Kố cho pri ki kơnía khât, hdró troăng prôk tung 41 hơnăm pêi pro hnoăng cheăng a tíu pêi cheăng Tây Nguyên. A rôh leh, Thươ̆ng tươ̆ng Nguyễn Quang Ngọc – Phŏ ngế xiâm pơkuâ ngăn lêng – tối nhên pơkâ thế Ƀinh đoân pơtối mơdêk khôi hmâ, tơkŭm mơjiâng tíu pêi cheăng krá rơdêi tŭm têk, tro ƀă tơrŭm krá tơniăn pơla mơnhông cheăng kâ, ‘mâi mơnhông cheăng lêng, mơdêk ivá rơdêi ƀă ivá hbrâ rơnáu tơplâ, tơdrêng amê hlối tơrŭm krá tơniăn ƀă khu kăn pơkuâ hnê ngăn Đảng, khu kăn pơkuâ cheăm bêng kong pơlê a mâu tíu tơkăng kong; mơdêk rơdêi pơhlêh nếo túa pêi thăm mơnhông, xúa kơmăi kơmok, mơnhông tơƀrê ki kơnía tung mơjiâng pro ƀă uâ pơliê kế tơmeăm.

Thươ̆ng tươ̆ng Nguyễn Quang Ngọc pơchân thế Ƀinh đoân 15 kal pơtối pêi pro tro hnoăng cheăng hnê mơhnhôk ƀă tơpui kâ a kơpong tíu tơkăng kong, rak vế tơniăn tro tơdroăng pơkâ pêi tung hneăng ki nếo.