Kố cho rôh hôp má 2 tung khế 4 vâ tơpui, ăm rơkong tơpui tối tung mâu kơxop hlá mơéa luât tiô tối hdrối kô pơtroh ăm Kuô̆k hô̆i ngăn ăm rơkong tơpui tối a Hneăng hôp má 9 la ngiâ. Tơpui a rôh hôp, pôa Phạm Minh Chính, Ngế pro xiâm hnê ngăn tơnêi têa ăm ‘nâi, a Hneăng hôp má 9, Kuô̆k hô̆i hneăng 15 tiô tối Chin phuh kô pơtroh ăm Kuô̆k hô̆i 63 to mơ-éa, tơbleăng, tung mê ai 37 Luât ƀă tơdroăng pơkâ. Kố cho mâu hlá mơ-éa ki kân, ki kal, tơdjâk troh tâi tâng tơdroăng cheăng kâ rêh ối pơlê pơla.

Mâu tơdroăng cheăng gá hên, hnoăng cheăng pêi hngăm, pơkâ thế rơkê, ai hên tơdroăng ôh tá tơniăn, tơdjâk troh lâp lu, Ngế pro xiâm hnê ngăn tơnêi têa pơkâ thế mâu khu xiâm kơvâ cheăng kơjo hâi khế, tơkŭm liăn ngân hên má môi, hnê mơhno tơdrêng, pơkâ thế chêh pro klêi mâu kơxop hlá mơéa luât. Tơdrêng amê, hlối tơrŭm ƀă mâu kơ koan dêi Kuô̆k hô̆i tung pơla séa ngăn, tơpui tối leăng, tơmâng xo, ‘mâi pơhlêh kơxop hlá mơéa Luât. Teăm tối tơbleăng ƀă mâu tơdroăng ki dế trâm, mâu tơdroăng ki kal tơkâ luâ hnoăng pơkuâ.