Kơxo lơ 8/6, teăng mâ Chin phuh, a Hneăng hôp Kuô̆k hô̆i, pôa Lê Minh Khái, Ngế pro xiâm phŏ hnê ngăn tơnêi têa tơbleăng tơdroăng cheăng kâ – rêh ối pơlê pơla khế 5 hơnăm 2023. Tiô tơbleăng, cheăng kâ kân tơniăn lĕm; liăn chu rơpâ châ mơdât; mâu tơdroăng tơdâng kân dêi cheăng kâ châ tơniăn.

Mâu kơvâ khôi túa lĕm tro, rêh ối pơlê pơla, kong prâi, cheăng lêng, gâk kring, tơpui kâ ƀă kong têa ê châ tơtrŏng, thăm pêi pro. Tơdroăng ‘na rêh ối pơlê pơla, mơngế pêi cheăng, cheăng pêi châ tơniăn. Ki rơhêng vâ tối, ƀă tơdroăng hơ’lêh pro hlá mơ-éa, kố cho môi hnoăng cheăng ki xiâm, châ Chin phuh, Ngế pro xiâm hnê ngăn Chin phuh tơkŭm hnê mơhno ƀă mâu khu xiâm, kơvâ cheăng, kong pơlê pêi pro hiăng châ tơƀrê hên.

Tung la ngiâ, Chin phuh pơtối hnê mơhno tơkŭm séa ngăn, kơdroh, pro tơ’lêi hlâu mơ-éa, ki má lối cho mâu pơkâ dế cho tơdroăng ki pro pá ƀă mơjiâng pro kế tơmeăm khoăng tê mơdró; pơkâ pêi pro kơtăng tơdroăng mơnhên tơdjâk, mơnhên pơkâ ‘na pro hlá mơ-éa.