Ngế pơkuâ cheăng dêi Chin phuh tối nhên, kơtăn kố 1 hơnăm, hâi lơ 11/10/2021, Chin phuh tơbleăng Pơkâ 128 ‘na tơdroăng hmâ tơniăn, rơkê ƀeăn, ‘nâi séa ngăn tơ-ƀrê pơreăng COVID-19. Troh nôkố, hvái ngăn 10 khế  hdrối, tơdroăng cheăng kâ hiăng phá tơ-ê, ai hên tơdroăng ki tơviah tâng vâ pơchông ƀă tơdroăng mơjiâng pơkâ hơnăm 2022 ki hâi ‘nâi  hdrối.  Chin phuh hôp tiah hmâ tối mâu tơdroăng cheăng kâ-rêh ối pơlê pơla khế 10 ƀă 10 khế hơnăm 2022 vâ xo ƀai hriâm, pơkâ tơdroăng vâ pêi, troăng rơhlâ hnê mơhno pơkuâ cheăng ing nôkố ta troh mơ’nui hơnăm 2022, rak tơniăn tiô tơdroăng hiăng pơkâ dêi Kăn hnê ngăn Tíu xiâm, khu xiâm kal kí ƀă tơdroăng cheăng kâ-rêh ối dêi tơnêi têa.

Mâu ngế cheăng tung Chin phuh a rôh hôp

Ngế pro xiâm hnê ngăn tơnêi têa púi vâ mâu ngế cheăng tung Chin phuh tơkŭm tơmiât tơdroăng ki rơkê, túa pêi cheăng, ‘no hnoăng tối tơbleăng, tối nhên mâu tơdroăng ‘na cheăng kâ vâ mâu todroăng pơkâ cheăng, troăng rơhlâ pêi pro tơtro hlối tơbleăng Pơkâ rôh hôp mâu kăn, pơkuâ tung khế 11 ƀă 12, mơgêi hơnăm 2022  ƀlêi trăng, pêi châ tiô tơdroăng pơkâ.