VOV4.Xơ Đăng - Drêng rôh lăm pêi cheăng a Tây Nguyên, kơxê lơ 19/9, Đăi tươ̆ng Tô Lâm, Ngế cheăng tung khu xiâm kal kí, Ngế xiâm pơkuâ Kŏng an, Ngế phŏ hnê mơhno xiâm tơnêi têa ‘na hbrâ mơdât, kâ kơluâ, pro ôh tá tro hiăng pêi cheăng ƀă Khu kăn Đảng ủy kong pơlê Kon Tum. A rôh pêi cheăng, Khu kăn Đảng ủy kong pơlê Kon Tum tối tơbleăng ăm Đăi Tươ̆ng Tô Lâm rơtế ƀă Khu kăn ‘na tơdroăng cheăng kâ - rêh ối ƀă tơdroăng rak tơniăn, hbrâ mơdât kâ kơluâ, pro ôh tá tro tung kong pơlê Kon Tum hiăng tối nhên ƀă tơbleăng mâu troăng rơhlâ, pơkâ dêi Tíu xiâm ‘na ‘mâi mơnhông, mơdêk cheăng kâ - rêh ối ƀă châ mâu tơdroăng pơkâ ki kal tung mâu tơdroăng cheăng.

Đăi tươ̆ng Tô Lâm  tối tơbleăng a rôh pêi cheăng ƀă Khu kăn Đảng ủy kong pơlê Kon Tum

Tung 6 khế apoăng hơnăm 2022 xo liăn ngân tơnêi têa châ dâng 2.330 rơtal liăn, châ lối 58% tiô tối hdrối, tâk 830 rơtal liăn tâng vâ pơchông ƀă hơnăm 2021. Xuân a rôh pêi cheăng, khu kăn Đảng ủy kong pơlê Kon Tum tối tơbleăng ăm Đăi tươ̆ng Tô Lâm rơtế ƀă mâu kăn ‘nâi tơdroăng kring vế tơniăn cheăng kal kí, hbrâ mơdât kâ kơluâ, pro ôh tá tro tung kong pơlê. Đăi tươ̆ng Tô Lâm, ngế cheăng tung khu xiâm kal kí, Ngế xiâm pơkuâ kŏng an, Ngế pro hnê mơhno cheăng xiâm tơnêi têa ‘na hbrâ mơdât kâ kơluâ, mơdât tơdroăng pro ôh tá tro tơmâng xo mâu tơdroăng hnê tối pâ thế, dêi Khu kăn Đảng ủy kong pơlê Kon Tum.

Gương tơplôu ƀă tơbleăng