Khu pơkuâ tơdroăng kal tiô troăng um tơvi, rơ’jíu ƀă Internet ƀă Kŏng an kong pơlê Bình Dương nếo krếo pôa N.T.P (28 hơnăm, ối a pơlê kong kơdrâm Thủ Dầu Một, kong pơlê Bình Dương) troh pêi cheăng xua tơbleăng ôh tá tro khât a măng pơlê pơla ‘na roh râng hnêa plâ tíu pêi cheăng cheăm a tơring Čư Kuin, kong pơlê Dak Lak. Klêi kơ’nâi séa ngăn, Khu séa ngăn Khu pơkuâ tơdroăng kal tiô troăng um tơvi, rơ’jíu ƀă Internet kong pơlê Bình Dương ƀă Kŏng an kong pơlê Bình Dương châ hlo pôa P. hiăng xúa tai khoăn krê tơná inâi ‘’Pii Nguyen’’ tơbleăng tung facebook tơdroăng pro ăm ôh tá tơniăn pơlê pơla, tơpui ôh tá tro inâi khu kŏng an tơdjâk troh roh tơdroăng a tơring Čư Kuin, kong pơlê Dak Lak.

Pêi cheăng ƀă kơ koan, pôa N.T.P hiăng tối tơdroăng pêi pro dêi tơná cho xôi luât ƀă tơkêa kô ôh tá pro xôi xếo. Khu séa ngăn Khâu pơkuâ tơdroăng kal tiô troăng um tơvi, rơ’jíu ƀă Internet kong pơlê Bình Dương hiăng pơkâ pơxâu phâk pôa P. kơxô̆ liăn 7,5 rơtuh liăn ‘na tơdroăng “Tối tơbleăng tơdroăng ôh tá tro ƀă kơ koan, khu tơrŭm, inâi, hiâm mơno dêi ngế krê’’. Kơ koan cheăng xuân pơkâ thế pôa P. tah dêi tơdroăng ki ôh tá tro khât pro xôi luât mê.