Leh tơbâ 78 hơnăm Hâi mơjiâng Mô đô̆i kuăn pơlê Việt Nam ƀă 33 Hâi gâk kring vế tâi tâng kuăn pơlê (22/12), kơxo hâi lơ 22/12, khu râ kăn pơkuâ kong pơlê Quảng Bình troh chôu nhâng, pôu ngăn tơnâp Đăi tươ̆ng Võ Nguyên Giáp. Kăn teăng mâ khu râ kăn pơkuâ hnê ngăn cheăng Đảng kong pơlê, Vi ƀan kuăn pơlê, Vi ƀan Măt trâ̆n Tơnêi têa Việt Nam kong pơlê Quảng Bình hiăng chôu nhâng, lăm pôu ngăn tơnâp kiâ Đăi tươ̆ng Võ Nguyên Giáp a Vũng Chùa, Đảo Yến ối tung cheăm Quảng Đông, tơring Quarng Trạch, kong pơlê Quảng Bình.

Tung tơdroăng nhuô̆m ƀă kân krip, khu râ kăn pơkuâ kong pơlê Quảng Bình hiăng tu ko ‘măn hơvĭng reăng, chôu nhâng ƀă mơdoh chôu koh tơbâ mơhno hiâm mơno pâ mơnê ƀă mâu hnoăng cheăng kân kĭn dêi Đăi tươ̆ng Võ Nguyên Giáp.

Đăi tươ̆ng Võ Nguyên Giáp cho ngế hok tro ki rơkê dêi Pôa Hồ Chí Minh, Kăn xiâm hnê ngăn tơnêi têa hneăng apoăng, Kăn xiâm pơkuâ ki ô eăng lâp plâi tơnêi, ngế kuăn ki rơkê dêi pơlê xiâm Quảng Bình. Đăi tươ̆ng Võ Nguyên Giáp ối cho ngế ki rơkê plĕng ‘na túa lĕm tro pơlê pơla, kăn xiâm pơkuâ ki lĕm ‘na hiâm mơno kăch măng, loi tơngah kân dêi Đảng, Tơnêi têa, Kuăn pơlê, Khu mô đô̆i ƀă pú hmâ lâp plâi tơnêi.