VOV4.Xơ Đăng - Klêi kơ’nâi to lâi hơnăm pơtê xua ai tơdjâk dêi tơdroăng tâ tú pơreăng COVID-19, tơdroăng cheăng ôm hyô dêi Đà Lạt, kong pơlê Lâm Đồng hiăng vêh po nếo ƀă tơ’mot hên khu tơmối troh ôm hyô. maluâ ti mê, xuân u ối hên mâu tơdroăng ki tá hâi tơtro, maluâ ối ai hên “khu ki leăm ôm hyô” pêi pro mâu tơdroăng ki ôh tá tro, pro ti tơniăn ăm tơdroăng rêh ối, pêi cheăng. Vâ kum rak tơniăn ăm tơdroăng lăm pôu ngăn, ôm hyô, mâu kơ koan ki ai tơdjâk dêi kong pơlê kố dế kơhnâ khât tơdroăng ‘mâi rơnêu mâu tơdroăng ki tá hâi teăm tro, mơjiâng um méa Đà Lạt ki lĕm têm, mơjo pâ, hlế rơkê ƀă tơmối.

Pơla kố nah, drêng ôm hyô Đà Lạt vêh kơdrâm hên ngế troh ôm hyô klêi kơ’nâi môi pơla tot pơtê xua pơreăng COVID-19, pơlê kong kơdrâm rơpâu reăng hiăng ai hên tơdroăng ki ôh tá tơniăn. Ki má môi cho tơdroăng “ngế lu lêa tăng kâ liăn’’ pêi cheăng hmâng vâ, tê tơmeăm hdi hâng long troăng kân, tê mơdró ôh tá lĕm ƀă hía hé. Mơnhên ôm hyô cho kơvâ cheăng kâ ki xiâm pêi lo liăn, khu râ kăn pơkuâ pơlê kong kơdrâm Đà Lạt hiăng mơ-eăm pơ’lêh tíu kơdrâm kuăn pơlê rêh ối tê mơdró, thăm pơkuâ vâ teăm tơdrêng ‘mâi rơnêu mâu tơdroăng ki ôh tá tro.

Thiê̆u tă Trương Quang Vũ, Đô̆i kan sát séa ngăn mâu ngế xôi ‘na cheăng kâ, Kŏng an pơlê kong kơdrâm Đà Lạt tối ăm ‘nâi, mâu roh tơdroăng ‘’ngế lu lêa tăng kâ liăn’’ tơbriât tơmối ai tung pơla kố nah hiăng châ kơ koan cheăng mot pêi cheăng ƀă ‘mâi rơnêu tâi tâng.

“Mâu tíu cheăng đi đo séa ngăn, thế mâu tíu cheăng tơkêa cho ôh tá ăm môi iâ liăn ăm mâu ngế djâ mơhno tíu prôk ôm hyô, xua ing mê chiâng ai tơdroăng ôh tá môi tuăn pơla mâu ngế lu lêa tăng kâ liăn, ngế djâ hnê prôk ôm hyô, pro tơdjâk ‘mêi, pro ôh tá tơniăn pơlê pơla’’.

Đà Lạt cho tíu troh ki hâk dêi tơmối

Tiô pôa Nguyễn Viết Vân, Kăn pơkuâ ‘na mơhno túa lĕm tro, tơ’noăng ivá ƀă ôm hyô kong pơlê Lâm Đồng, rơtế ƀă tơkŭm mơdêk ki dâi lĕm, mơjiâng mâu kế tơmeăm ôm hyô krá tơniăn djâ tơdroăng ki phá tơ-ê, kong pơlê dế mơhnhôk tâi tâng kuăn pơlê mơdêk hlê plĕng hnoăng cheăng tung rak loăng pơlái kong kế, tơdrêng amê ƀă tơdroăng rak ƀă mơdêk tơdroăng rêh ối mơngế Đà Lạt ‘’têm rơpiêt, tơpui lĕm, hâk hlế, vâ tơmối’’.

‘’Hâi khế ngin pơtối pêi tơtro tơdroăng pơtâng tối, thăm séa ngăn tơdroăng mơdêk yă, ngế lu lêa tăng kâ liăn toi hrot tơmối, pêi pro tơdroăng ki ôh tá lĕm vâ pơxâu phâk kơtăng. Pro ti lâi mơjiâng um méa dêi kuăn mơngế Đà Lạt – Lâm Đồng lĕm tâ, rơkê tâ, rêh lĕm, têm rơpiêt, tơpui lĕm, hâk hlế, vâ tơmối; vâ tơmối tung tơnêi têa ƀă lâp plâi tơnêi troh Đà Lạt, drêng troh Lâm Đồng kô tâ phuâng tâ, rak mâu um méa lĕm tâ’’.

8 khế apoăng hơnăm kố, Đà Lạt, Lâm Đồng hiăng tơdah 5 rơtuh 70 rơpâu roh tơmối ôm hyô troh lăm ôm hêi, pơtê, tâk 153% tâng pơchông ƀă roh kố hơnăm nah. Tiô nâ Đào Thị Huyền Trang, tơmối troh ing kong pơlê Bình Thuận, Đà Lạt hiăng pơ’lêh hên, ôh tá xê to dâi lĕm mâu tơdroăng ôm hyô châ mơdêk, tơmeăm ôm hyô hên tâ, mê mâu tơdroăng ‘na ngế lu lêa tăng kâ liăn, hjip yă, tê mơdró tiô troăng “pêi kâ ôh tá lĕm” hiăng kơdroh hên.

‘’Á hlo kong prâi rơngiâp lĕm, tíu akố xuân lĕm há. Loăng pơlái kong kế akố ai hên tíu vâ xup um. Kuăn mơngế akố xuân têm rơpiêt ƀă hiâm mơno lĕm há’’.

‘’Têm rơpiêt, tơpui lĕm, hâk hlế, vâ tơmối’’ châ mơnhên cho tơdroăng rêh ối dêi mơngế Đà Lạt. Ƀă tơdroăng rêh ối mê, mơngế Đà Lạt kô rŭm môi tuăn vâ mơdât tah lôi ‘’ngế lu lêa tăng kâ liăn’’ vâ mơhnhôk tơmối ôm hyô troh ƀă ‘’pơlê kong kơdrâm rơpâu reăng’’.

Quang Sáng chêh

A Sa Ly tơplôu ƀă tơbleăng