Kơxê lơ 3/1, a Hà Nội, Ƀơrô Kuô̆k hô̆i tơkŭm po hôp khu chêh hlá tơbeăng, tối ‘na tơdroăng Hneăng hôp ôh tá tối hdrối roh má 2, Kuô̆k hô̆i hneăng má 15. Pơtối mê, Hneăng hôp ôh tá tối hdrối roh má 2 kô hôp hbrâ a kơxê kố lơ 4/1 ƀă pơxiâm po kân krip a hâi lơ 5/1. Tiô tối hdrối tơdroăng, Kuô̆k hô̆i kô hôp tơkŭm tung pơla 4 hâi (tiô tối hdrối mơgêi a hâi lơ 9/1). A hneăng hôp kố, Kuô̆k hô̆i séa ngăn hên tơdroăng xiâm ki kal, vâ pơkâ mâu tơdroăng thâ, kal, tơxâng teăm tơdrêng pơkâ dêi tơdroăng rêh ối. A hneăng hôp kố, tơdroăng xiâm ki kal châ Kuô̆k hô̆i tối hdrối tơbleăng ăm pêi pro ‘na Pơkâ pêi tâi tâng tơnêi têa hneăng hơnăm 2021 – 2023, tơmiât pêi troh hơnăm 2050.

Pơtối mê, tơdroăng xiâm ki hên tơkŭm tung mâu tơdroăng pơkâ pêi; troăng tơmiât pêi, troăng prôk la ngiâ ƀă pơkâ mơnhông; mâu hnoăng cheăng xiâm tung rơxông pơkâ pêi; pơkâ troăng prôk mơnhông mơdêk tơdroăng cheăng kâ – rêh ối pơlê pơla ƀă mâu kơpong ki xiâm tơnêi têa.