ dêi khu tơrŭm Đảng tro ƀă mơjiâng tíu pêi cheăng “Djâ troăng ahdrối, kơhnâ rơkê”.